ۇلتتىق ءبىرىڭعاي تەستىلەۋ باستالدى. ەلىمىزدىڭ تۇكپىر-تۇكپىرىندە قىز-جىگىتتەر 11 جىل بويى العان بىلىمدەرىن دالەلدەۋگە كىرىستى. ءبىلىم مينيسترلىگى وسى جىلى تاپسىرمالاردان ماعىناسىز ساۋالداردى الىپ تاستادىق دەيدى. مەملەكەتتىك قۇپيا سانالاتىن سىناق سۇراقتارىنىڭ قورعالۋى دا كۇشەيگەن. ال سىننىڭ العاشقى كۇنى وقۋشىلاردىڭ ءبىراز قۋلىعىن اشكەرە ەتتى، دەپ حابارلايدى كتك.

شىمكەنتتە وقۋشىلار سىناققا كىرگىزىلمەس بۇرىن تىڭعىلىقتى تەكسەرۋدەن ءوتتى. ناتيجەسىندە، تالاپكەرلەردىڭ قۋلىعى جاپپاي اشكەرەلەندى. سەبەبى ءبىر بوزبالا «شپارگالكانى» ءىش كيىمىنە، ەكىنشىسى شۇلىعىنا، ال ءبىر قىز تىپتەن بەلدەمشەسىنە تىعىپ وتپەك بولعان. ءبىراق وعان جول بەرىلمەدى. ال استانالىق تۇلەكتەردىڭ جاسىرىن تەست جاۋاپتارىن وزىمەن الىپ كىرۋگە جۇرەكتەرى داۋالاماعان سەكىلدى. ونداي ءجايت كەزدەسكەن جوق. ءبىراق ولارعا نازار ەرەكشە. ەمتيحان الدىندا ساتتىلىك تىلەۋ ءۇشىن ءبىلىم ءمينيسترىنىڭ ءوزى كەلدى. «قولىم جەڭىل» ەدى دەپ تەست ساۋالدارى سالىنعان قوراپشانى دا اشىپ بەردى. «اتا-انالارىڭ دالادا تولقىپ تۇرعان سياقتى. سەندەر ولارعا قالتالارىڭدا تەلەفوندارىڭ بار ما، مينيستر ايتتى ۇيلەرىنە بارا بەرسىن دەڭدەر. مىنا ەسەپتەردىڭ ءبارى دۇرىس ەكەن دەپ. بەسكە تاپسىرىڭدار!»، - دەپ ساتتىلىك تىلەدى ءبىلىم جانە عىلىم ءمينيسترى باقىتجان جۇماعۇلوۆ. «ايتقانىڭىز كەلسىن» دەسكەن قىز-جىگىتتەر قولدارىنا تاپسىرمالارىن الدى. ساعات ءتىلى تۋرا تاڭعى توعىزدى كورسەتكەندە سىناق باستالىپ كەتتى. عيماراتتا مۇلگىگەن تىنىشتىق. اۋديتوريالاردىڭ الدىندا جاۋاپتى كەزەكشىلەر عانا ءجۇر. ويتكەنى تالاپكەرلەرگە كەدەرگى كەلتىرۋگە بولمايدى. وقۋشىلار 125 ساۋالعا جاۋاپ بەرۋى ءتيىس. بەرىلگەن ۋاقىت شەكتەۋلى. 3،5 ساعات. وسى ۋاقىتتا قىز-جىگىتتەردىڭ «جوعارعى وقۋ ورنىما تۇسە الام با» دەگەن وزدەرىن كوپتەن تولعانتقان باستى سۇراعىنا جاۋاپ الۋى ءتيىس. كالكۋلياتور قولدانۋعا بولمايدى، قاجەتى قالامساپ قانا. ۇيالى تەلەفوننىڭ دا پايداسى جوق. ويتكەنى اۋديتوريالارعا بايلانىستى اجىراتاتىن قۇرىلعىلار ورناتىلعان. ال سىرتتا قاۋمالاعان اتا-انا، اعايىن-باۋىر. ۇل-قىزدارىنىڭ بولاشىعىن ويلاپ الاڭداۋلى. ولار ءۇشىن ارنايى مونيتور ورناتىلعان. ونلاين رەجيمىندە سىناقتىڭ قالاي ءوتىپ جاتقانىن ءوز كوزىمەن كورۋگە مۇمكىندىك الدى. ەگدە جاسىنا قاراماستان سەكسەندەگى انار اجەي دە سىناق تاپسىراتىن نەمەرەسىمەن تاڭدا ەرىپ كەلىپتى. سونىڭ تىلەۋىن تىلەپ ءجۇر. «بەرەتىن جاردەمەمىز سولاردىڭ تىلەگىن تىلەيمىز. جاقسى ءوتىپ كەتسە ەكەن بالالاردىڭ ءبارى كۇلىپ شىقسا ەكەن بىرەۋى دە رەنجىمەسە ەكەن دەيمىز عوي»، - دەپ اتاپ ءوتتى تالاپكەردىڭ اجەسى انار قالجانوۆا. جەدەل جاردەم دە كەزەكشىلىكتە. ابىروي بولعاندا تەستىلەۋ كەزىندە ەسىنەن تانىپ، قان قىسىمى كوتەرىلگەن وقۋشىلار بولعان جوق. اتا-انالار ءۇش جارىم ساعاتتى تاپجىلماستان كۇتتى، ال سىناقتى العاشقى بولىپ تاپسىرىپ شىققانداردى قوشەمەتپەن قارسى الىپ جاتتى. «وتە قيىن بولدى. اسىرەسە ماتەماتيكا. قالعان پاندەر وڭايلاۋ»، - دەيدى تالاپكەر بايمۇحان نۇرداۋلەت. تەك باپ قانا ەمەس، ب ا ق تا قاتار شاباتىن سىناق ەكى اپتاعا سوزىلادى. جوعارعى وقۋ ورنىنا ءتۇسۋ ءۇشىن وقۋشىلار كەمى 60 بالل الۋى مىندەت.

دەرەككوز: bnews.kz