«اقجول» ساياسي پارتياسى فراكسياسى اتىنان پارلامەنت ءماجىلىسىنىڭ دەپۋتاتى ازات پەرۋاشيەۆ پارلامەنت سايلاۋىن مەرزىمىنەن بۇرىن وتكىزۋ قاجەتتىگى تۋرالى پىكىرىن ءبىلدىردى، - دەپ حابارلايدى "قامشى" پورتالى.
«ۇلتتىق بيزنەستىڭ پارتياسى رەتىندە ءبىز بەسىنشى شاقىرىلىمداعى ق ر پارلامەنتى ءماجىلىسىن تاراتىپ، مەرزىمىنەن بۇرىن سايلاۋ وتكىزۋدى قولدايمىز»، - دەدى ول.
ونىڭ ايتۋىنشا، بۇل قادام پرەزيدەنتتىڭ بەس رەفورماسى مەن داعدارىسقا قارسى ستراتەگياسىن تولىققاندى جانە سەنىمدى جۇزەگە اسىرۋ ءۇشىن حالىقتىق سەنىم مانداتىن الاتىن جاڭا پارلامەنت جاساقتاۋ ءۇشىن قاجەت.
«قيىن-قىستاۋ كەزەڭدە پارلامەنتتە قانداي پارتيالار ءارى قاراي جۇمىس ىستەۋ كەرەك ەكەنىن حالىقتان سۇراپ كورەيىك! مەرزىمىنەن بۇرىن پارلامەنت سايلاۋى بىزگە ەرتەڭگى كۇنگە سەنىمدى بولۋ ءۇشىن اۋاداي قاجەت. بيزنەس پىكىرتالاستارعا الاڭداماي جۇمىس ىستەگىسى كەلەدى، سوندىقتان ءبىز مەملەكەت باسشىسىنا ۇندەۋ جولداپ وتىرمىز»، - دەپ اتاپ ءوتتى دەپۋتات.
