2016 جىلى ماجىلىستە ماقۇلدانىپ، پرەزيدەنتتىڭ قول قويۋىن كۇتىپ تۇرعان جول ءجۇرۋ ەرەجەسىنە قاتىستى ءبىرتالاي وزگەرتۋلەر بار، - دەپ حابارلايدى «قامشى» پورتالى «قازاقستان-زامان» گازەتىنە سىلتەمە جاساپ.

كۇشىنە ەنۋى مۇمكىن ماڭىزدى وزگەرتۋلەرگە كەلسەك، ولار مىناداي: ءبىرىنشىسى — جاڭا جىلدان باستاپ اۆتوجولاۋشىلار كولىكتەن پوليسەيدىڭ رۇقساتىنسىز شىعا الادى.

ەكىنشىسى — قازاقستاندىق ساقتاندىرۋ كومپانيالارىنا جول اپاتى بولعان جاعدايدا جول قىزمەتىنە تالاپتاردى قويۋ قۇقىعىن بەرۋى مۇمكىن.

ءۇشىنشىسى — كەي ايىپپۇلدار قاتايا تۇسەدى دەپ كۇتىلۋدە. ماسەلەن، مۇمكىندىگى شەكتەۋلى تۇلعالار ماس كۇيدە كولىك باسقارسا، جۇرگىزۋ قۇقىعىنان ايىرىلۋى مۇمكىن.

وزگەرتىلمەگەن زاڭعا سايكەس، مۇمكىندىگى شەكتەۋلى تۇلعالارعا تەك ايىپپۇل سالۋ قاراستىرىلعان. وپەراتيۆتى قىزمەت كولىكتەرىنە جول بەرمەگەندەر كوبىرەك ايىپپۇل تولەيتىن بولادى.

ءتورتىنشىسى — ەگەر جۇرگىزۋشى دابىلداتىپ كەلە جاتقان جەدەل نەمەسە ارنايى قىزمەت كولىگىنە جول بەرمەگەن بولسا، بۇرىنعىداي 7 ەمەس، 10 اەك كولەمىندە ايىپپۇل تولەيدى. ەگەر دابىلمەن كەلە جاتقان ارنايى بەلگىلەرى بار كولىكتى وتكىزبەسە، 30 اەك كولەمىندە ايىپپۇل تولەيدى (بۇگىندە 10 اەك). جىل ىشىندە ەرەجەنى قايتا بۇزاتىن بولسا، ايىپپۇل 15 اەك-تەن 50 اەك-كە دەيىن وسەدى.

بەسىنشىسى — الكوگولگە نەمەسە ەسىرتكىگە مەديسينالىق كۋالاندىرۋدان باس تارتقانداردىڭ جازاسى قاتايتىلادى. ماجىلىسمەندەر مۇنداي جاعدايدا جۇرگىزۋشىنى 2 جىلعا ەمەس، 3 جىلعا كولىك ايداۋ قۇقىعىنان ايىرۋدى ۇسىنۋدا.

التىنشىسى — تۇراق ەرەجەسىن بۇزۋعا قاراستىرىلعان ايىپپۇل ازايتىلادى. ماجىلىسمەندەر تۇراق ەرەجەسىن بۇزعاندارعا 10 اەك ەمەس، 3 اەك كولەمىندە ايىپپۇل سالعان جەتكىلىكتى دەپ سانايدى. ال مۇگەدەكتەرگە ارنالعان تۇراققا كولىگىن قويعاندار 50 اەك ورنىنا 5 اەك تولەۋ ماسەلەسى قاراستىرىلۋدا.

جەتىنشىسى — «ادەمى» مەملەكەتتىك نومىرلەر ءتىزىمىن كەڭەيتپەك. ەندى ووو، ZZZ سياقتى نومىرلەر جانە 717، 838 سياقتى اينالى نومىرلەر ساتىلادى. اينالى ءنومىر قۇنى 150 مىڭ تەڭگە، ال ادەمى ارىپتەرمەن بولسا، 300 مىڭ تەڭگە بولادى دەپ كۇتىلۋدە.

سەگىزىنشىسى — كولىكتى ءۇش ولشەمدى اەروگرافيامەن بەزەندىرۋگە تىيىم سالۋ.

توعىزىنشىسى — بىرنەشە رەت جول اپاتىنا تۇسكەندەرگە ساقتاندىرۋ قۇنى قىمباتتاتىلۋى مۇمكىن. بۇل ۇسىنىستى قازاقستاننىڭ قارجىگەرلەر قاۋىمداستىعى جاساعان.

ونىنشىسى — كىشىگىرىم جول اپاتىنا قۇجاتتاردى جول پوليسياسى ينسپەكتورلارىنسىز راسىمدەۋ مۇمكىندىگى. ەۋروپروتوكول دەپ اتالاتىن بۇل ادىستە جۇرگىزۋشىلەر وقىس جاعدايدى وزدەرى كۋالاندىرىپ، جولدا كەدەرگى بولۋدان تەزىرەك قۇتىلۋعا مۇمكىندىك الادى. راسىمدەلگەن قۇجاتپەن زارداپ شەگۋشى تاراپ ساقتاندىرۋشىدان تولەم تالاپ ەتە الادى دەپ كۇتىلۋدە.

ون ءبىرىنشىسى — ەلەكتروقوزعالتقىشتارى بار ۆەلوسيپەدتەردى زاڭداستىرۋ.

ون ەكىنشىسى — 1 جىلدان 3 جىلعا جىلعا دەيىنگى مەرزىمدەگى شەتەل كولىكتەرىن اكەلۋ ءۇشىن 50 اەك، ياعني 99 مىڭ تەڭگە مولشەرىندە تولەم جاساۋى ءتيىس بولادى. ال كولىك مەرزىمى 3 جىلدان اسقان بولسا، سالىق مولشەرى 500 اەك، ياعني 991 مىڭ تەڭگە بولماق. بۇگىندە قازاقستاندا 4 ملن. 400 مىڭ كولىك تىركەلگەن، ولاردىڭ جارتىسىنا 18 جىل تولعان.

ەڭ سوڭىندا بەكىتىلگەن نورماعا توقتالساق. قازاقستاننىڭ دەنساۋلىق ساقتاۋ جانە الەۋمەتتىك دامۋ ءمينيسترى 2015 جىلعى 4 قاراشاداعى №853 بۇيرىعىمەن كولىك باسقارۋعا تىيىم سالاتىن مەديسينالىق قارسى كورسەتىمدەر ءتىزىمىن بەكىتتى.

سونداي-اق، نازارلارىڭىزعا 2016 جىلعى جاڭا ايلىق ەسەپتىك كورسەتكىشپەن ەسەپتەگلگەن ايىپپۇلدار تىزبەسىن ۇسىنامىز.