جانايقاي

(كولىكتىڭ تەرەزەسىنەن لاقتىرىلىپ، تۋا سالا ءولىم قۇشقان ءسابيدىڭ مونولوگى)

كەلدىم. كەتتىم. مەن سەندەرگە نە جازدىم،
اناشىم-اي، وسىنشالىق نەگە ازدىڭ،
جاتىرىڭنان ءسال كەڭىرەك كولىكتەن، 
باسقا الەمدى كورسەتپەدىڭ نەگە از كۇن؟!

اناشىم-اي،
قۇلاق سالشى، قۇرساعىڭدا بۇرلەگەم،
شاراناڭمىن ءبىر كۇن ءومىر سۇرمەگەن.
سىرتقى الەمنىڭ سالقىندىعىن سەزۋشى ەم،
ءبىراق مۇنشا سۋىقتىعىن بىلمەگەم.

سەن جىلىتار دەپ ەم ءتانىم مۇزداسا،
(الداندىڭ عوي، جۇرت سوكپەس ەد ءسىزدى اسا)
كىم ەمەدى ايتشى سونى،اناشىم،
سۇتكە تولىپ، اق ماماڭىز سىزداسا؟!

اجەتايىم،
جاندى اۋىرتىپ، كىندىگىمدى جۇلمالاپ،
قۇتىلۋعا اسىقتىڭ-اۋ جىلدام-اق.
بەسىگىمە بولەپ قويساڭ مەن سەنىڭ،
مازاڭدى دا الماس ەم عوي ىڭگالاپ.

بولار ەم عوي، قولعاناتىڭ، ەرمەگىڭ،
ازىرەيىلىم بوپ شىقتىڭ عوي سەن مەنىڭ.
اجەتاي-اۋ، الديلەگىڭ كەلمەسە،
بالاسى جوق جانعا نەگە بەرمەدىڭ؟!

اۋلەتىڭدى تۇزداي قۇرتىپ جويماق پا ەڭ،
(تىلەگىڭدى قابىل ەتىپ قويدى اتتەڭ).
اينەگىنەن لاقتىرعاندا كولىكتىڭ،
اسپانعا ۇشىپ كەتەدى دەپ ويلاپ پا ەڭ؟!

قازاعىم-اي،
ساپ-ساۋ تۋدىم، ەر بولار ەم تۋ العان،
ەرلىگىمدى نامىسىما سۋارعان.
قازاق دەگەن ەلدىڭ ۇلى بولام دەپ،
جاتىرىڭا بىتكەن كەزدە قۋانعام!

قازاعىم-اي،
قىسقا كۇندە قىرىق ولەڭ شىعارعان،
اقىن ۇلتتىڭ ۇلى بولۋ-ۇلى ارمان.
مەن، ءاۋ باستا، جاراتقاننان سول ءۇشىن، 
مىنا سەنىڭ جاتىرىڭا سۇرانعام!

ەي ادامدار،
مەن جولدامىن، مەنى ۇمىتىپ كەتپەڭدەر،
ازا تۇتىپ جاتىر ماعان كوك پەن جەر،
تىم قۇرىسا باسپاڭدارشى ميىمدى، 
جيناپ السىن كەپتەرلەر!...
 

قۋانىش ويۋلى

14.01.2016