ءال-فارابي اتىنداعى قازاق ۇلتتىق ۋنيۆەرسيتەتىندە ءداستۇرلى 46-شى عىلىمي-ادىستەمەلىك كونفەرەنسيا مەن وقۋ-ادىستەمەلىك بىرلەستىگىنىڭ وتىرىسى ءوتتى. كونفەرەنسيادا جەرگىلىكتى جوو وكىلدەرى ونەركاسىپ سەكتورلارىنىڭ ساراپشىلارىمەن مامان دايىنداۋ جۇيەسىنە بايلانىستى ق ر «ءبىلىم تۋرالى» زاڭىنا ەنگەن ءبىرقاتار وزگەرىستەردى تالقىلادى، - دەپ حابارلايدى «قامشى» پورتالى ۋنيۆەرسيتەت باسپا ءسوز قىزمەتىنە سىلتەمە جاساپ.
كونفەرەنسيادا كادر دايىنداۋ ساپاسىن قامتاماسىز ەتۋ ءۇشىن ءبىلىم بەرۋ باعدارلامالارىن جاڭعىرتۋ ماسەلەلەرى، يننوۆاسيالىق وقىتۋ: تەحنولوگيالارى مەن ادىستەرى ءسوز بولدى. ق ر ءبىلىم جانە عىلىم مينيسترلىگىنىڭ جوعارى وقۋ ورنىنان كەيىنگى ءبىلىم بەرۋ مەن حالىقارالىق ىنتىماقتاستىق دەپارتامەنت ديرەكتورى سەرىك ومىربايەۆ ءوزىنىڭ بايانداماسىندا ق ر ءبىلىم جانە عىلىم مينيسترلىگى قابىلداعان ءبىرقاتار وزگەرىستەرگە باسا نازار اۋداردى. اتاپ ايتقاندا، جوو وقۋ جوسپارىن وزدەرى انىقتاۋعا، ديپلومدىق جۇمىس پەن مەملەكەتتىك ەمتيحاندار اراسىندا تاڭداۋ جاساۋعا مۇمكىندىك الادى. «وسىلايشا، جوو قورىتىندى اتتەستاسيا ءتۇرىن وزدەرى تاڭدايتىن بولادى»، - دەدى سەرىك ومىربايەۆ. دوكتورانتۋراعا دا وزگەرىستەر ەندى. ەندى PhD دارەجەسى جۇمىس بەرۋشىنىڭ نەمەسە باسقا دا ينۆەستيسيالاردىڭ ەسەبىنەن، ياعني جەكە باستامالارمەن دە بىلىكتىلىكتى ارتتىرۋعا بولادى. «قۇرىلىمنىڭ تەوريالىق جاعى 20%-عا ازايىپ، عىلىمي-زەرتتەۋ جۇمىسى 85 كرەديتكە دەيىن ارتادى»، - دەپ ساراپشى عىلىمعا كوبىرەك كوڭىل بولىنەتىنىن ايتتى.
قالىپتاسىپ جاتقان كاسىبي ستاندارتتار جۇيەسى قىزمەتكەرلەردىڭ بىلىكتىلىگىن راستاۋ ءۇشىن كاسىبي ەمتيحان ەنگىزەدى. بۇل مەحانيزم تاۋەلسىز سەرتيفيكاتتاۋ ورتالىقتارىنىڭ جەلىسىن قالىپتاستىرۋ ارقىلى جۇزەگە اسادى. بەلگىلى ورتالىقتا بەرىلگەن باعا جۇمىسقا ۇمىتكەرلەردىڭ كاسىبي قابىلەتىن دالەلدەيتىن قۇجات رەتىندە جۇرەدى. جاڭاشىل ۇدەرىستى رەتتەۋگە رەسپۋبليكالىق كوميسسيا قۇرۋ ماسەلەسى دە كوتەرىلگەندىگىن ايتا كەتۋ كەرەك.
«اتامەكەن» ق ر ۇلتتىق كاسىپكەرلەر پالاتاسىنىڭ ساراپشىسى مارات يسابەكوۆ «كاسىبي كارتوچكالاردىڭ» تيىمدىلىگى تۋرالى بايانداما جاسادى. «كاسىبي كارتوچكا» مامان دايىندايتىن جوو مەن سوعان ماماندانعان سالا قىزمەتكەرلەرى دايىنداعان كاسيبي ستاندارتتار جيىنتىعى. «Kazenergy» مۇناي-گاز جانە ەنەرگەتيكا كەشەنىنىڭ ادامي كاپيتالدى دامىتۋ دەپارتامەنتى ديرەكتورى لياززات احمۋرزينا ءبىلىم بەرۋ باعدارلامالارىنىڭ وزەكتىلىگىن مۇناي-گاز سەكتورى قاجەتتىلىكتەرىنە ساي قولداۋ مەن اكادەميالىق ءۇردىستى ناقتى ءوندىرىس وشاعىمەن تىعىز قارىم-قاتىناس ورناتۋدى ۇسىندى.
