بۇگىن تاجىكستان پارلامەنتى ەل كونستيتۋسياسىنا وزگەرىستەر مەن تولىقتىرۋلار ەنگىزۋ تۋرالى زاڭدى قابىلدادى. وعان سايكەس پرەزيدەنت ەمومالي راحمونعا شەكسىز مارتە پرەزيدەنتتىكە سايلانۋ مۇمكىندىگى بەرىلەدى، - دەپ حابارلايدى «قامشى» پورتالى.

پرەزيدەنت سايلاۋىنا ءتۇسۋ ءۇشىن ادامنىڭ جاسىنا قويىلعان شەكتەۋلەر دە وزگەردى. بۇل وزگەرتۋ "ەمومالي راحموننىڭ ۇلى كەلەسى پرەزيدەنت سايلاۋىنا تۇسەدى» دەگەن بولجامدى كۇشەيتتى.

بۇعان دەيىن، تاجىكستاندا پرەزيدەنتكە «ۇلت كوشباسشىسى» اتاعىن بەرەتىن زاڭ قابىلدانعان. ازاتتىقتىڭ تاجىك رەداكسياسىنىڭ حابارلاۋىنشا، پرەزيدەنت ەمومالي راحمون 25 جەلتوقساندا «ۇلت كوشباسشىسى - بەيبىتشىلىك پەن ۇلتتىق بىرلىكتىڭ نەگىزىن قالاۋشى تۋرالى» زاڭعا قول قويعان. زاڭ جوباسىن پارلامەنت 18 جەلتوقساندا ماقۇلداعان.

16 باپتان تۇراتىن زاڭ جوباسىندا «بەيبىتشىلىك پەن ۇلت بىرلىگىنىڭ نەگىزىن قالاۋشى»، «ۇلت كوشباسشىسى» ۇعىمدارىنا تۇسىنىك بەرىلىپ، «ۇلت كوشباسشىسىنىڭ» قۇزىرەتى، ونىڭ جەكە باسىنا قول سۇعىلماۋ قۇقىعى، قاۋىپسىزدىگىن قامتاماسىز ەتۋ مەن الەۋمەتتىك كەپىلدىك بەرۋ، وردەن مەن مەملەكەتتىك سىيلىق تاعايىنداۋ ەرەجەلەرى بەكىتىلگەن.

پارلامەنتتىڭ تومەنگى پالاتاسى - مادجليس نامويانداگون سپيكەرى شۋكۋردجون زۋحۋروۆ بۇعان دەيىن راحموندى "تاجىك حالقى ءۇشىن كوپ نارسە جاساعان باتىر" دەپ اتاعان. ول بۇل «تاريحي» زاڭ جوباسى ەلدەگى دەموكراتيالىق پروسەستەرگە «قايشى كەلمەيتىنىن» مالىمدەگەن.

تاجىكستان كونستيتۋسياسى 1994 جىلى ازامات سوعىسى كەزىندە بۇكىلحالىقتىق رەفەرەندۋم ارقىلى قابىلدانعان. وعان 1999 جانە 2003 جىلى تاعى دا رەفەرەندۋم ارقىلى وزگەرىستەر ەنگىزىلگەن. 2003 جىلى ەنگىزىلگەن وزگەرىستەر پرەزيدەنت ەمومالي راحمونعا جەتى جىلدىق ەكى مەرزىم بويى، ياعني 2020 جىلعا دەيىن بيلىكتە وتىرۋعا مۇمكىندىك بەرگەن.