قىتايداعى ىلە قازاق ايماعىندا بىرنەشە مىڭ اسىقتان ۇلكەن اسىق ءمۇسىنى قۇراستىرىلدى، - دەپ حابارلايدى «قامشى» پورتالى.

ۇلتتىق سپورت تۇرلەرىن كەڭىنەن تاراتۋ، دەڭگەيىن كوتەرۋ ماقساتىندا وڭىردە ءبىرقاتار وڭ ىستەر قولعا الىنۋدا. ىلە قازاق ايماعىنا قاراستى كۇنەس اۋدانىنىڭ №5 ورتا مەكتەبى ۇلتتىق ءداستۇر تاربيەسىن مەكتەپ باعدارلاماسىنا ەنگىزگەن ءبىلىم ورداسى. ونى تەك ساباق رەتىندە وقىپ قانا قويماي، ۇلت داستۇرلەرىن ۇرپاق ساناسىنا قۇيۋمەن ۇشتاستىرا بىلگەن. سونىڭ ءبىر مىسالى -  وقۋشىلار قولىمەن جاسالعان الىپ اسىق ءمۇسىنى.  ونى جاساۋ ءۇشىن كادىمگى اسىقتاردىڭ 10 مىڭعا جۋىق داناسىن جيناۋعا تۋرا كەلگەن. وسىنشا كوپ اسىقتان جاسالعان ءمۇسىننىڭ بيىكتىگى 2،6 مەتر، ەنى 90 سانتيمەتر، ۇزىندىعى 1،3 مەتر بولعان. ءمۇسىندى قول ونەرگە باۋليتىن مۇعالىمدەردىڭ كومەگىمەن 10 وقۋشى اقىلداسا وتىرىپ، جاساپ شىققان. بۇل جۇمىسقا وقۋشىلار 1 اي ۋاقىت ارناعان.

فورماسى كەلىستى، نىعىز دا ساپالى اسىق كوپتىڭ كوزايىمىنا اينالىپ، وڭ باعا يەلەندى. ودان دا قۋانىشتىسى، مەكتەپ باسشىلىعى عىلىمي تۇردە ءتىزىلىپ، شەبەر تۋىندىعا اينالعان اسىق ءمۇسىنىن گيننەستىڭ رەكوردتار كىتابىنا ەنگىزۋگە ۇسىنىپ وتىر. سوعان وراي، شانحاي گيننەس رەكوردتارىن باعالاۋ باس شتابىنا ءتيىستى قۇجاتتار جيناستىرىلىپ جاتىر.