ماقسات كادىرحان قازاقستان كورەرمەندەرىنە «كورىكتى مەكەن» جانە «ءبورى سوقپاقتى بوز دالا» فيلمدەرى ارقىلى تانىس. ول – ۇرىمشىدەگى تيان-شان كينو ستۋدياسى ديرەكتورىنىڭ ورىنباسارى، مەملەكەتتىك ءى دارەجەلى رەجيسسەر، «گۇلبيكە» ءفيلمىنىڭ كوركەمدىك جەتەكشىسى، پروديۋسسەرى. ماقسات كادىرحان ۇلى – التايدىڭ بۋرىلتوعاي اۋدانى، جەتارال اۋىلىنىڭ سارتاقتاي دەگەن جەرىندە 1954 جىلى 15 تامىزدا دۇنيەگە كەلگەن. ماكەڭ العاشقى جۇمىسىن 1974 جىلى التاي ايماقتىق ويىن-ساۋىق ۇيىرمەسىندە اكتەر، ءانشى بولىپ باستايدى. داۋىسىنىڭ ەشكىمگە ۇقسامايتىن دارا قاسيەتىنىڭ ارقاسىندا ول 1976 جىلى شىڭجاڭ «تيان-شان» كينوستۋدياسىنا ارنايى دۋبلياج جاساۋشى بولىپ قىزمەتكە ورنالاسادى. سونىمەن قاتار 1978 جىلعا دەيىن شىڭجاڭ ۋنيۆەرسيتەتىندە راديو-ديكتورلىق ماماندىعىن وقيدى. كاسىبي ءبىلىم مەن شىنايى تالانتىن ايگىلەي بىلگەن ماكەڭ 1995 جىلعا دەيىن تاپجىلماستان «تيان-شان» كينو ستۋدياسىندا اۋدارما ءبولىمىنىڭ باستىعى بولىپ مىندەتىن وتەدى. ءبىز جوعارىدا اتاعان «كورىكتى مەكەن» ءفيلمى – ماكەڭنىڭ ءبىر عانا ەڭبەگى. اتالمىش فيلم الەمنىڭ 27 مەملەكەتىندە كورسەتىلىپتى. «تيان-شان» كينوستۋدياسىنىڭ ديرەكتورى جان ي گاننىڭ ايتۋى بويىنشا، 2006 جىلى جۇڭگو باسشىسى حۋ سزين تاو امەريكاعا بارعان ساپارىندا قىتايدىڭ تاڭداۋلى 4 ءفيلمىن الا بارىپتى. سونىڭ ءبىرى وسى «كورىكتى مەكەن» بولعان ەكەن. ماقسات كادىرحان ۇلى وسى كۇنگە دەيىن 500-گە جۋىق كينوعا دىبىس رەجيسسەرى بولدى ءارى كوپتەگەن شەتەل كينولارىنىڭ باستى رولدەگى كەيىپكەرلەرىن سازدى داۋىسىمەن قازاقشا سويلەتتى. ماكەڭ رەجيسسەرلىك ەتكەن "يۋەلياڭۋانداعى كۇلكى" كينوسى 1985 جىلى شىڭجاڭداعى از ساندى ۇلتتاردىڭ تاڭداۋلى فيلم سىيلىعىن، «بايسى كوتەرىلىسى» كينوسى 1995 جىلى شىڭجاڭ اۋدارما كينولارى اراسىنداعى «ارىنداعان ايداھار» سىيلىعىن ەنشىلەگەن. سونىمەن قاتار 2-دارەجەلى "پەريزات" سىيلىعىن، "تۇلپار" سىيلىعىن، شىڭجاڭنىڭ "بەس ءبىر ينجەنەريا" سىيلىعىن جەڭىپ العان "ساحاراداعى دانەش" فيلمىندە ماقسات كادىرحان ۇلى فيلم مەڭگەرۋشىسى، باس باقىلاۋشى، اقىلشى ءارى كينو وزەگىنىڭ باستى ءانىن ورىنداۋشى سياقتى بىرنەشە مىندەتتى قاتار اتقاردى. ماكەڭ شىڭجاڭداعى اتاقتى 8 كينو مامانىنىڭ ءبىرى. ول تەك كينو سالاسىمەن عانا اينالىسىپ قالماي، كوركەم ادەبيەتتىڭ دە بەلدى قالامگەرىنە اينالدى، ساحنا جاڭعىرتار اندەردى دە جازدى.