ءبىرىڭعاي جيناقتاۋشى زەينەتاقى قورىنداعى قارجىنىڭ قاي ماقساتقا جۇمسالاتىنى اقپاندا بەلگىلى بولادى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ۇلتتىق ەكونوميكا ءمينيسترى ەربولات دوسايەۆ مالىمدەدى، - دەپ حابارلايدى 24-ارنا.

ەسكە سالا كەتەيىك، 2016 جىلدىڭ 1 قاڭتارىنان باستاپ ۇلتتىق قوردى باسقارۋ كەڭەسى مەن ءبىرىڭعاي جيناقتاۋشى زەينەتاقى قورى بىرىكتى. «ەندى قورداعى قاراجاتتى ينۆەستيسيالاۋعا قاتىستى تۇپكىلىكتى شەشىم اقپان ايىنىڭ باسىندا شىعۋى ءتيىس»، - دەدى مينيستر. ول ءۇشىن ۇلتتىق بانك پەن ۇكىمەت قارجىنى ءتيىمدى جۇمساۋ جولدارىن جاڭا جىلعا دەيىن ەلەپ-ەكشەگەن بولاتىن. سونىمەن قاتار ۇلتتىق ەكونوميكا ءمينيسترى «تۇرعىن ءۇي قۇرىلىس جيناق بانكى» سالىمشىلارىنا تولەنەتىن وتەماقى جونىندە دە اتاپ ءوتتى.

ەربولات دوسايەۆ، ق ر ۇلتتىق ەكونوميكا ءمينيسترى:

- مەملەكەت باسشىسىنىڭ تاپسىرماسى بويىنشا، «تۇرعىن ءۇي جيناق بانكىنىڭ» سالىمشىلارىنا وتەماقى تولەۋ جۇيەسىن جاساقتاپ بولدىق. 20 تامىزعا دەيىن تىركەلگەن سوما 171 ملرد تەڭگەنى قۇراعان. بۇل – سول كەزدە بولعان سالىمدار. وتەماقى كولەمى 60،9 ملرد تەڭگەنى قۇراعان. 2016-2017 جىلدارى ونىڭ 24 ملرد تەڭگەسى بانكتىڭ جەكە تابىستارى ەسەبىنەن وتەلەدى. ال 36،9 ملرد تەڭگە بيىل جانە كەلەسى جىلدارى ۇكىمەت رەزەرۆىنەن بولىنەدى. وتەماقى تولەۋ ەكى ترانشپەن جۇزەگە اسادى. 2016 جىلدىڭ شىلدەسى جانە 2017 جىلدىڭ قازان ايىندا جاسالادى.