قازاقستان پرەزيدەنتى نۇرسۇلتان نازاربايەۆ، بەلارۋس پرەزيدەنتى الەكساندر لۋكاشەنكو تەلەفون ارقىلى رەسەي پرەزيدەنتى ۆلاديمير پۋتينمەن سويلەسىپ، ۋكرايناداعى جاعدايدى تالقىلادى. بۇل تۋرالى كەشە تۇندە كرەملدىڭ باسپا ءسوز قىزمەتى حابارلادى. "ۋكرايناداعى داعدارىس، اسىرەسە ەلدىڭ شىعىس ايماقتارى مەن قىرىمداعى ءورىستىلدى تۇرعىنداردىڭ زاڭدى مۇددەلەرى مەن ومىرلەرىنە ءقاۋىپ توندىرەتىن جاعداي تالقىلاندى. قوعامدىق-ساياسي احۋالدىڭ شيەلەنىسۋى ەۋرازيا جوعارعى ەكونوميكالىق كەڭەسىنە مۇشە ەلدەردىڭ ونىڭ ەكونوميكالىق جانە گۋمانيتارلىق سالدارلارىنا الاڭداۋشىلىعىن تۋعىزادى. مەملەكەت باسشىلارى تىعىز بايلانىستا بولۋعا ۋاعدالاستى" دەلىنگەن كرەمل تاراتقان حابارلامادا. كەشە قازاقستاننىڭ سىرتقى ىستەر مينيسترلىگى ۋكرايناداعى جاعدايدى كەلىسسوزدەر ارقىلى شەشۋگە شاقىراتىن مالىمدەمە جاساعان. قازاقستان "شيەلەنىستىڭ ودان ءارى ءوربۋى ايماقتىق، سونداي-اق جاھاندىق اۋقىمداعى كۇتپەگەن ناتيجەلەرگە الىپ كەلۋى مۇمكىن" ەكەنىن ايتىپ، بارلىق تاراپتاردى جاعدايدى رەتتەۋدە كۇش قولدانۋدان باس تارتۋعا جانە قالىپتاسقان ماسەلەنى كەلىسسوزدەر ارقىلى شەشۋ ماقساتىندا بارىنشا ساياسي كۇش-جىگەر تانىتۋعا شاقىرعان. "بۇل شەشىم حالىقارالىق قۇقىقتىڭ فۋندامەنتالدى قاعيداتتارىنا نەگىزدەلۋى ءتيىس" دەلىنگەن مالىمدەمەدە. 1 ناۋرىز كۇنى رەسەيدىڭ فەدەراسيي كەڭەسى ءبىراۋىزدان رەسەي قارۋلى كۇشتەرىن ۋكراينا تەرريتورياسىندا پايدالانۋ تۋرالى پۋتين ۇسىنىسىن قولدادى. رەسەي پرەزيدەنتى ۆلاديمير پۋتين فەدەراسيا كەڭەسىنەن "جاعداي تۇراقتانعانشا ۋكراينا تەرريتورياسىندا اسكەر پايدالانۋعا" رۇقسات سۇراعان ەدى. رەسەي پارلامەنتىنىڭ جوعارعى پالاتاسى - فەدەراسيا كەڭەسى سپيكەرى ۆالەنتينا ماتۆيەنكونىڭ ايتۋىنشا، قاۋلى قابىلدانعان مەزەتتەن باستاپ كۇشىنە ەنگەن. قازاقستان، بەلارۋس جانە رەسەي - كەدەن وداعىنا، ەۋرازيا جوعارعى ەكونوميكالىق كەڭەسىنە مۇشە ەلدەر.