قاندىاعاش قالاسىندا تۇراتىن سەگىز ايەل سيرياعا كەتپەكشى بوپ جۇرگەن جەرىنەن ۇستالدى. ولاردىڭ اراسىندا 17-18 جاستاعى قىزدار دا بولعان، - دەپ حابارلايدى «قامشى» پورتالى كەرەك.info-عا سىلتەمە جاساپ.

جاقىندا قاندىاعاشتا سيرياعا اتتانباقشى بولعان سەگىز قىز-كەلىنشەك ۇستالعان. استىرتىن ارەكەتتەرى اشكەرە بولعان ءاربىر ەكىنشى ايەل بىرنەشە مارتە تۇرمىستا بولعان. ياعني، ولاردى ءدىن جولىن ۇستاناتىن كۇيەۋلەرى تالاق ەتكەن،-دەپ حابارلاعان سايتقا سەنىمدى اقپارات كوزى. 

“كەرەك. info” تىلشىسىنە اقپارات بەرگەن ازامات ءاتى-جونىنىڭ اتالعانىن قالاماپتى. ويتكەنى، ول ءوزى مەشىت قىزمەتكەرى كورىنەدى. ونىڭ تاعى ءبىر ارىپتەسى دە بۇل اقپاراتتى راستاپ وتىر. ايتۋىنشا، سيريا اسپاق بولعان سەگىز ادامنىڭ اراسىندا 17-18 جاس ارالىعىنداعى بويجەتكەندەر دە بار. كۇشتىك قۇرىلىمدار اتالعان سەگىز ازاماتشانىڭ ۇشەۋىن جاۋاپقا تارتتى،-دەيدى مەشىت قىزمەتكەرى. 
اۋىلداستارىنىڭ سيريا اسىپ كەتپەكشى بولعانى تۋرالى اڭگىمە ءقازىر شاعىن قالادا جەلدەي ەسىپ تۇر.

–زەينەتاقىنىڭ جايىمەن پوشتاعا بارعان ەدىم. كەزەكتە تۇرعان ادامدار سەگىز ايەل سوعىسقا كەتپەك بولعان-دەپ شۋلاپ جاتتى. اراسىندا جاپ-جاس قىزدار دا بار كورىنەدى، - دەيدى قاندىاعاشتىڭ ج. ەسىمدى تۇرعىنى. 

اقتوبەدە ءدىني احۋالدىڭ كۇردەلى ەكەندىگى ەشكىمگە دە قۇپيا ەمەس. سويتە تۇرا رەسمي ورگاندار جاۋىردى جابا توقۋدان تانباي وتىر. وسى اپتادا ءدىن جولىن ۇستاناتىن 20 جاستاعى جىگىتتىڭ مەكتەپ وقۋشىسىمەن نەكە قيدىرتپاق بولعانى دا اشكەرە بولدى. 

بۇل وقيعا بىلتىر وبلىس ورتالىعىندا بولعان. ءبىراق كامەلەتكە تولماعاندار ءىسى جونىندەگى مامانداندىرىلعان اۋدانارالىق سوتى جىلدى قورىتىندىلاعان جيىندا عانا بەلگىلى بولدى. سوت ءتورايىمى مايرا ۇرىستەمبايەۆانىڭ ايتۋىنشا،14 جاستاعى مەكتەپ وقۋشىسى الەۋمەتتىك جەلى ارقىلى 20 جاستاعى جىگىتپەن تانىسادى. ۇيىنەن بۇرىن-سوڭدى ەشقايدا ۇزاپ شىقپاعان، كافە، كلۋبتاردىڭ تابالدىرىعىن اتتاماعان وقۋشى اناسى جوق كەزدە الگى جىگىتپەن ءوز ۇيىندە كەزدەسىپ وتىرعان. ەكەۋى جىنىستىق قاتىناسقا دا تۇسكەن. تەرگەۋ مۇنداي جاعدايدىڭ ءجاسوسپىرىمنىڭ ۇيىندە ءبىر ەمەس، ەكى رەت بولعانىن انىقتادى. 
وقۋشى قىز بولعان جاعدايدى مەكتەپتەگى قۇربىسىنا سىر قىلىپ ايتادى. ءبىر كۇنى مەشىتكە بارىپ نەكەلەرىن قيدىرتپاق ويلارى بارىن دا بولىسكەن.وقۋشى قىز ەستىگەن-بىلگەنىن سىنىپ جەتەكشىسىنە جەتكىزەدى. ءمۇعالىم وقۋشىنىڭ اتا-اناسىنا قوڭىراۋ شالعان. 

وسىلايشا ءمۇعالىم مەن اتا-انا بىرلەسە ءجۇرىپ، مەشىتكە نەكەلەرىن قيدىرتۋعا بارا جاتقان وقۋشى قىز بەن جاس جىگىتتى توقتاتادى. كامەلەتكە تولماعان ءجاسوسپىرىمدى جىنىستىق قاتىناسقا يتەرمەلەگەن 20 جاستاعى جىگىت سوتتىڭ ۇكىمىمەن باس بوستاندىعىنان ايرىلدى. 

ء-دىن ماسەلەسى ءبىزدى دە قاتتى ويلاندىرىپ وتىر،-دەدى جىلدى قورىتىندىلاعان كامەلەتكە تولماعاندار ءىسى جونىندەگى مامانداندىرىلعان اۋدانارالىق سوتىنىڭ ءتورايىمى مايرا ۇرىستەمبايەۆا.