رەسەيدىڭ كراسنويار قالالىق كەڭەسىنىڭ دەپۋتاتى كونستانتين سەنچەنكو شەشەن رەسپۋبليكاسىنىڭ باسشىسى رامزان قادىروۆتى جۇيەگە قارسى پوپپوزيسيا تۋرالى ايتقان پىكىرى ءۇشىن جەردەن الىپ جەرگە سالدى، - دەپ حابارلايدى «قامشى» پورتالى.
كونستانتين سەنچەنكو بۇل شۋلى پىكىرىن ءوزىنىڭ فەيسبۋك الەۋمەتتىك جەلىسىندەگى پاراقشاسىندا جاريالاعان. ەستەرىڭىزدە بولسا، شەشەن رەسپۋبليكاسىنىڭ باسشىسى بۇعان دەيىن رەسەيدەگى وپپوزيسيالىق كۇشتەردى ىرىتكى سالۋ ارەكەتتەرى ءۇشىن جازالاپ، وزدەرىن «رەسەي جاۋى ءارى ساتقىندارى» دەپ جاريالاۋعا شاقىرعان بولاتىن.
جاعىمپاز قادىروۆتىڭ بۇل مالىمدەمەسىن رەسەيلىك دەپۋتات وزىنە تىكەلەي قاتىسى بار دەپ قابىلداعان. ونى ول ءوزىنىڭ ساياساتپەن اينالىساتىنىن ءارى ەشبىر ساياسي پارتيا قۇرامىنا كىرمەيتىنىمەن تۇسىندىرەدى.
«مەن بۇل اكادەميك ءھام باتىرعا مىنانى ايتقىم كەلەدى. رامزان، سەن رەسەيدى قارابەت قىلدىڭ. سەن اكادەميك اتاعىن ءوزىڭنىڭ ءۇش كلاستىق بىلىمىڭمەن جەر قىلدىڭ. سەن رەسەيدىڭ ۇلى ويشىلدارىنا عانا بۇيىرعان اتاقتى يەلەنىپ ءجۇرسىڭ. سەن «رەسەي باتىرى» اتاعىن دا جەر قىلدىڭ. كراسنويارسكىدە ءبىز كوپ بولىپ، شەشەنستاندا سوعىسىپ جۇرگەن جىگىتتەرىمىزگە كومەك جيناعان كەزدەردى ۇمىتقان جوقپىن. سەن ول كەزدە تاۋدا ءبىزدىڭ جىگىتتەردى ءولتىرىپ ءجۇردىڭ»، - دەيدى ول ءوز جاۋابىندا.
كراسنويارلىق دەپۋتات سونداي-اق، ر. قادىروۆتىڭ باسقارۋشىلىق جۇمىسىن دا سىنعا الادى. ونىڭ ايتۋىنشا، ر. قادىروۆ قانشاما بيۋدجەت قىزمەتكەرلەرىنىڭ ەڭبەكاقىلارىن جەكە قورىنا اۋدارىپ، سول قاراجاتقا وزىنە ءزاۋلىم سارايلار سالعىزعان.
ك. سەنچەنكو شەشەن باسشىسىن سىناعان پوستىن «سوندىقتان دا، اكادەميك-باتىر، اۋلاق ءجۇر. ادال، ەڭبەكقور، ەسى دۇرىس ادامداردىڭ سۇيىكتى وتانى رەسەيدى گۇلدەندىرۋ جولىنداعى جۇمىسىنا كەدەرگى كەلتىرمە!» دەگەن سوزدەرمەن اياقتايدى.
دەپۋتاتتىڭ بۇل مالىمدەمەسى رەسەيلىكتەر اراسىندا قىزۋ تالقىلانۋدا. ءتىپتى، كەي ازاماتتار ك. سەنچەنكونىڭ ومىرىنە الاڭداۋشىلىق بىلدىرۋدە. ر. قادىروۆتىڭ ءوزى بولسا ەشبىر الەۋمەتتىك جەلىدە بۇل مالىمدەمەگە جاۋاپ قاتقان جوق.
