قازاق ەستراداسىندا وزىندىك ەرەكشەلىگى بار دۋەتتەردىڭ ءبىرى «شام-شىراقتىڭ» انشىلەرى اسىلبەك ىسقاقوۆ پەن ۇلمەكەن بەگالييەۆامەن سۇحباتتاسۋىمىزدىڭ ءساتى تۇسكەن ەدى. نازارلارىڭىزدا ەكى ءانشىنىڭ سىرشىل اڭگىمەسىن ۇسىنامىز...
-سالەمەتسىزدەر مە؟ تالعامى بيىك، تاعىمى مول ونەر ايدىنىنا قالاي كەلدىڭىزدەر؟
ۇلمەكەن بەگالييەۆا: -بالا كەزىمىزدەن مەكتەپتەردە، توي–تومالاقتاردا ءان ايتىپ، ونەرگە جاقىن بولىپ وستىك. وسى تالابىمىز مۋزىكا ورتالىقتارىنا تۇسۋگە جەتەلەسە دە، ءبىراق جولىمىز بولماي تۇسە الماي قالدىق. كەيىن الماتىعا جول ءتۇسىپ، اسىلبەكپەن تانىسىپ، دۋەت بولىپ ءان ايتۋ تۋرالى شەشىمگە كەلدىك. ءسويتىپ، وزدەرىڭىزگە بەلگىلى «شام-شىراق» توبىمن قۇرىپ، ونەر ايدىنىنا بويلادىق. سول قادامىمىز قۇتتى بولىپ، كۇنى بۇگىنگە دەيىن ونەر ساحناسىندا ءان ايتىپ كەلەمىز.
اسىلبەك ىسقاقوۆ: -«جىگىتتىڭ جاقسىلىعى - ناعاشىدان» دەگەندەي، مەنىڭ ناعاشى جۇرتىم ونەرگە جاقىن ادامدار. ناعاشى اتام دا وتە مىقتى دومبىراشى جان ەدى. سول كىسى مەنى قاسىنان تاستاماي ىلەستىرىپ ءجۇرىپ،ونەرگە باۋلىدى،ءان ايتقىزدى. ونەرگە جاقىن بوپ ەرجەتۋىمە ناعاشى اتامنىڭ ىقپالى كوپ بولدى دەپ ويلايمىن. كەيىننەن العا ارمان جەتەلەپ، «ونەر ورداسى» دەپ الماتىعا كەلدىم. ءبىراز ۋاقىت بوس ءجۇردىم، مەيرامحانادا دا ءان ايتتىم. ال، مەنىڭ شوۋ بيزنەسكە كەلۋىم قىزىق بولدى. بىرەۋگە وتىرىك، بىرەۋگە شىن: مەن تۇسىمدە «مۋزارت» توبىن كوردىم. ءۇش كۇن قاتارىنان ساكەن مايعازين: «باۋىرىم، اسىلبەك، نە ىستەپ ءجۇرسىڭ، ساحناعا شىقپايسىڭ با؟»،-دەدى (كۇلدى). ءتۇسىم تۇرتكى بولدى ما، الدە ۋاقىتى كەلدى مە سودان باستاپ ءان جازۋدى باستادىم. جۇرت بىرنەشە ءان جازسا، مەن ءبىر-اق ءان جازىپ، انگە كليپ ءتۇسىردىم. جەكە ءانشى بولىپ ءان ايتىپ ءجۇردىم.
«شام-شىراق» توبىن قالاي قۇردىڭىزدار؟
اسىلبەك ىسقاقوۆ: -2012 جىلى قۇرىلدىق. كەزەكتى كونسەرتتەردىڭ بىرىندە ادەتتەگىدەي جالعىز ەمەس، ءبىر ءانشى قىزبەن شىعۋىم كەرەك بولدى. تاپسىرما سولاي بولدى. سويتسەم، سەرىكتەسىم وسى ۇلمەكەن ەكەن. ەكى كۇن ارپالىسىپ ءجۇرىپ ءان جازدىق. كونسەرتكە شىقتىق. حالىق جاقسى قابىلداعان سوڭ، ەكەۋمىزدە بىرلەسىپ جۇمىس ىستەۋ تۋرالى يدەيا تۋىندادى. جۇمىس ىستەۋگە كەلىستىك. ءبىراق، باس كەزىندە ۇلمەكەنگە اسا سەنە الماي ءجۇردىم. دۋەت قۇرارىن قۇرىپ الىپ، جالعاستىعى تۋرالى ويلانىپ ءجۇردىم. كۇندە كەزدەسىپ، اڭگىمەلەسىپ تۇردىق. جۇمىسىمىزدىڭ بارىسىندا ۇلمەكەننىڭ ءوزىن ونەرگە ارناعان تالانتتى قىز ەكەنىنە كوزىمدى جەتكىزدىم. سودان باستاپ دۋەت بوپ ءان ايتىپ كەلەمىز. ينشاللا، العان باعىتىمىز جامان ەمەس، بۇل كۇنگى جۇمىستارىمىزعا كوڭىلىم تولادى.
