«قازاق ەلى» انيماسيالىق فيلمىندە اندەردى ورىنداۋعا نۇرلان ابدۋللين، ساكەن مايعازييەۆ سىندى تانىمال انشىلەر تارتىلدى. بۇل تۋرالى بۇگىن ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا ءفيلمنىڭ باس پروديۋسسەرى ءسابيت ءابدىقالىقوۆ ءمالىم ەتتى، - دەپ حابارلايدى "قامشى" پورتالى قازاقپاراتقا سىلتەمە جاساپ.
«ءقازىر پروكاتتىڭ الدىندا ورىس تىلىندە دىبىستاۋ شارالارى جۇرگىزىلۋدە. نەگىزى قازاق تىلىندەگى نۇسقاسى تولىق دايىن»،-دەدى باس پروديۋسسەر.
ونىڭ سوزىنە قاراعاندا، جالپى دىبىستاۋ جۇمىستارىنا عابيت مۇسىرەپوۆ اتىنداعى بالالار جانە جاسوسپىرىمدەر تەاترىنىڭ اكتەرلەرى اتسالىستى. «ىشىندە اندەردى ورىنداۋعا نۇرلان ابدۋللين، ساكەن مايعازييەۆ سياقتى انشىلەر تارتىلدى»،-دەدى ءسابيت ءابدىقالىقوۆ.
انيماسيالىق ءفيلمنىڭ ەلىمىزدىڭ كينوتەاترلارىنداعى رەسمي پروكاتى ناۋرىز ايىنا جوسپارلانعان. «ساق» كينوستۋدياسى ءفيلمنىڭ حرونومەتراجى 75 مينۋتتىق تولىقمەتراجدى نۇسقاسىن دايىندادى. ايتا كەتەيىك، قازاقستان انيماتورلارى ساپالى انيماسيالىق لەنتانى شەتەل مۋلتفيلمدەرىنە قاراعاندا 60 ەسە ارزان بيۋدجەتپەن جاساپ شىعاردى. ءفيلمنىڭ ديرەكتورى نۋريددين پاتتەيەۆتىڭ ايتۋىنشا، كارتينانىڭ بيۋدجەتى 375 ملن. تەڭگەنى قۇرادى.
ءفيلمنىڭ تاريحي كەڭەسشىسى - تاريح عالىمدارىنىڭ دوكتورى، پروفەسسور جامبىل ارتىقباي. ءفيلمنىڭ ادەبي كەڭەسشى - دۋلات يسابەكوۆ، رەجيسسەرى - باتىرحان داۋرەنبەكوۆ، سەناريسى - ءساعادىلدا ۇسىبالييەۆ، باقىتجان قۇلجاباي، كومپوزيتورى - رۋسلان شىنىقۇلوۆ، قويۋشى سۋرەتشىسى - ازامات ەرنازاروۆ، ءفيلمنىڭ ديرەكتورى - نۋريددين پاتتەيەۆ، باس پروديۋسسەرى - ءسابيت ءابدىقالىقوۆ.
فيلمدەگى وقيعا جەلىسى كەرەي مەن جانىبەكتىڭ بالا كەزدەرىنەن باستاپ ەسەيىپ، ەرجەتىپ، ەل باسقارىپ، قازاق حاندىعىن قۇرعانعا دەيىنگى ارالىقتى قامتيدى. ءفيلمنىڭ ماقساتى بالالاردىڭ ءوز تاريحىن تۇسىنۋىنە، كەرەي مەن جانىبەكتەي باتىرلاردىڭ قازاق حاندىعىن قالاي قۇرعانىن ءبىلىپ، سولارعا ەلىكتەۋگە، ءوز ەلىنىڭ پاتريوتى بولىپ وسۋلەرىنە جول اشۋ بولىپ تابىلادى.
