تاريفتەردىڭ وسۋىنە جول بەرمەۋ ءۇشىن 1،2 پايىزدىق تارماق دەڭگەيىندە رەتتەلەتىن قىزمەت كورسەتۋلەردىڭ تاريفتەرى مەن باعالارىنىڭ 2014 جىلعا ارنالعان ينفلياسياعا شەكتى سالىمى قامتاماسىز ەتىلەدى. بۇدان بولەك، 2014 جىلعى مامىر ايىنان كەيىن رەتتەلەتىن قىزمەت كورسەتۋلەردىڭ جاڭا تاريفتەرى مەن باعالارى قولدانىسقا ەنگىزىلەتىن بولادى. بۇگىن پارلامەنت ماجىلىسىندەگى ۇكىمەت ساعاتىندا ەكونوميكا جانە بيۋدجەتتىك جوسپارلاۋ ءمينيسترى ەربولات دوسايەۆ وسىلاي ءمالىم ەتتى.ءمينيستردىڭ ايتۋىنشا، حالىق تابىسىن قولداۋ ماقساتىندا دا ءبىرقاتار شارالار اتقارىلادى. ماسەلەن، ۇكىمەتتىڭ كەڭەيتىلگەن وتىرىسىندا مەملەكەت باسشىسى بەرگەن تاپسىرمالارعا سايكەس، 1 ساۋىردەن باستاپ ازاماتتىق قىزمەتشىلەردىڭ، دارىگەرلەردىڭ، مۇعالىمدەردىڭ جانە مەملەكەتتىك سەكتوردىڭ الەۋمەتتىك سالاسىنداعى باسقا دا قىزمەتكەرلەردىڭ لاۋازىمدىق جالاقىسىنا 10% مولشەرىندە اي سايىنعى قوسىمشا تولەم ەنگىزىلەدى. «زەينەتاقىلىق جانە مەملەكەتتىك الەۋمەتتىك تولەمدەردىڭ مولشەرلەرى 5%-عا، بۇل رەتتە 2014 جىلدىڭ باسىنان بەرگى جوعارىلاۋدى ەسكەرە وتىرىپ، تيىسىنشە 14%-عا جانە 12%-عا دەيىن جەتكىزىلەتىن بولادى. ال اتاۋلى الەۋمەتتىك كومەك - 12 %-عا دەيىن، ستۋدەنتتەر شاكىرتاقىلارى - 10%-عا جوعارىلايتىن بولادى. بۇدان بولەك، جىل سوڭىنا دەيىن «ب» كورپۋسىنىڭ مەملەكەتتىك قىزمەتشىلەرىنە ەڭبەكاقى تولەۋ دەڭگەيىن 2015 جانە 2016 جىلداردىڭ 1 شىلدەسىنەن باستاپ 15%-عا جوعارىلاتۋدى كوزدەيتىن پرەزيدەنت جارلىعىنىڭ جوباسى ازىرلەنەتىن بولادى»، - دەدى ەكونوميكا جانە بيۋدجەتتىك جوسپارلاۋ ءمينيسترى ە.دوسايەۆ.