ۇكىمەت باعدارلاماسىنا ساي وڭتۇستىكتەگى تۇرمىسى قيىن وڭىرلەر حالقىن ەلدىڭ سولتۇستىك وبلىستارىنا كوشىرۋ جۇمىستارى باستالىپ كەتتى، - دەپ حابارلايدى «قامشى» پورتالى ازاتتىققا سىلتەمە جاساپ.

ەلدىڭ وڭتۇستىكتىگىنەن سولتۇستىگىنە كوشكىسى كەلەتىن تۇرعىندار قونىس اۋدارۋدىڭ باستى سەبەبى رەتىندە جۇمىسسىزدىقتى ايتادى. جەرگىلىكتى بيلىك وكىلدەرىنىڭ سوزىنشە، بۇل ماسەلەنىڭ دەموگرافيالىق قىرى دا بار.

وڭتۇستىك قازاقستان وبلىسى قازىعۇرت اۋدانى قىزىلسەڭگىر اۋىلىنىڭ تۇرعىنى، ءۇش جىلدان بەرى تەمىرجولشى ماماندىعى بويىنشا جۇمىس تاپپاعان باتىرجان لەسبايەۆ سولتۇستىك قازاقستان وبلىسىنا كوشۋگە قامدانىپ ءجۇر.

 - بىزدە تۇراقتى جۇمىس جوق. ويتكەنى حالىق كوپ، تىعىز. ءار جەردى ءبىر جالدانىپ جۇمىس ىستەۋدەن شارشادىم. ۇيدەگى جەتى جان – اكە-شەشەم، ءىنىم، ايەلىم مەن ەكى بالام بار ءبارىمىز شەشەمنىڭ زەينەتاقىسىنا قاراپ وتىرمىز. تۇراقتى جۇمىس تاۋىپ بەرسە، جەردىڭ تۇبىنە بولسا دا بارامىز، – دەيدى باتىرجان لەسبايەۆ.

سولتۇستىكتىڭ اۋا رايى وڭتۇستىككە قاراعاندا سۋىق ەكەنىن ايتقان جىگىت «تۇراقتىلىق جوق بولسا، جىلى جەردە وتىرعان نەگە كەرەك» دەيدى.

«تۇپكى وي – دەموگرافيانى كوتەرۋ»

وڭتۇستىك قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ءساتجان پولاتوۆتىڭ ايتۋىنشا، جىل باسىنان بەرى باتىرجان لەسبايەۆ سياقتى سولتۇستىككە كوشۋگە نيەتتى 500 ادام ءوتىنىش بەرگەن. سولتۇستىك قازاقستان ۇسىنىپ وتىرعان جۇمىس ورىندارىنىڭ كوبى – اۋىل شارۋاشىلىعى سالاسىندا. 

 - وڭتۇستىك قازاقستان وبلىسىندا جۇمىسسىز ءجۇرىپ، ءناپاقا تابۋ قيىن بولىپ تۇرعاندا سولتۇستىك قازاقستان وبلىسىندا جاسالىپ جاتقان جەڭىلدىكتەردى پايدالانعان ابزال. كوشىپ بارۋ تەگىن، شىعىن وتەلەدى. جەكەشەلەندىرۋگە بەرمەسە دە، ۋاقىتشا تەگىن تۇرۋعا باسپانا بەرىلەدى. جۇمىسقا ورنالاستىرىلادى. بار قيىندىعى اۋا رايىندا، سولتۇستىكتە قىس – ۇزاق، جاز – قىسقا، – دەيدى ءساتجان پولاتوۆ ازاتتىققا.

ونىڭ ايتۋىنشا، بىلتىر دا وڭتۇستىكقازاقستاندىق 70 وتباسى وبلىس اكىمدىكتەرىنىڭ ءوزارا كەلىسىمى بويىنشا سولتۇستىك قازاقستان مەن شىعىس قازاقستان وبلىستارىنا تەگىن كوشىرىلگەن. ول ازاماتتار اكىمدىكتەردىڭ دەمەۋىمەن جۇمىسقا تۇرىپ، باسپانالى بولعان.

 - بيىل «جۇمىسپەن قامتۋ – 2020» مەملەكەتتىك باعدارلاماسىنا جاڭا تارماق ەنگىزىلدى. ۇكىمەت وڭتۇستىك ايماقتاردى – حالقى كوشۋشى، سولتۇستىك ايماقتاردى – كوشتى قارسى الۋشى ايماقتار رەتىندە بەلگىلەپ بەردى، – دەيدى ءساتجان پولاتوۆ.

