پرەزيدەنتتىڭ باسپا ءسوز حاتشىسى داۋرەن ابايەۆ ماجىلىسكە مەرزىمىنەن بۇرىن سايلاۋ وتكىزۋ تۋرالى شەشىم ازىرشە قابىلدانباعانىن ايتتى، - دەپ حابارلايدى "قامشى" پورتالى Tengrinews.kz -كە سىلتەمە جاساپ.

"ارينە، دەپۋتاتتاردىڭ ءماجىلىستى تاراتىپ، سايلاۋدى مەرزىمىنەن بۇرىن وتكىزۋ تۋرالى باستاماسىن پرەزيدەنت بىلەدى. وسى ماسەلە بويىنشا شەشىم ازىرشە قابىلدانعان جوق، سەبەبى مۇنى جەتە ساراپتاۋ كەرەك. مەنىڭشەك، نۇرسۇلتان نازاربايەۆ، ءبىرىنشى كەزەكتە، وڭ مەن تەرىس جاقتارىن ولشەپ، قوعامنىڭ كوڭىل-كۇيىن جانە ەلدەگى جاعدايدى ەسەپكە الادى. سونىمەن قاتار، كونستيتۋسيانىڭ تالابى بويىنشا، مەملەكەت باسشىسى پارلامەنتتىڭ ەكى پالاتاسىنىڭ دا سپيكەرلەرىمەن جانە پرەمەر-مينيسترمەن كەڭەس وتكىزەدى. وسىدان كەيىن عانا قورىتىندى شەشىمدى بىلەمىز"، - دەلىنگەن داۋرەن ابايەۆتىڭ اقپارات اگەنتتىكتەرىنەن پارلامەنتكە كەزەكتەن تىس سايلاۋ وتكىزۋ تۋرالى ماسەلە جايلى كەلىپ ءتۇسىپ جاتقان ساۋالدارىنا بەرگەن جاۋابىندا.