كەشە پراۆوسلاۆ الەمى اتاپ وتكەن «شوقىنۋ مەيرامىندا» قازاقتار دا قاراپ جاتپاپتى. تۇنگى ساعات 12:00-دەن باستاپ كەلەسى كۇنگى ءتۇن ورتاسىنا دەيىن شومىلۋ مەرەكەسىن استانالىقتار دا ەرەكشە ىقىلاسپەن قارسى الدى، - دەپ حابارلايدى NUR.KZ.
شوقىنۋ مەرەكەسىندە شومىلۋعا كەلگەندەردىڭ ءدىني سەنىمدەرى دە ءارتۇرلى بولدى. الايدا، بۇل كۇنى حريستيانداردىڭ دا، مۇسىلمانداردىڭ شومىلاتىنى استانالىقتار ءۇشىن تاڭسىق ەمەس. شوقىنۋ كۇنى قاتتى ايازعا قاراماستان ەسىلدە شومىلعان ادامداردىڭ سانىندا شەك بولعان جوق. كەيبىرەۋلەرى قاسيەتتى سۋدى الۋعا كەلسە، ەندى بىرەۋلەرى مۇزداي سۋعا تۇسۋدەن باس تارتقان جوق.
ەسىلدە شومىلىپ جۇرگەن قازاقتاردىڭ سانى ءتىپتى ورىس، ۋكراين جانە وزگە دە سلاۆيان تەكتەس ۇلت وكىلدەرىنىڭ سانىنان الدەقايدا اسىپ ءتۇستى.
“ءسىز نەلىكتەن شومىلۋعا كەلدىڭىز” دەگەن سۇراققا اركىم ءارتۇرلى جاۋاپ قاتتى. ءبىرى “ءبىزدىڭ قۇدايىمىز ءبىر، مەن دىنگە بولمەيمىن” دەسە، ەندى ءبىرى “مەنىڭ ورىس دوستارىم كوپ، سوندىقتان، ولاردى قولداۋعا كەلدىم” دەپ جاۋاپ بەردى.
“بۇل دەنساۋلىققا پايدالى، سول ءۇشىن شومىلعىم كەلدى”، “مەن ءبىرىنشى رەت كەلدىم. مەنىڭ مۇسىلمان بولعانىمدا تۇرعان نە بار؟ بۇل دەنساۋلىققا پايدالى” دەپ جاۋاپ قايتارعاندار دا بار كورىنەدى.
جەرگىلىكتى بيلىك ءدىني ءراسىمدى وتكىزۋگە دە بار جاعدايدى جاساپ باققان. اتالعان ءراسىمدى وتكىزۋ ءۇشىن پالاتكالار تىگىلگەن قالاشىق پايدا بولدى. مۇز سۋاتىنا باراتىن اعاش ساتىلار دايىندالىپ، كيىم اۋىستىراتىن پالاتكالارعا اپاراتىن جولدار دا اعاشتان جاسالدى. بۇل كۇنى قۇتقارۋشىلار مەن جەدەل جاردەم وكىلدەرى دە قاراۋىلدا بولدى.