وڭتۇستىك قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارىنىڭ سوزىنشە، ازاماتتاردى تۇستىكتەن تەرىسكەيگە كوشىرۋدىڭ دەموگرافيالىق سەبەبى دە بار. ءساتجان پولاتوۆ بۇل سوزىنە «وڭتۇستىك قازاقستان وبلىسىندا – 3 ميلليونعا جۋىق، ال سولتۇستىك قازاقستان وبلىسىندا 6 ءجۇز مىڭداي عانا تۇرعىن بار» دەگەن دەرەكتى ءۋاج ەتەدى.

 - سولتۇستىك قازاقستان وبلىسىنىڭ حالقى كورشى رەسەيگە جانە وبلىس ورتالىعى پەتروپاۆلعا كوشە باستاعان. اۋىلداردا ادام سانى ازايعاننان سوڭ مەكتەپ پەن بالاباقشالار جابىلىپ جاتىر. ول جاقتا جەر كەڭ، يگەرۋگە ادام جەتىسپەيدى. تۇپكى وي – دەموگرافيانى كوتەرۋ، جۇمىسسىزدىقتىڭ الدىن الۋ، – دەيدى ءساتجان پولاتوۆ.

«بيىل 300 وتباسىن كوشىرىپ الا الامىز»

سولتۇستىك وڭىرگە جۇمىس كۇشى كوپ ايماقتاردان ازاماتتاردى كوشىرۋ ماسەلەسى بۇل وڭىردە «دەموگرافيالىق احۋال ناشارلاپ، حالىق سانىنىڭ ازايۋىنان تۋعانىن» سولتۇستىك قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باس مامانى الما ماحمەتوۆا دا راستايدى. ونىڭ ايتۋىنشا، بۇل وبلىسقا بىلتىر وڭتۇستىك قازاقستاننان 18 وتباسى (37 ادام) كوشىپ كەلگەن.

 - ولاردىڭ 27ء-سى جۇمىسقا جارامدى، ءقازىر 21ء-ى جۇمىسقا ورنالاستىرىلدى. بارلىق وتباسى باسپانامەن قامتاماسىز ەتىلدى. ولاردىڭ ىشىندە اۋىل شارۋاشىلىعى سالاسىنداعى جۇمىسشىلارعا قوسا، مۇعالىمدەر مەن دارىگەرلەر دە بار، – دەيدى باس مامان.

الما ماحمەتوۆانىڭ دەرەگىنشە، سولتۇستىك قازاقستان وبلىسىنىڭ 2016 جىلى 300 وتباسىن كوشىرىپ الۋعا مۇمكىندىگى بار.

 - ءدال ءقازىر اۋدانداردا 185 بوس جۇمىس ورنى مەن 110 بوس جەكە تۇرعىن ءۇي بار. بوس جۇمىس ورنىنىڭ 110-ى – اۋىل شارۋاشىلىعى سالاسىندا، 75ء-ى – بيۋدجەتتىك مەكەمەلەردە. كوشىپ كەلگەن وتباسىلاردىڭ بالالارىن مەكتەپ، بالاباقشاعا كەدەرگىسىز ورنالاستىرامىز، – دەيدى سولتۇستىك قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باس مامانى الما ماحمەتوۆا.

سولتۇستىك قازاقستانعا كوشۋگە نيەت ەتىپ جۇرگەن وڭتۇستىك تۇرعىندارىنىڭ ءبىرى، ماقالانىڭ باسىندا ءسوز بولعان باتىرجان لەسبايەۆ قاڭتاردىڭ 19-ى كۇنى وڭتۇستىك قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا بارىپ، قاجەتتى قۇجاتتارىن تاپسىرىپ، ارنايى انكەتانى تولتىرىپ قايتتى. باسقارما ماماندارى سول كۇنى باتىرجان لەسبايەۆتىڭ قۇجاتتارىن سولتۇستىك قازاقستان وبلىسىنداعى ارىپتەستەرىنە ەلەكتروندىق پوشتامەن جىبەردى.

قازاقستان ۇكىمەتى «جۇمىسپەن قامتۋ 2020 جول كارتاسى» باعدارلاماسىن 2013 جىلى قابىلداعان. بۇل باعدارلامادا «جۇمىس كۇشىنە تاپشى» ايماقتارعا «جۇمىس كۇشى ارتىق» وبلىستاردان مامانداردى شاقىرۋ جايى دا ايتىلعان. ءار وبلىس وسى باعدارلاما نەگىزىندە ازاماتتاردى كوشىرۋ جوسپارىن جاساۋعا كىرىسكەن. سونداي وڭىرلەردىڭ ءبىرى – شىعىس قازاقستان وبلىسىنىڭ 2014 جىلدان باستاپ «جۇمىس كۇشى مول ايماقتاردان (الماتى، جامبىل، قىزىلوردا، وڭتۇستىك قازاقستان وبلىستارىنان) ەڭبەككە جارامدى ازاماتتاردى» كوشىرىپ الۋعا كىرىسكەنىن ازاتتىق بۇعان دەيىن دە جازعان.

دەرەككوز: ازاتتىق