بۇگىن ءماجىلىس دەپۋتاتتارى پالاتانى مەرزىمىنەن بۇرىن تاراتۋدى مەملەكەت باسشىسى نۇرسۇلتان نازاربايەۆتان سۇرادى. ولاردىڭ ويىنشا، كەزەكتەن تىس ءماجىلىس سايلاۋىن وتكىزۋگە حالىقارالىق داعدارىس سەبەپ بولعان كورىنەدى. ناقتىراق ايتساق اتالعان سايلاۋدان كەيىن «تاعايىندالعان» دەپۋتاتتار قازاق ەلىن داعدارىستان قۇتقارىپ، ەكونوميكالىق جاعدايىن جاقسارىتىپ بەرەدى ەكەن.  الايدا، شىن مانىسىندە داعدارىستان شىعىپ، ەكونوميكالىق ءال-اۋقاتىمىزدىڭ ارتۋىنا بۇل سايلاۋدىڭ قانشالىقتى پايداسى بار؟

سونىمەن، نە كەرەك پارلامەنتتەگى ءۇش پارتيا مەن قازاقستان حالقى اسسامبلەياسى اتىنان سايلانعان دەپۋتاتتار مەرىزىمىنەن بۇرىن سايلاۋ وتكىزۋگە قۇلشىنىپ وتىر. ارينە، بۇعان دەيىن «ءبىر اۋىزدى» ءارى «ۇيىمشىل» بولىپ كەلە جاتقان ماجىلىسمەندەردىڭ وتىنىشتەرىن پرەزيدەنت كەرى قايتارا قويماس. ويتكەنى، «كەزەكتەن تىس ءماجىلىس سايلاۋى وتەدى» دەگەن اقپارات شىعا سالا، ۇكىمەت سايلاۋعا 4 ملرد. تەڭگە بولەتىنىن جاريالادى. الايدا، بىلىكتى ساراپشىلاردان باستاپ ساياساتتان از عانا حابارى بار ازاماتتارعا دەيىن «بۇل سايلاۋدان ەشقانداي پايدا جوق» دەگەن پىكىردە. سەبەبى، قازىرگى دەپۋتاتتاردىڭ 80 پايىزى قايتادان پارلامەنت تورىنە ورلادى. سوندىقتان دا بۇدان ەشقانداي دا پايدا جوق.

الايدا، ءبىزدىڭ پايىمداۋىمىزشا بيىلعى كەزەكتەن تىس ءماجىلىس سايلاۋىنىڭ ەڭ باستى «جاڭالىعى» پارلامەنتكە «اۋىل» پارتياسىنىڭ وتەتىنى بولسا كەرەك. ويتكەنى، سوڭعى كەزدەرى اتالعان پارتياسىنىڭ بەلسەندىلىگى بۇعان دەيىنگى كەزەڭدەرمەن سالىستىرعاندا ارتىپ وتىر. ماسەلەن، «اۋىلدىقتار» جاقىندا  وزدەرىنىڭ رەسمي سايتىنىڭ تۇساۋىن كەستى. سونداي-اق، ۇكىمەتتىڭ ىقپالىنداعى بۇقارالىق اقاپارات قۇرالدارى «اۋىلدىڭ» شاشپاۋىن كوتەرۋدە. ونىڭ ۇستىنە پارتيا ءتوراعاسى ءالي بەكتايەۆ پارلامەنت تورىندە سەناتور بولىپ وتىر. دەمەك، كەلەر سايلاۋدا «اۋىلدىڭ» اسىعى الشىسىنان ءتۇسىپ، ءماجىلىس تورىنەن ورىن الۋى مۇمكىن.

دەسەك تە، پارلامەنت ماجىلىسىنە «اۋىل» پارتياسىنىڭ وتەتىنى نەمەسە وتپەيتىنى باستى جاڭالىق ەمەس. شىن مانىسىندە باستى جاڭالىق قازاق ۇلتشىلدارىنىڭ ءماجىلىس دەپۋتاتى بولىپ، وزەكتى ماسەلەلەردى پارلامەنت تورىندە كوتەرگەنى بولىپ تۇر. وتكەن اپاتادا ءبىز بۇل تۋرالى سايتىمىزدا «ۇلتشىلدار وتىرماعان پارلامەنتتەن پايدا جوق» دەگەن تاقىرىپتا ماقالا جازعان بولاتىنبىز. ناقتىراق ايتساق، پارلامەنتكە ايدوس سارىم، مۇحتار تايجان، مۇرات ابەنوۆ، راسۋل جۇمالى سىندى ۇلتتىق-دەموكراتيالىق ۇستانىمداعى ازاماتتار وتسە، نۇر ۇستىنە نۇر بولار ەدى. الايدا، بيلىككە ايتقانىنا كونىپ، ايداعانىنا جۇرەتىن دەپۋتاتتار كەرەك. سوندىقتان دا قاراشا حالىقتىڭ ىزگى ارمانىنىڭ جۇزەگە اسا قوياتىنىنا سەنىم جوق.

ايتسە دە، جارماحان تۇياقباي باسقاراتىن جالپىۇلتتىق سوسيال-دەموكراتيالىق پارتياسى ارقىلى ۇلتشىلداردىڭ پارلامەنتكە وتۋىنە مۇمكىندىك بار. ويتكەنى، اتالعان پارتيانىڭ باسشىسى كوپتەن بەرگى ۇزىلىستەن كەيىن بۇگىن ارنايى مالىمدەمە جاساپ وتىر. نەگىزىندە جارماحان تۇياقبايدىڭ ۇلتتىق مۇددەنى تۋ ەتىپ ءدال سايلاۋدىڭ الدىندا مالىمدەمە جاساۋى تەگىن ەمەس. ويتكەنى، اتالعان مالىمدەمەگە قاراعاندا پارتيا الداعى سايلاۋعا قاتىسۋعا دامەلى سياقتى. الايدا بۇقارا حالىقتىڭ اراسىندا پارتيانىڭ بەدەلى وتە تومەن. ەگەر جالپىۇلتتىق سوسيال-دەموكراتيالىق پارتياسى ۇلتشىلداردى ءوز قاتارىنا تارتىپ، ارەكەت ەتەتىن بولسا سايلاۋدا ىقپالدى كۇشكە اينالۋى مۇمكىن. ۇزىن ءسوزدىڭ قىسقاسى جارماحان تۇياقباي باسقاراتىن پارتيانىڭ تاعدىرى ۇلتشىلداردىڭ قولىندا تۇرعان سياقتى. الايدا، «رۋحانيات» پارتياسىندا جىبەرگەن قاتەلىگىن بيلىك قايتالامايتىن شىعار.

سەرىك جولداسباي

استانا