ء-ان ونەرى بەتالدى ادام ات باسىن بۇرا بەرمەيتىن ونەر عوي. وسى ونەرگە سىزدەردى جەتەلەگەن كىمدەر ەدى؟ ەلىكتەگەن انشىلەرىڭىز بار ما نەمەسە بولدى ما؟
اسىلبەك ىسقاقوۆ:-مەن ەشكىمگە ەلىكتەپ كەلگەن جوقپىن. «دۋەت قۇرعان سوڭ، سەندەر توقتار مەن بەيبىتتىڭ، بولماسا جانبولات پەن جازيرانىڭ جولىن قۋىپ جۇرسىڭدەر» دەگەندى بىرەۋلەر ايتادى. جوق! مەن قازاق ەستراداسى نەمەسە شەتەلدىك بولسىن ەشكىمگە ەلىكتەمەيمىن.
ۇلمەكەن بەگالييەۆا: -اركىمنىڭ ءوز ارمانى بار عوي. مۇمكىن، مەكتەپ كەزىندە، كىشكەنە كۇندە ونەردە جۇرگەن اپكەلەرىمىزگە ەلىكتەگەن شىعارمىن. ءبىراق، ءوزىمىز جەكە دۋەت بوپ شىعا باستاعاننان كەيىن، ەلىكتەۋ دەگەن نارسە ازايتىپ، ەرەكشەلەنۋ جاعى ويلاۋىمىز ارتا ءتۇستى. «باسقا توپتاردان، باسقا دۋەتتەردەن بولەكشە بولساق» دەگەن ويىمىز بار. سوندىقتان، ءبىزدىڭ دۋەتتى ەشقانداي توپقا، دۋەتكە ەلىكتەمەي، ءوز باعىتىمەن ايقىن دۋەت دەپ ايتۋعا بولادى.
ء-ان قورجىندارىڭىز ەسترادالىق اندەرگە تولى. بولاشاقتا حالىق اندەرىنە ويىسۋ ويلارىڭىز بار ما؟
اسىلبەك ىسقاقوۆ: -بۇل وتە جاقسى سۇراق ەكەن. الداعى ۋاقىتتا حالىق اندەرىن ورىندايمىز دەپ سىزگە ۋادە بەرە الام. ويتكەنى حالىق ءانى وتە كەرەك.
بۇل كۇندەگى وزدەرىڭىزگە دەگەن حالىقتىڭ ىقىلاسى قالاي؟
ۇلمەكەن بەگالييەۆا: -كەز-كەلگەن ءىستى باستاعان سوڭ، جاقسى جاعىن كورمەسەڭ، ءارى قاراي شابىتتانىپ جۇمىس جاساۋ مۇمكىن ەمەس دەپ ويلايمىن. ءبىز ساحنادا بولسىن، تويدا بولسىن ءان شىرقاعان كەزدە حالىقتىڭ ىقىلاسىنىڭ ەرەكشە ەكەندىگىن سەزىنەمىز. ەگەر حالىق تىڭداماي، ءانىمىزدىڭ ۇناماعانىن سەزىنسەك، وندا بۇل كۇندە دۋەت بوپ ءان ايتىپ جۇرمەس ەدىك. سوندىقتان، حالىقتىڭ جاقسى قولداۋىنىڭ ارقاسىندا شابىتتانىپ، قۇلشىنىپ جۇمىس ىستەپ كەلە جاتقان جايىمىز بار.
دۋەتتەرىڭىزدىڭ اتىن «شام-شىراق» دەپ نەگە قويدىڭىزدار؟ اتى دا ءبىر وزگەشەلىك تانىتىپ تۇرعانداي...
