«ارىستان» مامانداندىرىلعان ليسەيىندە ۇلاندىق قاھارمان، ىىى-دارەجەلى «ايبىن» وردەنىنىڭ يەگەرى لەيتەنانت جاندوس بايانبايەۆپەن كەزدەسۋ كەشى ءوتتى، - دەپ حابارلايدى «قامشى» پورتالى ۇلتتىق ۇلان «وڭتۇستىك» وڭىرلىك قولباسشىلىعى باسپا ءسوز قىزمەتىنە سىلتەمە جاساپ.
كەزدەسۋ بارىسىندا جاندوس بايانبايەۆ ليسەي وقۋشىلارىنا ءوزىنىڭ وتكەن ءومىرى جايلى اڭگىمەلەپ، جاۋىنگەرلىك قىزمەت كەزىندەگى جاساعان ەرلىگىنە توقتالدى. اۋىر جاراقات الۋىنا قاراماستان، سوتتالعاننىڭ قاشىپ كەتۋىنە جول بەرمەگەندىگى تۋرالى ەستەلىك ەرلىك اڭگىمەسى ليسەي وقۋشىلارىنىڭ جۇرەكتەرىنە رۋح سىيلاعانداي بولدى. سونىمەن قاتار كەش بارىسىندا ءسوز العان ۇلتتىق ۇلان ارداگەرلەرى گەنناديي فالەيەۆ پەن يكرام مامەدوۆ وقۋشىلارعا ۇلتتىق ۇلاننىڭ جاۋىنگەرلىك تاريحى تۋرالى سىر شەرتىپ، ۇلتتىق پاتريوتتىق تاربيەمەن قوسا ەرلىك جايلى وسيەتتەرىن بايانداپ بەردى. سونىمەن قاتار قازاقستان رەسپۋبليكاسى ۇلتتىق ۇلانىنىڭ تاريحىنا توقتالىپ، قوعامدىق ءتارتىپ، اسا ءقاۋىپتى قىلمىسكەرلەردى قۇرىقتاۋ سەكىلدى ۇلاندىقتاردىڭ بۇگىنگى مىندەتتەرىن تىلگە تيەك ەتتى.
ەرلىك جايلى اڭگىمە وقۋشىلارعا ەرەكشە اسەر بەرىپ، ولار كەش قوناقتارىن ۇيىپ تىڭدادى، سوڭىنان وزدەرىنىڭ سۇراقتارىن دا قويىپ جاتتى.
وسىنداي ادەمى كەش بارىسى ۇلتتىق ۇلان باتىرى جاندوس بايانبايەۆ تۋرالى تۇسىرىلگەن بەينەفيلمدى كورۋمەن جالعاسىپ، ارتىنان ۇلتتىق ۇلان وركەسترىنىڭ كونسەرتتىك باعدارلاماسىنا ۇلاستى.
ءىس-شارا سوڭىندا ۇلاندىق وكىلدەر «ارىستان» ماماندىرىلعان ليسەي وقۋشىلارىن بولاشاقتا ۇلاندىقتاردىڭ قاتارىن تولىقتىرۋعا شاقىرىپ، ۇلتتىق ۇلاننىڭ اسكەري-جاۋىنگەرلىك ارەكەتى بەينەلەنگەن بەينەتاسپانى، سونداي-اق، ۇلاندىقتاردىڭ ءتول باسىلىمى «قالقان» گازەتى مەن «بۇركىت» جۋرنالىن ارنايى سىيعا تارتتى.
- بۇگىنگى كەزدەسۋدەن ۇلكەن اسەر الدىم. «ارىستان» ماماندىرىلعان ليسەيىنىڭ ماتەريالدىق – تەحنيكالىق بازاسى، وقىتۋشى قۇرامى جوعارى دەڭگەيدە ەكەن. ەڭ باستىسى مۇندا العىر دا بىلىكتى، تالانتتى وقۋشىلار ءبىلىم الىپ جاتىر. وسىلاردىڭ قاتارىنان بولاشاق قاھارماندار شىعادى دەگەن سەنىمدەمىن،- دەپ شارا سوڭىندا جاندوس قاماردين ۇلى ءوز ويىمەن دە ءبولىستى.
ايتا كەتەيىك، 2014 جىلعى 5 جەلتوقساندا «الماتى-سەمەي» باعىتىندا سوتتالعانداردى جوسپارلى تەمىر جول قاراۋىلىمەن تاسىمالداۋ بارىسىندا قاراۋىل جەكە قۇرامى اسا اۋىر قىلمىستار ءۇشىن سوتتالعان ازاماتتىڭ قارۋلى شابۋىل ارقىلى كۇزەتتەن قاشىپ شىعۋ ارەكەتىن تويتاردى. قاراۋىل باستىعىنىڭ كومەكشىسى جاندوس بايانبايەۆ پەن ساقشى نۇراسىل مۇباراكوۆ وزدەرىنىڭ وتتى قارۋدان جاراقات العاندارىنا، ومىرلەرىنە تونگەن ناقتى قاۋىپكە قاراماستان جاۋىنگەرلىك قىزمەتىن جانقيارلىقپەن ورىنداپ، ارام پيعىلدى قىلمىسكەردىڭ ءوز ويىن جۇزەگە اسىرۋىنا جول بەرمەدى.
كورسەتكەن ەرەن ەرلىكتەرى ءۇشىن قازاقستان رەسپۋبليكاسىنىڭ پرەزيدەنتى – قارۋلى كۇشتەردىڭ جوعارعى باس قولباسشىسى نۇرسۇلتان نازاربايەۆ ءوز جارلىعىمەن 7552 اسكەري ءبولىمى قاراۋىل باستىعىنىڭ كومەكشىسى جاندوس بايانبايەۆتى ىىى-دارەجەلى «ايبىن» وردەنىمەن، ال ساقشى نۇراسىل مۇباراكوۆتى «جاۋىنگەرلىك ەرلىگى ءۇشىن» مەدالىمەن ناگرادتاعان بولاتىن.
