شىعىس قازاقستان وبلىسىندا رەسپۋبليكالىق جانە جەرگىلىكتى ماڭىزداعى اۆتوموبيل جولدارىن جوندەۋ ماسەلەسىنە بايلانىستى ارنايى كەڭەس ءوتتى. اعىمداعى جىلى وبلىستىق ماڭىزداعى 226 شاقىرىم جانە رەسپۋبليكالىق ماڭىزداعى 108 شاقىرىم جولداردا ورتاشا جوندەۋ جۇمىستارى جۇرگىزىلەدى. بۇل ماقساتتا 5 ملرد. تەڭگەگە جۋىق قارجى قاراستىرىلۋدا، - دەپ حابارلايدى "قامشى" پورتالى.

         جوندەلۋگە ءتيىس جولدار ءتىزىمى بەكىتىلگەن كەڭەس وبلىس اكىمى دانيال احمەتوۆتىڭ توراعالىعىمەن ءوتتى.

         بيىلعى جىلى ءار ءتۇرلى تەحنولوگيالاردى قولدانا وتىرىپ، جالپى قاشىقتىعى 30 شاقىرىم بولاتىن وسكەمەن – سەمەي تاس جولىنىڭ ەكى ۋچاسكەسىندە ورتاشا جوندەۋ جۇمىستارى جۇرگىزىلمەك. سونداي-اق، قاراعاندى – اياگوز – تارباعاتاي – بۇعاز تاس جولىنىڭ 78 شاقىرىمى جوندەلەدى. جاز كەزىندە وبلىس اكىمى اياگوزدەن تارباعاتاي اۋدانىنىڭ اۋدان ورتالىعىنا دەيىن اۆتوكولىكپەن بارىپ، جولدىڭ جاعدايىن ءوز كوزىمەن كورىپ قايتقان بولاتىن.

         ايتا كەتۋ كەرەك، اتالعان اۆتوموبيل جولىن جوندەۋدەن وتكىزگەن سوڭ، اياگوزبەن اقسۋات ارالىعىنداعى جول ەكى ەسەگە قىسقارىپ، كولىك قاتىناسى تاۋلىگىنە 200-دەن - 1500 اۆتوكولىككە دەيىن كوبەيەدى دەپ كۇتىلۋدە.

         قازىرگى كۇنى تاس جولدىڭ جاعدايى وتە ناشار بولۋىنا بايلانىستى، كولىك جۇرگىزۋشىلەر اياگوزدەن اقسۋاتقا جەتۋ ءۇشىن، الماتى – وسكەمەن رەسپۋبليكالىق تاس جولىمەن قالباتاۋ اۋىلى ارقىلى ارتىق 200 شاقىرىمدى ءجۇرىپ وتۋگە ءماجبۇر.

         سونىمەن قاتار، 2016 جىلى وبلىستىق ماڭىزداعى قاشىقتىعى 80 شاقىرىمنان استام وسكەمەن – سىبە وزەنى اۆتوموبيل جولدارىن ورتاشا جوندەۋدەن وتكىزۋ جوسپارلانۋدا.

         بۇگىنگى تاڭدا وبلىس اكىمىنىڭ تاپسىرماسىنا سايكەس، ارنايى قۇرىلعان جۇمىس توبى جەرگىلىكتى جولداردا ورتاشا جوندەۋ جۇمىستارىن وتكىزۋگە بايلانىستى ارەكەت ەتۋدە.