الماتى مەن قاپشاعاي اراسىنداعى جول بويىندا بەلگىسىز ءبىر قىزدىڭ ەلەسى تاكسي توقتاتىپ تۇراتىنىن جولاۋشىلار جارىسا ايتۋدا. بۇل تۋرالى «قامشى» پورتالى «ەكسپرەس ك» گازەتىنە سىلتەمە جاساپ حابارلايدى. جالپى مۇنداي اڭگىمەلەر بۇعان دەيىن دە شىققان. ءتىپتى، قازاقستاننىڭ ءار وبلىسىندا وسىنداي سارىنداعى اڭگىمەلەر بار. مىسالى، بۇدان ءبىراز جىل بۇرىن اقتوبە وبلىسىندا جول بويىندا تۇياقتى قىزدار كەزدەستى دەگەن اڭىزعا بەرگىسىز اڭگىمە شىققان ەدى. استانا، قاراعاندى ماڭىنان دا وسىنداي ەلەستەر كورىنگەن. وسى وڭىرلەردىڭ كەي تۇرعىندارى بۇل ەلەستەردى جول بويىندا تاكسيشىلەردىڭ قولىنان قازا تاپقان قىزداردىڭ ءارۋاقتارى ەكەنىن ايتقان بولاتىن. جول تورىعان، ءجۇرىس-تۇرىسى جۇمباق بۇل قىزدار تۋرالى ءار وڭىردە ايتىلىپ جۇرگەن اڭگىمەلەردىڭ نەگىزگى مازمۇنى ۇقساس. تەك، وقيعا ورنى مەن بىردى-ەكىلى جاعدايلار عانا وزگەرتىلىپ ايتىلادى. مىنا الماتى-قاپشاعاي تاس جولىندا تاكسي توقتاتىپ جۇرگەن قىز تۋرالى سىبىس تا سونداي. كەي جۇرگىزۋشىلەر ونىڭ دا تۇياعى بارىن بايقاعان. توقتاعان كولىكتەرگە وتىرعان ول قىز جۇرگىزۋشىگە ءنومىرىن ايتىپ، ۇيىنە حابارلاسۋىن، قىزدارىنىڭ كەلە جاتقانىن ايتۋىن سۇرايتىن كورىنەدى. تەلەفون شالعان ادامدار قىزدارىنىڭ ەرتەرەكتە قازا بولعانىن ايتقاندا تاڭ قالعان جۇرگىزۋشىلەر سالوندا وتىرعان قىزدىڭ جوق بولىپ كەتكەنىن بايقاعان. «ەلەس تۋرالى اڭىز كەڭ تاراعانى سونشا، كوپ جۇرگىزۋشىلەر قاپشاعاي تاس جولىندا تاكسي توقتاتقان قىزداردىڭ بارلىعىنان قورقىپ، توقتاماي كەتىپ جاتىر. بۇل ماسەلەنى ءبىرشاما زەرتتەدىم. مۇنداي اڭگىمەلەردىڭ تاراپ جۇرگەنىنە 20 جىلدان اسىپتى جانە بۇل اڭگىمەلەر نەگىزسىز ەمەس. مەن جول بويىندا قايتىس بولعان قىزدىڭ اتا-اناسىن اتپتىم. ولار ءالى الماتى قالاسىندا تۇرادى. ولارعا تاكسي جۇرگىزۋشىلەرى بىرنەشە رەت قوڭىراۋ شالىپ، قىزدارىن اكەلە جاتقانىن ايتقان. ول كىسىلەر ءتىپتى، جول بويىنا مولدا اپارىپ، قۇران دا وقىتقان ەكەن»، - دەيدى الماتى قالاسىنىڭ تۇرعىنى مەرەي رىسكەلدييەۆ. Youtube جەلىسىندە وسىنداي ءارۋاقتار تۋرالى ۆيدەولار دا جەتىپ ارتىلاتىن كورىنەدى.