وسىدان ءبىر اي بۇرىن اقتوبەگە باس يمام بولىپ كەلگەن نۇرلان اسانوۆ “وڭىردەگى ءدىني احۋالعا جۇرەگى قاتتى اۋىراتىنىن” ايتادى. باس يمامنىڭ سوزىنە قاراعاندا، اقتوبەدە ءقازىر تەرىس اعىم جەتەگىندە جۇرگەن ەكى مىڭنان استام ادام بار، - دەپ حابارلايدى «قامشى» پورتالى كەرەك-ينفو-عا سىلتەمە جاساپ.

نۇرلان اسانوۆتىڭ اقتوبەگە باس يمام بولىپ كەلگەنىنە ءبىر ايداي ۋاقىت بولدى. بۇل اينالانى باجايلاپ الۋعا جەتكىلىكتى مەرزىم. وسى ارالىقتا ول جوو، كوللەدجدەر ستۋدەنتتەرىمەن بىرنەشە مارتە كەزدەسكەن. قالاداعى جالپى ءبىلىم بەرەتىن مەكتەپتەردى دە ارالاپ كورگەن. يمام قالا مەكتەپتەرىنىڭ بىرىندە قارا كيىم كيىپ، بەتىن تۇمشالاعان ءجاسوسپىرىم قىزدار مەن ساقال وسىرگىسى كەلەتىن بالالاردى كورىپ تاڭ قالعانىن ايتتى.

“قىز بالانىڭ كيگىسى كەلگەنى حيدجاب تا، ورامال دا ەمەس. قاپ-قارا بولىپ بەتىن نيكابپەن بۇركەنۋدى قالايدى. سول كيىمىمەن دارىسكە دە كەلمەك. ال 7-8 سىنىپ وقيتىن ەر بالا ساقال جىبەرۋگە تالپىنۋدا. ءالى كىشكەنتاي عوي. ساقالى جارىتىپ تا وسپەيدى. سونىڭ وزىندە تارتىپ وسىرگىسى كەلەدى. بالالاردىڭ وسىنداي حالگە جەتكەنىن كورىپ جۇرەگىم اۋىردى. ال مەكتەپتىڭ باسشىسى قام-قارەكەتسىز وتىر. الگى بالالارمەن جەكە سويلەسپەگەن، ماماندار شاقىرماعان. ءبىر بايقاعانىم، تەرىس اعىمدار تۋرالى تۇسىنىك مەكتەپ ديرەكتورلارىنىڭ ساناسىنا ءالى جەتپەي جاتقان سياقتى. وقۋشىلاردىڭ ۇيالى تەلەفوندارىنداعى بەينەروليكتەردىڭ ەكسترەميستىك ەكەنىن دە بىلمەيدى ەكەن. ولارعا ءتۇسىندىرۋ جۇمىسى جۇرگىزىلمەگەن. مەن ولارعا مۇنداي ۆيدەولاردى الەۋمەتتىك جەلىلەردە تاراتۋ ءوز الدىنا، لايك باسۋدىڭ ءوزى قىلمىستىق جاۋاپكەرشىلىك ەكەندىگىن ايتتىم. تۇسىنگەن بولۋلارى كەرەك، دەرەۋ ءوشىرىپ تاستادى”،- دەيدى وبلىستىڭ باس يمامى نۇرلان اسانوۆ.

اقتوبەنىڭ ورتالىق مەشىتىندە ارنايى كەستە قۇرىلدى. سوعان سايكەس، ءدىن وكىلدەرى ءبىلىم نىساندارىن ارالاپ، اڭگىمەلەسۋ جۇرگىزۋدى ۇزدىكسىز جالعاستىرا بەرمەك. وكىل يمام جاعدايدىڭ تىم كۇردەلى ەكەنىن ايتىپ، اقساقالداردان كومەك سۇراعان. ولاي ەتپەسكە لاجى دا جوق. ايتۋىنشا، ءدال ءقازىر اقتوبەدە تەرىس اعىمنىڭ جەتەگىندە جۇرگەن ەكى مىڭنان استام قىز-جىگىت بار.

