ق ر پرەمەر-ءمينيسترىنىڭ ورىنباسارى د. ن. نازاربايەۆا ءال-فارابي اتىنداعى قازاق ۇلتتىق ۋنيۆەرسيتەتىنە ارنايى ساپارمەن كەلىپ، ونىڭ ينفراقۇرىلىمىمەن تانىسىپ، جوعارى وقۋ ورنىنىڭ بەلسەندى ستۋدەنتتەرىمەن كەزدەستى. ساپار بارىسىندا قازاقستان رەسپۋبليكاسىنداعى عىلىم مەن ءبىلىم سالاسىنىڭ دامۋى مەن باسەكەگە قابىلەتتىلىگىن ارتتىرۋ ماسەلەلەرى تالقىلاندى، - دەپ حابارلايدى «قامشى» پورتالى ۋنيۆەرسيتەت باسپا ءسوز قىزمەتىنە سىلتەمە جاساپ.

ۆيسە-پرەمەر ءال-فارابي مۇراجايىن، ۋنيۆەرسيتەتتىڭ عىلىمي كىتاپحاناسىن جانە وندىرىسكە ەنگىزۋگە دايىن عىلىمي جوبالار قامتىلعان قازۇۋ-دىڭ جەتىستىكتەر كورمەسىن ارالادى.

داريعا نازاربايەۆا يننوۆاسيالىق نىساندارمەن تانىسىپ بولعاننان كەيىن: «ءال-فارابي اتىنداعى قازاق ۇلتتىق ۋنيۆەرسيتەتى – بۇل قازاقستانداعى نومەر ءبىرىنشى ۋنيۆەرسيتەت جانە ءبىزدىڭ ۇلتتىق ماقتانىشىمىز»،- دەپ اتاپ ءوتتى. «بۇگىن ءبىز ۇكىمەتتە 2016-2019 جىلدارعا ارنالعان ءبىلىم مەن عىلىم دامۋىنىڭ مەملەكەتتىك باعدارلاماسىن تالقىلاۋدامىز. وسى ورايدا سىزدەر قانداي نەگىزگى ماسەلەلەردى اتاپ ايتار ەدىڭىزدەر جانە مەملەكەتتىك باعدارلاما دايىنداۋدا نەگە باسىمدىلىق بەرۋ كەرەك؟» – دەدى ۆيسە-پرەمەر.

اڭگىمە بارىسىندا ءبىلىم بەرۋ باعدارلامالارىن تاۋەلسىز حالىقارالىق اككرەديتاسيالاۋ مەن مامانداردى سەرتيفيكاتتاۋ، سونىمەن قاتار جوو قاۋىمداستىعىنىڭ كاسىبي ستاندارتتار مەن مەكتەپ وقۋلىقتارىن دايىنداۋعا قاتىسۋ ماسەلەلەرى ءسوز بولدى. قازۇۋ رەكتورى عالىم مۇتانوۆ ءوز سوزىندە قازاقستانداعى جوعارى ءبىلىمنىڭ ەكسپورتتىق الەۋەتى مەن باسەكەگە قابىلەتتىلىگىن ارتتىرۋ، ۋنيۆەرسيتەتتەردى نارىقتىق ەكونوميكانىڭ ناقتى سۋبەكتىسىنە اينالدىرۋ مەن ءعىلىم-بىلىم-وندىرىس مودەلىنىڭ بىرىگۋ ماسەلەلەرىن كوتەردى. سوندىقتان، نازاربايەۆ ۋنيۆەرسيتەتى تاجىريبەسى نەگىزىندە ەلدەگى جەتەكشى ۋنيۆەرسيتەتتەردى حالىقارالىق دەڭگەيدەگى زەرتتەۋ ۋنيۆەرسيتەتىنە اينالدىرۋ ءۇشىن ارنايى باعدارلاما ازىرلەپ، ونى جۇزەگە اسىرۋ كەرەك، - دەدى قازۇۋ رەكتورى ع.مۇتانوۆ.

قازاقستان پرەمەر-مينيسترىنىڭ ورىنباسارى «ءبىر تەرەزە» قاعيداسى بويىنشا جۇمىس جاسايتىن «كەرەمەت» ستۋدەنتتەرگە قىزمەت كورسەتۋ ورتالىعىنىڭ قىزمەتىمەن تانىستى.  قازۇۋ-عا ەنگىزىلىپ جاتقان بۇل مودەل ستۋدەنتتەردىڭ جايلى تۇرمىس جاعدايىن قامتاماسىز ەتۋدى ماقسات ەتكەن قازاقستاندىق جوعارى وقۋ ورىندارىنا ۇلگى.

وڭتۇستىك كورەياداعى ۇزدىك ۋنيۆەرسيتەتتەردىڭ ۇشتىگىنە كىرەتىن، ازيا مەن الەمنىڭ جەتەكشى جوعارى وقۋ ورىندارىنىڭ ءبىرى سەۋل ۇلتتىق ۋنيۆەرسيتەتىمەن جانە ونسە ۋنيۆەرسيتەتىمەن جاسالعان جەمىستى ارىپتەستىك نەگىزىندە اشىلعان دياگنوستيكالىق ورتالىققا قوناقتار ەرەكشە قىزىعۋشىلىق تانىتتى. دياگنوستيكالىق ورتالىق الدىڭعى قاتارلى وندىرۋشىلەردىڭ سوڭعى مەديسينالىق جابدىقتارىمەن جابدىقتالعان. مۇندا «كانگنام سيەۆەرانس» كلينيكاسى دياگنوز انىقتاۋ مەن جەتەكشى ماماندارىنىڭ قاتىسۋىمەن تەلەمەديسينا تەحنولوگياسىن پايدالانۋ ارقىلى ناۋقاستارعا قاشىقتىقتان كەڭەس بەرۋ جۇيەلەرى ەنگىزىلگەن. دياگنوستيكالىق ورتالىقپەن قاتار اشىلعان قوعامدىق دەنساۋلىق ساقتاۋ جوعارى مەكتەبى الەمدىك تاجىريبەگە سۇيەنە وتىرىپ قۇرىلعان قازۇۋمەديكو-بيولوگيالىق كلاستەرىنىڭ نەگىزگى قۇرامداس بولىگى.

كەزدەسۋ سوڭىندا پرەمەر-مينيستردىڭ ورىنباسارى ءبىلىم بەرۋ جانە عىلىمي باعدارلامالاردى ارى قاراي دامىتۋ ءۇشىن ءبىرقاتار تاپسىرمالار بەرىپ، وتاندىق جوعارى وقۋ ورىندارىن جوعارى جانە جوو-نان كەيىنگى ءبىلىم بەرۋ سالاسىنا بيزنەستى بەلسەندى تارتۋعا شاقىردى.