بۇگىن ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا الماتى اكىمى باۋىرجان بايبەك «وڭاي» جۇيەسىنە قاتىستى تۇسىنىك بەردى.
«ەڭ ماڭىزدى ماسەلەلەردىڭ ءبىرى - ول «وڭاي» جۇيەسىنە بايلانىستى. بۇل وتە ماڭىزدى باعىت دەپ ەسەپتەيمىز. وسى تۇرعىدا كۇندەلىكتى مونيتورينگ جۇرگىزۋدەمىز. اتاپ ايتقاندا، ەلىمىز بويىنشا ءبىز وسى جۇيەگە قوسىلعان ءبىرىنشى قالا بولىپ تابىلامىز. وزدەرىڭىز بىلەسىزدەر، سينگاپۋر، گونكونگ جانە الدىڭعى قاتارلى وزگە دە وڭتۇستىك-شىعىس ەلدەردەگى شاھارلار كارتالارمەن (قوعامدىق كولىكتەردە جۇرۋگە ارنالعان) جۇمىس ىستەۋدە. بۇگىندە كوبىسى قويىپ جۇرگەن نەگىزگى ساۋال جول ءجۇرۋ بيلەتتەرىنىڭ قىسقارۋىنا بايلانىستى بولىپ وتىر. جالپى، ءبىز وسى نارىقتىڭ اۋقىمىن ايقىنداۋ ءۇشىن ءبىرشاما ۋاقىت سۇرادىق. بۇعان دەيىن بۇل نارىق تولىقتاي اشىق ەمەس، تۇسىنىكسىز بولعان ەدى، ياعني شىعىستار مەن كىرىستەر قانشالىقتى ەكەنى ايقىن ەمەس ەدى. بۇگىندە ءبىز نارىق كولەمى 19-20 ملرد. تەڭگە ەكەنىن بايقاپ وتىرمىز، ال شامامەن 6-7 ملرد. تەڭگەنى «سۇرقاي ەكونوميكادان» شىعارامىز دەپ پايىمداۋدامىز»، - دەدى اكىم.
ونىڭ سوزىنە قاراعاندا، بۇگىندە قوعامدىق كولىك تاسىمالى بويىنشا حالىقتىڭ پىكىرى نازارعا الىنىپ، ەرتەڭ ءماسليحات وتىرىسىندا دەپۋتاتتار قولداسا، وندا جول ءجۇرۋ بيلەتتەرى قايتا ىسكە قوسىلادى.
«جەتى جاسقا دەيىنگى بالالار اقىسىز جۇرەدى، مەكتەپ جاسىنداعى وقۋشىلار ءۇشىن مىڭ تەڭگە، زەينەتكەرلەرگە ەكى مىڭ تەڭگە جانە كوپ بالالى انالارعا ەكى مىڭ تەڭگە، ستۋدەنتتەر ءۇشىن ءۇش مىڭ تەڭگە قاراستىرىلۋدا. سونىمەن قاتار، ءبىرىنشى جانە ەكىنشى توپتاعى مۇگەدەكتەر، ۇوس ارداگەرلەرى مەن ولارعا تەڭەستىرىلگەن ادامدار قالادا تەگىن جۇرەدى. بۇل باعىتتاعى شىعىستار جەرگىلىكتى بيۋدجەت ءۇشىن قوماقتى قارجى»، - دەدى ب. بايبەك.
