الماتىدا №65 باعىتىنداعى اۆتوبۋستاردىڭ سەگىز جۇرگىزۋشىسى جۇمىستان شەتتەتىلدى، - دەپ حابارلايدى «قامشى» پورتالى Tengrinews.kz -كە سىلتەمە جاساپ.

"بۇل جۇرگىزۋشىلەر جۇمىستان شەتتەتىلدى، ءقازىر قىزمەتتىك تەرگەۋ جۇرگىزىلىپ جاتىر. تەرگەۋ ناتيجەسىنە بايلانىستى شارا قولدانىلادى. ولار جۇمىستان شىعارىلۋى مۇمكىن"، - دەگەن اۆتوپارك قىزمەتكەرلەرى.

كومپانيا وكىلدەرىنىڭ ايتۋىنشا، جانجال اۆتوبۋس جۇرگىزۋشىسى تاڭات مۇسايەۆ پەن "الماتى كولىك حولدينگى" ج ش س قىزمەتكەرى اراسىندا شىققان. "كەشە كولىك حولدينگىنىڭ قىزمەتكەرلەرى جۇرگىزۋشىنىڭ جولاۋشىلاردان اقشا العانىن انىقتاعان. بۇل وقيعاعا وسى جاعداي سەبەپ بولدى. حولدينگ قىزمەتكەرلەرى جۇرگىزۋشىنى اقشا جيناعانى ءۇشىن جاۋاپقا تارتۋ ماقساتىندا پوليسەيلەردى شاقىرادى. دەگەنمەن ءبىزدىڭ جۇرگىزۋشى كىنالى ەمەس ەكەنىن ايتىپ، قۇجاتتارىن كورسەتۋدەن باس تارتقان. وقيعا بولعان جەرگە جۇرگىزۋشىنى قولداۋ ءۇشىن 65-باعىتتاعى اۆتوبۋستاردىڭ باسقا دا جۇرگىزۋشىلەرى كەلدى. ولار اباي كوشەسى بويىندا تۇرىپ الىپ، ەلەكتروندى بيلەت جۇيەسىنە نارازىلىق تانىتتى"، - دەيدى كومپانيا وكىلدەرى.

ەستەرىڭىزگە سالساق، كەشە №65 باعىتتا قاتىنايتىن اۆتوبۋس جۇرگىزۋشىلەرى الماتى قالاسىندا ەرەۋىلگە شىققان بولاتىن.