«ەگەر، ءبىر ماماندىق بىرنەشە سالادا قاتار پايدالانىلاتىن بولسا، ماسەلەن، بۇرعىلاۋ جانە بارلاۋ جۇمىستارى، وندا ماماندىقتاردىڭ سانىن جاساندى تۇردە كوبەيتپەۋ ءۇشىن قىزمەتتىڭ بۇل ءتۇرىن ءبىر عانا ماماندىققا تيەسىلى دەپ ەسەپتەۋ كەرەك. «Kazenergy» ساراپشىلارىنىڭ ماماندىقتى جىكتەۋگە بايلانىستى جۇرگىزگەن اناليز قورىتىندىسى بويىنشا جۇمىسشىلاردىڭ قىزمەتى مەن كاسىبىنىڭ 45 جاڭا ءتۇرى انىقتالدى»،- دەيدى لياززات احمۋرزينا
اۋە وپەراسيالارىنىڭ قاۋىپسىزدىگىنە الاڭداعان ءال-فارابي اتىنداعى قازۇۋ گەوگرافيا جانە تابيعاتتى پايدالانۋ فاكۋلتەتىنىڭ دەكانى ۆيتاليي سالنيكوۆ ازاماتتىق اۆياسيا كوميتەتىمەن بىرلەسىپ اۆياسيالىق مەتەورولوگيالىق ستاندارتتاردى اياقتاۋ كەرەكتىگىن ايتتى.
كونفەرەنسيا قورىتىندىسىنا نەگىزدەلىپ، ءبىلىم بەرۋ باعدارلامالارىن جاڭعىرتۋ، اككرەديتاسيا جانە كادرلار دايىنداۋ ساپاسىنىڭ كەپىلىن قالىپتاستىرۋ مەن ءبىلىم بەرۋ قىزمەتىنىڭ ساپاسىن ارتتىرۋ ءۇشىن قازۇۋ-عا كەلەسىدەي مىندەتتەر قويىلدى:
- كاسىبي قاۋىمداستىقپەن بىرگە ءبىلىم بەرۋ باعدارلامالارىنىڭ ساپاسىن كەلەسى باعىتتار بويىنشا انىقتاۋ: قۇزىرەتتىلىك، كۇتىلەتىن ناتيجەلەر، وقۋ كۋرستارىنىڭ مازمۇنى، وقىتۋ ادىستەرى، باعالاۋ ادىستەرى، ءبىلىم الۋشىلاردىڭ عىلىمي قىزمەتى، كادرلىق قۇرام، جۇمىسقا ورنالاسۋ مۇمكىندىكتەرى؛
- ءبىلىم بەرۋ باعدارلامالارىن سەرتيفيكاتتاۋ تەتىگىن كاسىبي قاۋىمداستىقتارمەن جانە بىرلەستىكتەرمەن بىرىگىپ ازىرلەۋ؛
- ءبىلىم بەرۋ باعدارلامالارىنا سىرتقى ساراپتاۋدى ۇيىمداستىرۋ؛
- ءبىلىم بەرۋ باعدارلامالارىن قالىپتاستىرۋ مەن باقىلاۋ بارىسىندا اككرەديتتەۋ اگەنتتىكتەرىنىڭ ەسكەرتۋلەرىن ەسەپكە الۋ مەحانيزمىن ازىرلەۋ؛
- فاكۋلتەتتىڭ ءبىلىم بەرۋ ۇدەرىسىندە ستۋدەنتكە باعىتتالعان وكىلدىك تالداۋ ۇيىمداستىرۋ؛
- تاجىريبە الماسۋ مەن بىلىكتىلىكتى ارتتىرۋ ماقساتىندا جەتەكشى وقىتۋشى-پروفەسسورلار قۇرامىن شاقىرۋ ارقىلى ۋنيۆەرسيتەتتىڭ وقىتۋشى-پروفەسسورلىق قۇرامىنا وقىتۋ سەمينارلارىن وتكىزۋ؛
- ءپاننىڭ جانە ماماندىقتىڭ ەرەكشەلىكتەرىن ەسكەرە وتىرىپ، وقۋ ناتيجەسىندە كۇتىلەتىن باعالاۋ فورماسىن جاساۋعا ادىستەمەلىك نۇسقاۋلىق ازىرلەۋ؛
- كاسىپورىن اسسوسياسيالارىمەن جانە «اتامەكەن» ق ر ۇكپ-مەن بىرلەسىپ، ءار ماماندىققا ساي كاسىبي ستاندارتتاردى دايىنداۋعا باستاماشىلىق جاساۋ.
وتىرىس سوڭىندا قابىلدانعان شەشىمدەر ءبىلىم مەن عىلىمنىڭ دامۋىندا ستراتەگيالىق ماقساتقا قول جەتكىزۋگە كومەكتەسەتىن بولادى(كومەكشى قۇرال بولادى).
وزەكتى ماسەلەلەردى تالقىلاۋعا 500-دەن اسا وقىتۋشى-پروفەسسورلىق قۇرام، ق ر ءبىلىم جانە عىلىم مينيسترلىگى، «عىلىم ورداسى» مەن ق ر ۇلتتىق كاسىپكەرلەر پالاتاسى وكىلدەرى قاتىستى.