ۇلمەكەن بەگالييەۆا: - اسىلبەك ايتقانداي، بۇلاي دەپ اتاۋىمىز العاشقى كونسەرتتەن كەيىن «ەندى بىرىگىپ جۇمىس جاسايمىز با الدە جاسامايمىز با؟» دەگەن وي تۇرتكى بولدى. بىرىگىپ جۇمىس جاساۋعا كەلىسكەن سوڭ ، ارينە، دۋەتكە ات قويۋ كەرەك. نەشە ءتۇرلى اتاۋلار ويعا كەلدى. «تالپىنىس»، «اي-جۇلدىز» دەگەن يدەيالار بولدى. سوڭىندا وسى «شام-شىراق» دەگەن ەكى ۇعىمدى بىلدىرەتىن اتاۋعا تۇراقتادىق. شام جانە شىراق. دۋەتكە دە ساي كەلەدى دەپ ويلايمىن. شام مەن شىراق قاراڭعى جەرگە جارىق پەن جىلۋ بەرەتىن دۇنيە عوي. سول سياقتى ءبىز دە حالىققا انىمىزبەن جارىق، جىلۋ سىيلايتىن دۋەت بولساق دەگەن ارمان-نيەتپەن «شام-شىراق» دەپ قويدىق.
ء-قازىر ءوز ەڭبەكتەرىڭىز باعاسىن بەرە الاتىن كەزدەسىزدەر. اللاعا شۇكىر! ال، ەندى وسى دۋەتتى قۇرعان كەزدەگى ويلاعان ارماندارىڭىزعا جەتتىك دەپ ويلايسىزدار ما؟ كوزدەگەن ماقساتتارىڭىز...
اسىلبەك ىسقاقوۆ: - ءبىز ارمانىمىزعا جەتتىك دەپ ايتا المايمىز. ءبىراق، ءوزىمىزدى ءسال دە بولسا ءبىر باسپالداقتان اتتادىق دەپ سەزىنەمىز. ءالى دە كوپ جۇمىس ىستەۋ كەرەك. حيت بولساق دەپ ارماندامايمىز، ءوزىمىزدىڭ ورنىمىزدى قازاق ەستراداسىنان تاۋىپ الساق، سول دا جەتكىلىكتى. ەڭ الدى دا ەمەس، ەڭ ارتى دا ەمەس حالىق كوڭىلىندەگى قالاۋلى توپتاردىڭ ءبىر بولساق، اللاعا شۇكىر دەيمىز.
- قازىرگى كۇندە انشىلەردىڭ كوبى حالىقتىڭ ءان ونەرىن شوۋ-بيزنەسكە اينالدىرىپ جىبەردى، سىزدەر بۇعان قالاي قارايسىزدار؟
ۇلمەكەن بەگالييەۆا: -ەندى شوۋ-بيزنەسكە اينالدىرىپ جىبەردى دەگەندە، «بۇل ءبىر اقشا تابۋدىڭ جولى ما؟» دەپ ويلايمىن. ونەر ادامدارىنا ەشقانداي جاعداي جاسالماعان. ولاردا ەش جەردە تۇراقتى جۇمىس ورنى جوق. ولار ءان جازدىرادى، سونى تويدا ايتىپ ءناپاقاسىن تابادى. سوندىقتان، «شوۋ-بيزنەسكە اينالدىرىپ جىبەردى» دەۋ ءبىر جاعىنان دۇرىس ەمەس دەپ ويلايمىن. قازاقتىڭ قاي كەزدە دە تويسىز كۇنى جوق، ال انشىلەر وسى تويدا ءان ايتىپ، ءوز ەڭبەكتەرىمەن اقشا تاپقاندارىندا تۇرعان ەشتەڭە جوق. ءار ءبىر ءانشى بىر-ەكى ءان جازىپ الىپ، تەك تويدا ءان ايتىپ جۇرە بەرمەي، ساحناعا دا شىعىپ، ءوزىنىڭ شىعارماشىلىق جولىن قالىپتاستىرۋى كەرەك.
- التىن ۋاقىتتارىڭىزدى ءبولىپ، اڭگىمەلەسكەندەرىڭىزگە كوپ راحمەت. سىزدەرگە شىعارماشىلىق تابىس تىلەيمىز. حالىققا دەگەن ءبىر اۋىز تىلەكتەرىڭىز...
ۇلمەكەن بەگالييەۆا: - حالقىمىز امان، زامانىمىز تىنىش بولسىن! سابيلەرىمىز جىلاماسىن، ۇلكەندەرىمىز قايعىرماسىن!
اسىلبەك ىسقاقوۆ: - قازاقستانداعى بارلىق حالىق كۇلىپ-ويناپ جۇرە بەرسىن، جۇزىنەن كۇلكى كەتپەسىن!
اڭگىمەلەرىڭىزگە راحمەت!
سۇحباتتاسقان ءقۋانالى الماسبەك ۇلى
