قازاقستان شەنەۋنىكتەرى سىيلىققا العان زاتتارىن اۋكسيونعا سالماقشى. بۇل تۋرالى قارجى ءمينيسترى باقىت سۇلتانوۆ مالىمدەدى.

بۇدان بىلاي مەملەكەتتىك قىزمەتشىلەر ءتۇرلى سەبەپتەرمەن وزدەرىنە سىيعا تارتىلعان زاتتاردى مەملەكەتكە وتكىزەتىن بولادى. قارجى مينيسترلىگى قۇرامىنداعى مەملەكەتتىك مۇلىك جانە جەكەشەلەندىرۋ كوميتەتى ول زاتتاردى ساتىلىمعا شىعارىپ، قازىنا قورجىنىن تولتىرماق كورىنەدى.

ۇكىمەت وتىرىسىندا قارجى ءمينيسترى ارىپتەسى اسىلجان مامىتبەكوۆتىڭ قىتايلىق ارىپتەستەرىنەن العان سىيلىعى تۋرالى دا ايتىپ قالدى.

«ءبىلتىر جىل سوڭىندا ءبىر قىتايلىق تەلەفون وتكىزىلدى. تەلەفون دى قىتايلىقتار اۋىل شارۋاشىلىعى مينيسترلىگى وكىلدەرىمەن رەسمي كەزدەسۋدە سىيلاعان. ونى ءتىپتى، اسىلجان سارىباي ۇلىنىڭ ءوزى (مەملەكەتكە – رەد.) وتكىزۋى مۇمكىن»، - دەدى ب. سۇلتانوۆ. باس قارجىگەردىڭ ايتۋىنشا، ول تەلەفون ەندى gosreestr.kz  سايتى ارقىلى ساتىلىمعا شىقپاق.

جاڭادان قابىلدانعان «مەملەكەتتىك قىزمەت تۋرالى» زاڭدا مەملەكەتتىك قىزمەتشىلەردىڭ قانداي دا ءبىر سىيلىق الۋىنا تىيىم سالىنعانىنا قاراماستان، قارجى ءمينيسترى ونداي جاعدايلاردىڭ بولىپ تۇراتىنىن مويىندادى. ونىڭ ايتۋىنشا، شەنەۋنىكتەرگە حالىقارالىق ۇيىمداردان سىيلىقتار كەلىپ تۇرادى. رەسمي كەزدەسۋلەر كەزىندە دە تاراپتار بىر-بىرىنە سىي-كادە جاسايدى. سول زاتتار ەندىگى ۋاقىتتا بەلگىلەنگەن تارتىپپەن مەملەكەت مەنشىگىنە تاپسىرىلاتىن بولادى.