قازاقستاندا ەلدىڭ نازارىن بەتالدى تاقىرىپتارعا بۇرۋدىڭ حاس شەبەرى اتانعان مۇرات تەليبەكوۆ جاقىندا ءماجىلىس دەپۋتاتتىعىنا ءوزى لايىقتى دەپ سانايتىن بىرنەشە تۇلعانى ۇسىنىپ، ولاردىڭ اراسىندا بەلگىلى رەپەر مس سايلاۋبەكتىڭ دە ەسىمىن ايتتى. بۇل مالىمدەمەگە نارازىلىق تانىتقان عالامتور پايدالانۋشىلارى مس سايلاۋبەكتى دە، ونى ۇسىنعان تەليبەكوۆتى دە جەردەن الىپ جەرگە سالۋدا.
وسى تۇستا بۇل ۇسىنىستىڭ بالاما پىكىر رەتىندە بولسا دا «ءومىر سۇرۋگە» حاقىسى بار ەكەنىن ايتا كەتكەن ءجون. وعان نەگىز دە جوق ەمەس.
ءبارىمىز بىلەتىندەي، مس سايلاۋبەك مىرزا ايتىپ جۇرگەن اندەردى بىلايعى جۇرت تۇرىپتى، ساكەڭنىڭ ءوزى دە تۇسىنبەيدى. ال، بىرنەشە رەت سايلانعان ءماجىلىس دەپۋتاتتارىنىڭ جۇمىسىن دا تۇسىنگەن جان بار ما ارامىزدا؟ جاۋاپ بەرۋ قيىن، ارينە! ويتكەنى، ك. ءماسىموۆ ۇكىمەتى دايىنداپ بەرگەن زاڭ جوبالارىن سۇيىكتى پارلامەنتىمىز ءبىر ءارپىن وزگەرتپەي-اق ماقۇلداپ كەلدى. زەينەتاقىمەن قامتۋ، شەتەلدەن قارىز الۋ، نارىقتاعى باعانى رەتتەۋ سىندى قانشاما ومىرلىك ماڭىزى بار زاڭدىق قۇجاتتاردى قابىلداپ جاتقان وسى پارلامەنت ەمەس پە؟!
ودان سوڭ، ساعات ساناپ قۇلدىراپ جاتقان تەڭگەنىڭ جايىن، باسپاناسىز جۇرگەن قازاقتىڭ قامىن ايتپاسا دا، ەڭ قۇرىعاندا «حالىق قالاۋلىلارى» رەتىندە دەپۋتات مىرزالار قوعامدا بولىپ جاتقان نەشە ءتۇرلى كەلەڭسىز جايتتارعا بايلانىستى پىكىر ءبىلدىرىپ، ەلگە ءجون سىلتەۋگە دە جارامادى. كوكتەمدە سايلاناتىن دەپۋتاتتار كورپۋسى دا بۇرىنعىسىنان وزگەشە بولادى دەپ ايتا المايمىز.
ولاي بولسا، ماجىلىستە «قازاقستاندا قىز-كەلىنشەكتەر ەكى كۇيەۋگە ءتيسىن» دەيتىن باقىت سىزدىقوۆا وتىردى نە، «ءجلومانا سيمانالاتقان» سايلاۋبەك وتىردى نە؟! ەگەر تاعى دا ايتقانىن ادام تۇسىنبەيتىن «ادەتتەگى» پارلامەنت جاساقتالاتىن بولسا، مس سايلاۋبەك مىرزانىڭ اتى «نان باعاسىن 300 تەڭگە ەتۋ كەرەك» دەگەن مالىمدەمەسىنەن كەيىن عانا ەلگە تانىلعان دەپۋتات ايقىن قوڭىروۆتان نەسى كەم؟ ەندەشە، ونسىز دا ءوز-وزىن تاراتۋدى سۇراپ، ارتىنان سول ورىندارىنا قايتا جايعاساتىن «تۇسىنىكسىز» دەپۋتاتتار اراسىنان تۇسىنىكسىز ءانشىمىز دە ءبىر ورىن يەلەنۋگە تولىق قۇقىلى. ياعني، فەيسبۋك الەۋمەتتىك جەلىسىندە ايتىلىپ جاتقان «ءيا، ءبىزدىڭ پارلامەنت سايلاۋبەككە ساي عوي!» دەيتىن پىكىردىڭ جانى بار.
