قاڭتار ايىنىڭ 18ء-شى جۇلدىزىندا الماتى قالاسىندا «قۋىرداقتىڭ كوكەسى» اتتى العاش قازاقتىڭ ەتنو-مادەني رەستورانى اشىلماق، - دەپ حابارلايدى «قامشى» پورتالى.

اتالمىش كافەدە ۇسىنىلاتىن تاعامدار قالاداعى بىردە-بىر مەيرامحانا نەمەسە ءدامحانادا كەزدەسپەيتىندىكتەن، بۇل ۇلكەن جاڭالىق بولعالى تۇر.

ەستەرىڭىزدە بولسا، وتكەن جىلدىڭ قاراشا ايىندا الماتى قالاسىنىڭ اكىمى باۋىرجان بايبەك قازاقتىڭ ۇلتتىق تاعامدارىن قايتا جانداندىرۋدىڭ ماڭىزدىلىعىن، سول ءۇشىن ۇلتتىق تاعامداردىڭ كافە-رەستوراندارىن اشۋ كەرەكتىگىن ەرەكشە اتاپ وتكەن بولاتىن. اكىمنىڭ ول ۇسىنىسى ايتىلعان جەردە قالىپ، قالا كاسىپكەرلەرىنەن ەشكىم ءىلىپ اكەتە قويماعان ەدى. سول ولقىلىقتىڭ ورنىن الماتى تەحنولوگيالىق ۋنيۆەرسيتەتىنىڭ ستۋدەنتى ەركەبۇلان ماكەنوۆ تولتىرىپ وتىر.

 الداعى دۇيسەنبى كۇنى قالا تۇرعىندارىنا ەسىگىن ايقارا اشاتىن مەيرامحانا ۇمىت بولعان قازاقتىڭ تابا نان، بۇجىعى، قارىنداعى ماي، تۇيەنىڭ قۋىرداعى، بۇرمە قارىن، ۋىز، جارما قۇرت، قاعناق،تۇيمەش، سىرباز، بالقايماق، جورگەم، جاۋ جۇمىق جانە وزگە دە كونە تاعامدارى ۇسىنىلادى. «قۋىرداقتىڭ كوكەسىندە» تاعامداردىڭ بارلىعىن كونەنىڭ كوزىن كورگەن، ۇلتىمىزدىڭ ءداستۇر-سالتى مەن تاعامدارىنان اقپارى مول، تاجىريبەلى اسپازشىلار قازاقتىڭ بايىرعى تەحنولوگيالارىمەن جاسايتىندىقتان، ءدامىن كورگەن دە كورمەگەن دە ارماندا.

«اجەلەرىمىزدىڭ ايالى الاقانىمەن جاسالىپ، ۇرپاقتان-ۇرپاققا بەرىلگەن قازاقتىڭ ءتول تاعامدارىن ناسيحاتتاۋ – باستى ماقساتىمىز» دەيدى مەيرامحانا اشقان ەركەبۇلان ماكەنوۆ.