“جۇرتتىڭ ءبارى نەگە تەرىس اعىم جەتەگىندە كەتىپ جاتىر؟ وعان باستى سەبەپ – ءوز ءدىنىن بىلمەۋى. ونى تۇسىندىرەتىن ەشكىم بولمادى. ياعني، دىنگە كوڭىلدەرى اش بولدى. ءبىز ونى اسقىندىرىپ الدىق. جازىلمايتىن كەسەلگە اينالدى. بۇرىن اداسىپ جۇرگەندەر جاي تىستەيتىن. وكىنىشتىسى، ەندى ازۋ تىستەرىن شىعارىپ، سۇيەككە باتىرىپ تىستەگىسى كەلەدى. ەگەر بۇنى تۇزەتپەسە، قازىرگى قارجىلىق داعدارىس ءدىني احۋال كۇردەلەنسە – ويىنشىق بولماق. ءدىننىڭ اينالاسىندا داۋرىقپا ءسوز كوپ. مىسالى، پالەنشە اكەسىنىڭ بەيىتىنە جارىق شامىن ورناتىپتى دەيتىندەر دە بار. مۇنىڭ ءبارى بوس ءسوز. الدىمەن تىرىلەردىڭ پروبلەماسىن شەشىپ الايىق. قازاق ايتپاقشى، باسىمىزدا ۇلكەن بوقتىق تۇرعاندا، شوقتىقتى كوتەرەتىن ماسەلە ەمەس، - دەيدى باس يمام نۇرلان بايجىگىت ۇلى.

جاڭا يمامعا اقتوبەدە وتەتىن ساداقالاردىڭ كەزىندەگى ىسىراپ تا ۇناماعان. ايتۋىنشا، جەرگىلىكتى جۇرت ساداقانى تويدان بەتەر ەتىپ وتكىزەدى. داستارحانعا قۇستىڭ سۇتىنەن وزگەنىڭ ءبارىن قويادى. نۇرلان اسانوۆ وبلىس اكىمى بەردىبەك ساپاربايەۆقا “نۇر-عاسىر” مەشىتى جانىنان حاتىمحانا سالۋدى ۇسىنىپتى. حاتىمحانا سالىنار بولسا، وندا ارنايى اس ءمازىرى ازىرلەنەدى. قازىرگىدەي ىسىراپ پەن تەككە شاشىلۋعا، ماقتانگەرشىلىككە جول بەرىلمەيدى.

جاڭا جىل قارساڭىندا اقتوبەگە باس يمام بولىپ تاعايىندالعان نۇرلان اسانوۆ بۇعان دەيىن شىعىس قازاقستان وبلىسىندا ءدال وسىنداي قىزمەت اتقاردى. ال ونىڭ ەسىمى ەلگە سىركە سۋىن ءىشىپ ولگىسى كەلگەن ايەلدىڭ نەسيەسىن تولەپ بەرگەننەن سوڭ تانىلعان بولاتىن. ءۇش بالاسى بار 34 جاستاعى كەلىنشەكتىڭ بانك الدىنداعى قارىزى 400 مىڭنان اسىپ كەتكەن. نەسيەسىن وتەي الماعان كەلىنشەك وز-وزىنە قول جۇمساماق بولادى. تىرلىكتەن باز كەشىپ جۇرگەن ايەلدىڭ تاعدىرىنا بەي-جاي قاراي الماعان يمام ءۇش بالانىڭ اناسىن اجالدان قۇتقارىپ قالدى.

باس يمامنىڭ ءوزى دە ءۇيلى-باراندى. بيىل ءۇشىنشى مۇشەلىنە قادام باسقان نۇرلان اسانوۆ ازىرشە جەتى بالانىڭ اكەسى.