ەلىمىزدە جاقىن كۇندەرى مىندەتتى ءبىرىڭعاي مەكتەپ فورماسى ەنگىزىلۋى مۇمكىن. بۇل تۋرالى ق ر ءبىلىم جانە عىلىم مينيسترىلىگىنىڭ باسپا ءسوز قىزمەتى وكىلدەرى ءمالىم ەتتى. قازىرگى تاڭدا ءبىرىڭعاي مەكتەپ فورماسىن ەنگىزۋ ءۇشىن مەملەكەتتىك ورگانداردىڭ كەلىسىمىن الۋ جۇمىستارى جۇرگىزىلىپ جاتىر. ەگەر وسى جۇمىستار ءساتتى جۇزەگە اساتىن بولسا 2016 جىلدىڭ جاڭا وقۋ جىلىنان باستاپ ءبىرىڭعاي مەكتەپ فورماسى ەنگىزىلەتىن بولادى.

نەگىزىندە ءبىرىڭاي مەكتەپ فورماسىن ەنگىزۋ ماسەلەسى تاۋەلسىزدىك العالى بەرى كوتەرىلىپ كەلە جاتىر. وسىنىڭ ارقاسىندا كەيبىر مەكتەپتەر ءبىرىڭعاي فورماعا كوشىپ، جۇرتشىلىقتىڭ ىقىلاسىنا بولەنۋدە. الايدا، ەلىمىزدەگى مەكتەپتەردىڭ بارلىعى بىردەي ورتاق فورما كيۋگە كوشكەن جوق. سوندىقتان دا، بۇل تۋرالى ماسەلە نازاردان تىس قالعان ەمەس. ماسەلەن تاياۋدا ءماجىلىس دەپۋتاتى سەيىتسۇلتان ايىمبەتوۆ وقۋشىلارعا ءبىرىڭعاي مەكتەپ فورماسىن ەنگىزۋدى ۇسىندى. ونىڭ ايتۋىنشا، قازاقستاندىقتار شەتەلدىك وندىرۋشىلەردىڭ تاۋارىن ساتىپ الىپ، وزگە ەلدىڭ ەكونوميكاسىن بايىتىپ جاتىر.

– نەگىزگى قورقىنىش وقۋشىلاردى ساپالى ءارى دەنساۋلىقتارىنا ءقاۋىپسىز مەكتەپ فورماسىمەن قامتاماسىز ەتۋ بولىپ وتىر. كۇز سايىن قازاقستاندىق اتا-انالاردا مەكتەپ فورماسىن ىزدەۋ، تاپسىرىس بەرۋ دەگەن ماسەلە باستالادى، سەبەبى بىزگە مەكتەپ فورمالارى قىتايدان، تۇركيا مەن قىرعىزستاننان اكەلىنەدى. مىناداي سۇراق تۋادى: ءبىز بالالارىمىزعا نە ساتىپ الىپ ءجۇرمىز؟ از ەمەس اقشاعا بىزگە ساپاسى تومەن تاۋار ۇسىنىلادى، قاۋىپسىزدىك پەن شىعارىلىمى تۋرالى كۋالىكتەرى دە جوق. ەڭ سوراقىسى، مەكتەپ فورماسى ءۇشىن سينتەتيكالىق ماتا قولدانىلادى، ول بالا دەنساۋلىعى ءۇشىن اسا ءقاۋىپتى، – دەيدى دەپۋتات.

شىنىندا ءبىرىڭاي مەكتەپ فورماسىن ەنگىزۋ كاسىپكەرلەردىڭ تابىسىن ارتىرۋعا مۇمكىندىك بەرەدى. ويتكەنى، قازىرگى تاڭدا ەلىمىزدەگى مەكتەپ وقۋشىلاردىڭ سانى 2 ميلليونعا جۋىقتايدى. ەگەر ءبىرىڭعاي مەكتەپ فورماسى 15 مىڭ تەڭگە بولسا كاسىپكەرلەر شامامەن 30 ميلليارد تەڭگە تابىس تابادى. بۇل ءوز كەزەگىندە كاسىپكەرلىكتى دامىتۋعا تاپتىرماس مۇمكىندىك. الايدا جاس ۇستاز اياتجان احمەتجان ءبىرىڭعاي مەكتەپ فورماسى ساپالى ءارى ارزان بولۋى كەرەك دەيدى.

– ءبىلىم جانە عىلىم مينيسترلىگىنىڭ ءبىرىڭعاي مەكتەپ فورماسىن ەنگىزۋى وتە قۇپتارلىق دۇنيە. بۇل ەڭ بىرىنشىدەن مەكتەپتەگى الەۋمەتتىك تەڭسىزدىكتى ياعني ءار ءتۇرلى ءسان قۋۋدىڭ الدىنا الادى. ەكىنشىدەن، سالت-داستۇرىمىزگە جات، اشىق-شاشىق نەمەسە ءدىني اعىمدار بويىنشا كيىنۋگە شەكتەۋ بولادى. ويتكەنى سوڭعى جىلدارى مەكتەپكە حيدجاپ كيىپ كەلگىسى كەلەتىن وقۋشىلار پايدا بولا باستادى. مەنىڭ ويىمشا، مينيسترلىك ءبىرىڭعاي مەكتەپ فورمانى بەكىتۋدە ءۇش نارسە باسا نازار اۋدارعانى ءجون. ەڭ بىرىنشىدەن فورمانىڭ ساپاسى مەن باعاسى حالىققا ءتيىمدى بولۋى كەرەك. ەكىنشىدەن، وقۋشلىلار كيىمىندە قازاق ۇلتىنىڭ ۇلتتىق ناقىشى مىندەتتى تۇردە ورىن الۋ كەرەك. بۇل وقۋشى ساناسىنا ۇلتتىق رۋحتى سىڭىرۋگە مۇمكىندىك بەرەدى، – دەيدى ۇستاز.

راسىندا مەكتەپ فورماسى ۇلتتىق ناقىشتا بولعانى ابزال. الايدا، حيدجاپ كيگەندى قوش كورەتىن كەي وتباسىلار مينيسترلىكتىڭ بۇل باستاماسىن قۇپتاي قويار ما ەكەن؟ بۇل جاعى بەلگىسىز. الايدا ءبىر بەلگىلىسى بۇدان بىلاي مەكتەپكە اشىق-شاشىق نەمەسە قارا جامىلىپ كەلەتىندەردىڭ قاراسى ازايادى. ويتكەنى ءبىلىم جانە عىلىم مينيسترلىگى ءبىرىڭاي فورماعا كوشۋگە ارەكەت ەتۋدە.

سەرىك جولداسباي

استانا