وتكەن جىلدان بەرى سەرىكجان مامبەتالين مەن ەرمەك نارىمبايەۆتىڭ ۇستىنەن "الاۋىزدىق تۋدىردى" دەگەن ايىپپەن سوت وتىرىسى ءوتىپ جاتىر. بۇگىن اتالعان سوتتا تاراپتار جارىسسوزگە كىرىستى. دەمەك، انى-مىنە ءىستى بولعان ازاماتتارعا بايلانىستى سوت ۇكىمى شىعۋى مۇمكىن. ال، المالى اۋدانىنىڭ پروكۋرورى ديدار قابايەۆ بولسا سوتتان مامبەتاليندى 4 جىل، نارىمبايەۆتى 5 جىلعا سوتتاۋدى سۇراپ وتىر. جالپى، قوس ازاماتتى ءدال وسىلاي جازالايتىنداي نە ءبۇلدىردى؟
قوس بەلسەندى – سەرىكجان مامبەتالين مەن ەرمەك نارىمبايەۆ بىلتىر قازان ايىندا قامالعان بولاتىن. اتالعان ازاماتتارعا Facebook جەلىسىندە مۇرات تەلىبەكوۆتىڭ "ۆەتەر س ۋليسى" كىتابىنان ءۇزىندى كەلتىردى دەگەن ايىپ تاعىلىپ وتىر. جارىق كورمەگەن كىتاپتان ءۇزىندى جاريالاعانى ءۇشىن مامبەتالين مەن نارىمبايەۆ ۇلتارالىق ارازدىقتى تۋدىرعان كورىنەدى. ناقتىراق ايتساق، ولاردى 174-باپتىڭ 1-تارماعى، ياعني "الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني الاۋىزدىق تۋدىرۋ" بويىنشا ايىپتى بولىپ جاتىر. ەگەر كىناسى دالەلدەنسە، ولار 4-5 جىلعا سوتتالۋى مۇمكىن.
ءبىر قىزىعى، سوت "ۆەتەر س ۋليسى" اتتى كىتاپتى جازعان مۇرات تەلىبەكوۆتى ەمەس، ودان ءۇزىندى كەلتىرگەن سەرىكجان مامبەتالين مەن ەرمەك نارىمبايەۆتى ايىپتى دەپ وتىر. بۇل دەگەن ءسوز، «ايران ىشكەن قۇتىلىپ، شەلەك جالاعان تۇتىلدىنىڭ» كەرى بولىپ تۇرعان سياقتى. ويتكەنى، تەلىبەكوۆتىڭ كىتابىن سايتتاردان ەمىن-ەركىن تاۋىپ الۋعا بولادى. ەگەر اتالعان كىتاپ شىنىمەن دە ۇلتارالىق ارازدىقتى تۋدىراتىن بولسا نەگە ونى سايتتاردان الىپ تاستامايدى؟ بۇل جاعى بەلگىسىز. ءبىراق، بىزگە ءبىر بەلگىلىسى، الدەكىم سەرىكجان مامبەتالين مەن ەرمەك نارىمبايەۆتى قايتكەن كۇندە دە ايىپتى ەتىپ شىعارعىسى كەلگەن سياقتى. ايتپەسە، سوت زالىندا ولار ەمەس كىتاپ اۆتورى رەتىندە مۇرات تەلىبەكوۆ وتىرار ەدى عوي.
بەلگىلى زاڭگەر ابزال قۇسپاننىڭ ايتۋىنشا «تەلىبەكوۆ ەمەس، سەرىكجان مەن ەرمەك نەگە ءىستى بولدى؟» دەگەن سۇراققا جاۋاپ بەرۋ ءۇشىن مىندەتتى تۇردە زاڭگەر بولۋ قاجەت ەمەس. سوندىقتان دا، زاڭگەر مامبەتالين مەن نارىمبايەۆتىڭ ءىستى بولۋىن اقىماقتىق دەپ باعالاپ وتىر.
– نەگىزى ءبىز "الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني الاۋىزدىق تۋدىرۋ" دەگەن 174-باپقا وسىدان 4-5 جىل بۇرىن تاپ كەلگەن بولاتىنبىز. ناقتىراق ايتساق، اتىشۋلى «سوپىلار سوتىندا» سايات ىبىراي 12 جىلعا سوتتالدى. مىنە، وسى سوتتان كەيىن ءبىز قازاق جانە ورىس ءتىلدى جۋرناليستەردىڭ باسىن قوسىپ، باسپا ءسوز ءماسليحاتىن وتكىزگەن بولاتىنبىز. اتالعان جيىندا «بولاشاقتا 174-باپپەن سوتتاۋ تاجىريبەسى قالىپتاسايىن دەپ وتىر. بۇل باپ قالىپتاساتىن بولسا مۇنىڭ قۇقىقتىق سالدارى ءقاۋىپتى بولادى. سەبەبى، سوپىلىق پەن ۋاحابيمز ءوز الدىنا ءبىر ءدىن ەمەس، ول يسلامنىڭ ءبىر تارماقتارى. الايدا، سوت وسىنى ءدىنارالىق الاۋىزدىق دەپ باعالاپ وتىر» دەپ ايتقانبىز. بۇل تۋرالى اباي.كز سىندى سايتتار جازدى. سونداي-اق، اتالعان جيىندا جۋرناليستەرگە «ەرتەڭ بۇل باپتى سىزدەرگەدە قولدانادى» دەپ ەسكەرتكەن بولاتىنمىن. مەنىڭ ويىمشا، بۇل باپتى قىلمىستتىق كودەكستان الىپ تاستاۋ كەرەك نەمەسە بۇل باپتى ناقىتالاۋ كەرەك. ويتكەنى 174ء-شى باپ وتە تۇسىنىكسىز باپ. ايتالىق، سوت سەرىكجان مەن ەرمەككە ۇلتارالىق ارازدىقتى تۋدىردى دەپ ايىپ تاعىپ وتىر. ولار ناقتى قاي ۇلتتىڭ اراسىزدا ۇلتارالىق ارازدىقتى تۋدىرىپ وتىر؟ بۇل جاعى بەلگىسىز. سوندىقتان دا، بۇل باپپەن ازاماتتاردى ايىپتاۋ بارىپ تۇرعان اقىماقتىق، – دەيدى ابزال قۇسپان.
كەشە الاۋىزدىق تۋدىردى دەپ ايىپتالعان بولاتبەك ءبىلالوۆتى سوت باس بوستاندىعىن ءۇش جىلعا شەكتەپ، ونى سوت زالىنان بوساتتى. ونىڭ بوستاندىققا شىعۋىنا «قىلمىستىق ءىسىمدى ساياسي ماقساتتا جانە ءوزىن جارنامالاۋ ءۇشىن پايدالانۋعا تىيىم سالامىن» دەگەن ءسوزى تۇرتكى بولدى. ال، سەرىكجان مامبەتالين مەن ەرمەك نارىمبايەۆتىڭ سوتى نەمەن اياقتالۋى مۇمكىن؟ ولار دا بولاتبەك ءبىلالوۆ سياقتى ءوز كىناسىن مويىنداپ، جازاسىن جەڭىلدەتە مە، جوق الدە، بىرنەشە جىلعا تۇرمەگە جاتا ما؟ بۇل جاعى بەلگىسىز. ءبىراق بىزگە ءبىر بەلگىلىسى، 174ء-شى باپتىڭ سالدارى ءالى دە تالاي ادامنىڭ تۇرمەگە جاتۋىنا سەبەپكەر بولاتىن سياقتى.
سەرىك جولداسباي
استانا
