2016 جىلدىڭ 5 ناۋرىزىندا  قوعام جانە مەملەكەت قايراتكەرى، الاش ارىسى ءاليحان بوكەيحاننىڭ دۇنيەگە كەلگەنىنە  150 جىل تولادى. ايتۋلى داتا يۋنەسكو كولەمىندە اتالىپ وتپەك.

مۇنداي شەشىم يۋنەسكو باس كونفەرەنسياسىنىڭ 38ء-شى سەسسياسىندا ماقۇلدانعان بولاتىن. الايدا، ۇلت كوسەمىنىڭ 150 جىلدىعىن قازاق ەلىندە اتاپ وتۋگە بيۋدجەتتەن كوك تيىن بولىنبەگەن، - دەپ حابارلايدى «قامشى» پورتالى «اقجول» دەموكراتيالىق پارتياسىنىڭ رەسمي سايتىنا سۇيەنە وتىرىپ.

2015 جىلدىڭ قازان ايىندا ەكس-دەپۋتات، «اقجول» پارتياسىنىڭ جەتەكشىسى ازات پەرۋاشيەۆ ءماجىلىستىڭ جالپى وتىرىسىندا پرەمەر-مينيستر كارىم ماسىموۆكە «ءاليحان بوكەيحاننىڭ 150 جىلدىعىن لايىقتى دەڭگەيدە وتكىزۋىمىز كەرەك» دەگەن تاقىرىپتا دەپۋتاتتىق ساۋال جولداعان ەدى.

پارتيا ءتوراعاسىنىڭ ساۋالىنا ۇكىمەتتەن مىناداي جاۋاپ كەلگەن:

– اسا كورنەكتى قوعام جانە مەملەكەت قايراتكەرى ءاليحان بوكەيحانوۆتىڭ 150 جىلدىعى 2016 جىلى رەسپۋبليكالىق دەڭگەيدە كەڭىنەن اتاپ وتىلەدى. قازىرگى ۋاقىتتا قارجى-ەكونوميكالىق احۋالعا جانە بيۋدجەتتىڭ قىسقارتىلۋىنا بايلانىستى 2016 جىلعى مەرەيتويلىق ءىس-شارالاردى وتكىزۋگە ارنالعان ماقساتتى قارجى قاراجاتى كوزدەلمەگەن. وسىعان بايلانىستى، مەرەيتويلىق ءىس-شارالار مەملەكەتتىك ورگانداردىڭ اعىمداعى جۇمىسى شەڭبەرىندە جانە بيۋدجەتتەن تىس قاراجاتتى تارتۋ ەسەبىنەن وتكىزىلەتىن بولادى. ءاليحان بوكەيحانوۆتىڭ 150 جىلدىق مەرەيتويىن مەرەكەلەۋ جونىندەگى مەملەكەتتىك كوميسسيا قۇرۋ ماسەلەسى بويىنشا ارنايى كوميسسيا قۇرۋدىڭ ورىنسىز ەكەنىن حابارلايمىز. ءاليحان بوكەيحانوۆتىڭ ەسىمىن ماڭگى ەستە قالدىرۋ ماقساتىندا مەملەكەتتىك ورگاندارعا تاريحي تۇلعانىڭ مەرەيتويى قۇرمەتىنە باق-تاردا كەڭىنەن جاريالاي وتىرىپ، عىلىمي-تاجىريبەلىك كونفەرەنسيالار، مادەني-كوپشىلىك جانە باسقا دا الەۋمەتتىك ماڭىزدى ءىس-شارالار وتكىزۋگە تاپسىرما بەرىلدى.