الماتىدا №65 باعىتىنداعى شامامەن 10 اۆتوبۋستىڭ جۇرگىزۋشىلەرى اباي داڭعىلىنىڭ ماناس پەن اۋەزوۆ كوشەلەرىنىڭ قيىلىسى ارالىعىندا ەكى باعىتتا تۇرىپ الىپ، ەرەۋىلگە شىقتى. ولار وسىلايشا "وڭاي" جۇيەسىنە قارسىلىق ءبىلدىردى، - دەپ حابارلايدى «قامشى» پورتالى Tengrinews.kz – كە سىلتەمە جاساپ. 

"الماتى ترانسپورت حولدينگى" باسپا ءسوز قىزمەتىنىڭ مالىمەتىنشە، قالالىق ءىىد بۇل ماسەلەنى شەشىپ ۇلگەرگەن. "مۇنى ەرەۋىل دەۋگە بولمايدى. بۇگىن №65 باعىتىنداعى اۆتوبۋس جۇرگىزۋشىلەرىنىڭ بىرىنە ايىپپۇل سالىندى. جۇرگىزۋشىلەر وسىعان نارازىلىق تانىتقان"، - دەدى باسپا ءسوز قىزمەتى وكىلدەرى. ولار جۇرگىزۋشىگە قولما-قول اقشا العانى ءۇشىن ايىپپۇل سالىنعانىن ايتتى. ايتا كەتەيىك، 11 قاڭتاردان باستاپ الماتىداعى قوعامدىق كولىكتەردە بيلەت قۇنى تەك ەلەكتروندى تۇردە تولەنەدى.

باسپا ءسوز قىزمەتىنىڭ مالىمەتىنشە، 18 قاڭتاردان باستاپ الماتىداعى قوعامدىق كولىكتەردە قالالىق ءىىد قىزمەتكەرلەرىمەن بىرگە بيلەتسىز جۇرگەندەردى انىقتاۋ ءۇشىن رەيد جۇرگىزىلىپ جاتىر. ءبىرىنشى كۇننىڭ وزىندە 172 بيلەتسىز جولاۋشىعا اكىمشىلىك ايىپپۇل سالىنعان.