جالپىۇلتتىق سوسيال-دەموكراتيالىق پارتيا قۇرامىندا تاعى دا ءبىر شۋ شىعاتىن سەكىلدى. تاۋەلسىز باسىلىم «تريبۋنا» گازەتىندە پارتيانىڭ قىزىلوردا قالاسىندا تۇراتىن ابدۋللا شاحانوۆ ەسىمدى مۇشەسىنىڭ جسدپ جەتەكشىسىن سىنعا العان ۇندەۋى جاريالاندى، - دەپ حابارلايدى «قامشى» پورتالى.
پارتيا مۇشەسى ۇندەۋىندە قالالىق فيليال باسشىلىعى پارتيانىڭ جارعىسىنا ساي ارەكەت ەتپەي وتىر دەپ شاعىمدانادى. ونىڭ ايتۋىنشا، فيليال جەتەكشىلەرى پارتيا سەزىنە دەلەگاتتاردى اشىق جانە ءادىل جولمەن سايلاماعان كورىنەدى.
«بۇل پارتيانىڭ سايلاۋعا قاتىسپاق ويى بار ەكەنىنەن حاباردار بولارسىزدار. ونى الداعى بولار سەزدە شەشەمىز دەگەندى بىلدىرگىسى كەلەدى حالىققا. جارعى بويىنشا سولاي عوي جانە ول سەزگە دەلەگاتتار وبلىستىق كونفەرەنسيادا سايلانۋعا ءتيىس بولاتىن. الداۋ دا وسى جەردە كورىنىس تاپتى. كونفەرەنسيانىڭ شاقىرىلعانى جونىندە فيليالدىڭ باسشىلىعى بولىپ سانالاتىن كەڭەس مۇشەلەرىنە، نە بولماسا، ءتورالقاعا حابارلانباي، جاسىرىن جانە جالعان وتكىزبەكشى بولعانى اشكەرە بولدى. قاڭتاردىڭ 24ء-ى كۇنى، سول جالعاندىقتىڭ ۇستىنەن تۇستىك. التى ايدان بەرى اشىلماعان، فيليالدىڭ كەڭسەسى بولۋى مۇمكىن دەگەن، ءبىر كافەگە جالعا بەرىلگەن جسدپ قىزىلوردا وبلىستىق فيليالى ءتوراعاسىنىڭ مىندەتىن اتقارۋشى ت.راحيموۆتىڭ جەكە-مەنشىك عيماراتىنىڭ ەسىگى اشىق تۇرعانىن كورىپ، باس سۇققانبىز. سونداعى كورگەنىمىز – كوپشىلىگى بىزگە تانىس ەمەس، باس-اياعى ونعا تولمايتىن كىسىلەر وتىر ەكەن. شىنىندا دا جينالىس وتكىزبەكشى سيىقتارىن كورىپ، شىعىپ كەتتىك. ءبىر اۋداننان ءۇش كىسى قاتىسىپ وتىر، تاعى ءبىر اۋداننان – ءبىر كىسى، قالعان بەس اۋداننان ەشكىم جوق. ءۇش كىسى قاتىساتىن اۋدان – ءتوراعانىڭ مىندەتىن اتقارۋشى كىسىنىڭ تۋعان ولكەسى. ول كىسىنىڭ تاعى ەكى تۋىسىن كوردىك. سوندا ءوزىنىڭ ونشاقتى تۋىس-تامىرلارىمەن پارتيانىڭ وبلىستىق كونفەرەنسياسىن وتكىزدىم دەپ كىمدى الداماقشى؟ پارتيانىڭ بەلسەندىلەرى، بايىرعى مۇشەلەرى، باسشى قۇرامى، اۋدان، قالا وكىلدەرى قايدا؟ ولاردان باستىق نەگە جاسىرىنادى؟ بۇل ءوز الدىنا اڭگىمە. بۇگىنگى ايتپاعىمىز، الگى تۋىستارى مەن “تامىرلارى” “باستىقتى” تۋعان قۇداشاسىمەن ەكەۋىن سەزگە دەلەگات ەتىپ جىبەردى. بۇل كىسىلەر سونىڭ وزىمەن-اق وزدەرى تۇرماق، پارتيانىڭ سەزىن دە جالعانعا شىعارعان جوق پا؟ ەندەشە، بۇعان جول بەرمەيىك»، - دەگەن ۇندەۋ يەسى مۇنداي قۇيتىرقىلىققا پارتيا جەتەكشىسى جارماحان تۇياقبايدىڭ دا قاتىسى بار دەگەن كۇدىگىن ايتادى.
«ءبىز بۇل حابارلامانى جارماحان تۇياقباي مىرزانىڭ وزىنە تىكەلەي جىبەرۋىمىزگە دە بولار ەدى، ءبىراق ولاي ەتپەدىك. سەبەبى، مۇنىڭ الدىندا، وسى تارىزدەس، پارتيانىڭ جارعىسىنا ساي ەمەس جونسىزدىكتەر تۋرالى جازعان بىرنەشە حاتتارىمىز ول كىسىمەن قاراۋسىز قالدىرىلعان بولاتىن. بۇل جولى دا سولاي بولا ما دەگەن قاۋىپپەن، قالىڭ كوپشىلىك ارقىلى جەتكىزۋدى ءجون كوردىك. ءبىر جاعىنان، وسى جونسىزدىكتەردىڭ باسىندا جارماحان تۇياقباي مىرزانىڭ ءوزى وتىر دەپ سانايمىز. مۇنداي باسشىلارمەن سايلاۋعا ءتۇسىپ نە بەرەكە بولماق؟ سوندىقتان، مەن پارتيالاس ارىپتەستەرىمدى سايلاۋعا جارماحان تۇياقبايسىز بارۋعا شاقىرامىن. ول ءۇشىن وسى الداعى سەزدە وسى ماسەلەنى كوتەرىپ، شەشىپ الۋ كەرەك. ودان بەرگى جەردە ەش ناتيجە بولمايدى. بولعان كۇندە دە قولدان بۇلدىرىلەدى. مەن مۇنى وتكەن كۇندەردىڭ تاجىريبەسىنە سۇيەنىپ ايتامىن»، - دەيدى ابدۋللا شاحانوۆ.
