ەكس-دەپۋتات، عالىم امانگەلدى ايتالى اقتوبە وبلىسىنداعى ءدىني جاعدايدىڭ ۋشىعۋ سەبەبىن مەملەكەت حاتشى گۇلشارا ءابدىقالىقوۆاعا جايىپ سالدى، - دەپ حابارلايدى «قامشى» پورتالى NUR.KZ-كە سىلتەمە جاساپ. قوعام قايراتكەرىنىڭ ايتۋىنشا، ءدىني ساۋاتى جوق اكىمدىك قىزمەتكەرلەرى تەك "دىكەڭدەۋمەن" جۇيكەنى جۇقارتىپ، قۇقىق قورعاۋ قىزمەتكەرلەرى قۋدالاۋمەن جاعدايدى تەك اسقىندىرىپ جاتقان كورىنەدى.

«اتەيستىك قوعامدا ءدىن جاعدايى وتە كۇردەلى. ءبىزدىڭ ەلىمىزدە جاساندى ءدىنشىل بولىپ كورىنۋ بار. ىسىراپشىلدىق، كيىم، كوپ ايەل الۋ، وركوكىرەكتىك، دىنگە دەگەن سالقىندىق ءالى بار. مەملەكەتتىك قىزمەتشىلەر مەن مۇعالىمدەر ناماز وقيتىن جاستارعا كۇدىكپەن قارايدى. مەشىتكە باراتىن جاستاردى جۇمىسقا قابىلداماي، الالاۋ بار. ەكسترەميزمگە جاقىن دەپ وتباسى مۇشەلەرىنە كۇدىكپەن قاراۋ بار. ءدىن توڭىرەگىندەگى جاعداي وڭدى بولماي وتىر»، - دەيدى قوعام قايراتكەرى.

امانگەلدى ايتالى مەملەكەتتىك حاتشى گۇلشارا ءابدىقالىقوۆاعا شىنايى جاعدايدى بايانداي وتىرىپ، وبلىس اكىمىنەن قاداعالاۋدى سۇرادى.

«جاستار قۇقىق قورعاۋ ورگاندارىنىڭ جۇمىسىنا ريزا ەمەس. پاگون تاعاتىن ادامدار ناماز وقيتىن جاستاردى  قۋدالاپ، شامادان تىس كۇدىكتەنىپ، ۇيىنە كەلىپ ايىپتايدى! ءقازىر ۋاقىت وزگەردى، ءبىراق، كونەنىڭ پسيحولوگياسى كەتە قوياتىن ەمەس. وسىنى قۇقىق قورعاۋ ورگاندارى ەسكەرسە ەكەن. ءبىز ەلباسىنىڭ ينستيتۋسيونالدىق باعىتىن جۇزەگە اسىرۋ بويىنشا ناقتى قادام جوسپارىن باستادىق. وندا ءبىرىنشى كەزەكتە مەملەكەتتىك قىزمەتكەرلەردىڭ مادەنيەتى تۇر. ول ءدىن ماسەلەسىنە دە قاتىستى. مەملەكەتتىك مەكەمەلەردە مادەنيەت جوق»، - دەدى امانگەلدى ايتالى.

تەرىس اعىممەن جاپپاي كۇرەستى باستاعان مەمقىزمەتكەرلەر "دىكەڭدەۋدەن" ءارى اسپاي جاتىر.

«بەردىبەك ماشبەك ۇلى، ءبىزدىڭ اكىمدىكتەگى قىزمەتكەرلەردىڭ ءدىني ساۋاتى تومەن. بۇلار "دىكەڭدەۋدى" بىلەدى، باقىلاۋدى بىلەدى. ءبىراق، مادەنيەتى جوق. ولاردا ەلدىڭ اراسىنداعى ريزاشىلىق كەمدە كەم. مەكتەپتىڭ ديرەكتورىن اكىمشىلىككە شاقىرىپ «سەنىڭ بالاڭ نەگە مەشىتكە بارادى» دەپ جاعادان الادى. وسىندايدان كەيىن بۋىنى قاتپاعان جاستار نەگە تەرىس اعىمعا تۇسپەسىن، تۇسەدى! سوندىقتان، مەندە ءبىر ۇسىنىس بار. ول تەك مەنىڭ ۇسىنىسىم ەمەس. باسقارۋ ورگاندارىندا، اكىمشىلىك،  قۇقىق قورعاۋ ورگانى بولسىن ءدىن تۇرعىسىنان ساۋاتتى بولۋى كەرەك. مەشىتكە بارىپ "دىكەڭدەمەي" «قۇرمەتتى يمام» دەپ قۇرمەت كورسەت. ءبىز كەيدە ادامداردى وسى مىنەزىمىزبەن ۋشىقتىرىپ المايمىز با دەپ قورقامىن. تەرىس اعىمعا مىلتىقپەن،  پوليسيامەن كۇرەس جۇرگىزە المايمىز. يدەيانى يدەيامەن جەڭۋ كەرەك. ازاماتتىق قوعام كۇشىمەن كۇرەسەمىز. اعىمدارعا قازاق ءداستۇرىن ناسيحاتتاۋمەن جەڭەمىز»، - دەدى قوعام قايراتكەرى.

وڭىردەگى ءدىني جاعدايدىڭ ۋشىعۋىنا جۇرگىزىلىپ جاتقان تەكسەرىستەردىڭ دە اسەرى بارىن ايتقان امانگەلدى ايتالى توزىممەن، سابىرلىقپەن جۇمىس جاساۋدىڭ جەتپەي تۇرعانىن ايتتى.

«ءدىندى قورعاۋ - ۇلتى قورعاۋ. دىنگە سەنىمسىزدىك تۋعىزۋ - ۇلت بولاشاعىنا سەنىمسىزدىك تۋعىزۋ.  قالىڭ قازاق اراسىندا شۇكىرشىلىك ەتەتىندەر كوپ. كەلىسىمنىڭ تۇراقتى بولىپ وتىرۋى سونىڭ ارقاسى. ولارعا كۇدىك تۋعىزباۋ كەرەك. قۋدالاماۋ كەرەك»، - دەگەن امانگەلدى ايتالى.