كەشە ماڭعىستاۋ – الماتى باعىتىندا قاتىنايتىن جولاۋشىلار پويىزى «ماڭعىشلاق-بەينەۋ» ۋچاسكەسىندە «ادمگاز» جشس-عا تيەسىلى گاز تاسۋشى جۇك كولىگىمەن سوقتىعىسىپ، گاز تاسۋشى كولىك جۇرگىزۋشىسى قازا تاپتى، - دەپ حابارلايدى «قامشى» پورتالى.
ماڭعىستاۋ وبلىسى اكىمىنىڭ ورىنباسارى ءانۋار شوجەعۇلوۆتىڭ ايتۋىنشا، اپات سالدارىن جويۋعا توتەنشە جاعدايلار قىزمەتى مەن «قازاقستان تەمىرجولى» اق-نىڭ ماماندارى دەر كەزىندە ارالاسىپ، پويىز جولاۋشىلارىن ءقاۋىپسىز ايماققا الىپ شىققان.
«اتاپ ايتقاندا، اپاتتان سوڭ پويىز قۇرامى دەرەۋ قوسىمشا تەپلوۆوزبەن ءقاۋىپسىز قاشىقتىققا اپارىلدى. تجد-نىڭ 50-دەن استام قىزمەتكەرى، اپات ورنىنا جاقىن ورنالاسقان ەلدى مەكەندەردىڭ ءورت ءسوندىرۋ بولىمدەرىنىڭ قىزمەتكەرى 40 توننالىق گاز تاسۋشى كولىك سيستەرناسىن سالقىنداتۋ جۇمىستارىن جۇرگىزدى. بۇل جۇمىستارعا ارناۋلى تەحنيكالار، ونىڭ ىشىندە، قالپىنا كەلتىرۋشى پويىز، بەس ءورت ءسوندىرۋشى تەحنيكا جۇمىلدىرىلدى»، - دەلىنگەن اكىمدىك تاراتقان باسپا ءسوز حابارلاماسىندا.
«جولاۋشىلار ءقاۋىپسىز قاشىقتىقتا، ولار ىستىق تاماقپەن، جىلى كيىم-كەشەكپەن قامتاماسىز ەتىلدى. سوقتىعىسۋ كەزىندە پويىزدىڭ جولدان شىعىپ كەتۋى ورىن العان جوق، تەمىرجولعا نۇقسان كەلمەدى. جاعداي تولىقتاي باقىلاۋدا. ماڭعىستاۋ وبلىستىق تجد مالىمەتتەرىنە ساي، ەكولوگياعا ەش ءقاۋىپ ءتونىپ تۇرعان جوق»، - دەيدى وبلىس اكىمىنىڭ ورىنباسارى ءانۋار شوجەعۇلوۆ.
سونداي-اق، وبلىستا وسى وقيعانىڭ ءمان-جايىن انىقتاۋ ماقساتىندا ءا. شوجەعۇلوۆ باسشىلىق ەتەتىن جەدەل شتاب قۇرىلعان.
