جامبىل وبلىسىندا وقىس وقيعا ورىن الدى. مەكتەپ وقۋشىسىنا قول كوتەردى دەگەن كۇدىككە ىلىنگەن مۇعالىمگە قاتىستى قىلمىستىق كودەكستىڭ «كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ» بابى بويىنشا ءىس قوزعالدى. جاڭاتاس قالاسىنداعى ابىلايحان ورتا مەكتەبىنىڭ سەگىزىنشى سىنىپ وقۋشىسى اۋرۋحانا توسەگىنە تاڭىلعان. اتا-انا بۇعان ءمۇعالىم كىنالى دەيدى. ال مەكتەپ ۇجىمى تاجىربيەلى ۇستازدىڭ وعاش قىلىق كورسەتكەن جەرى جوق دەگەندى العا تارتۋدا، - دەپ حابارلايدى "قامشى" پورتالى "استانا" ارناسىنا سىلتەمە جاساپ.   

«تاريح ءپانى مۇعالىمىنەن تاياق جەدىم» دەگەن دياس ءقازىر قوزعالۋدان قالعان. اجەتكە جاراپ قالعان بالانى اجەتحاناعا اپارۋ ءۇشىن اناسى وسىلاي ازاپتانادى. دياستىڭ ايتۋىنشا، بۇل وقيعا 25 قاڭتار كۇنى سوڭعى ساباقتا بولعان. 

دياس داۋرەنبايەۆ، وقۋشى: 

قوڭىراۋ بولدى دا، باس كيىمىمدى الىپ جاتقانمىن، ءبىرىمىز كيىنىپ جاتقانبىز. «مەن سەندەرگە وتىرىڭدار دەدىم عوي» دەپ، مەنى يتەرىپ جىبەردى، ستولدىڭ بۇرىشىنا بارىپ ءتيدىم. قاتتى يتەرىپ جىبەردى عوي.  

گۇلجانار ءابدىراسىلوۆا، اناسى: 

اعايى يتەرىپ، ۇرىپ، قۇيىمشاعىن سىندىرىپ جىبەرگەن. ءوزى جۇگىرىپ جۇرگەن بالا عوي. جاعدايى جاتىسى وسى. ءبىر اياعىن ءسىلتىپ باساتىن بولادى دەيدى.  ەندى ول ادامدى كەشىرۋگە بولمايدى دەپ ويلايمىن زاڭ الدىندا. 

دەگەنمەن، دارىگەرلەر دياستىڭ دەنساۋلىعى جاقسارىپ كەلە جاتقانىن ايتادى. وعان سەگىز كوزى سىنعان دەگەن دياگنوز قويىلىپتى. 

قايرات اجىبەكوۆ،  سارىسۋ اۋداندىق ورتالىق اۋرۋحاناسى حيرۋرگيا ءبولىمىنىڭ مەڭگەرۋشىسى: 

سەگىزكوزدىڭ جابىق سىنۋى. مىندەتتى تۇردە جاراقاتتان بولادى ول. وزىنەن ءوزى بولمايدى عوي ول. وپەراسيا جاسالمايدى، ەندى ءبىز ناقتى انىقتاۋ ءۇشىن كومپيۋتەرلىك توموگرافيا ءتۇسىرۋىمىز كەرەك. 

ماسەلەنىڭ انىق-قانىعىن بىلمەك بولىپ، دياس وقيتىن مەكتەپكە باردىق. تاريح ءپانىنىڭ ءمۇعالىمى ارداق نۇرماحانوۆ، جان بالاسىنا جۇدىرىق جۇمساپ كورمەگەنمىن، دەيدى. 

ارداق نۇرماحانوۆ، «ابىلاي حان» اتىنداعى ورتا مەكتەپتىڭ ءمۇعالىمى:  

ەشقانداي ۇرعان دا جوقپىن، سوققان دا جوقپىن. شۋلاپ ءار پارتادان ءار پارتاعا وتىرعاننان كەيىن مەن سوڭعى پارتادا بوس تۇرعان ورىنعا اپارىپ، «وسى جەرگە وتىر» دەپ يىعىنان باسقانمىن. ءسويتتى دە، مەنىڭ قولىمدى قاعىپ جىبەرەم دەدى دە، ارتىندا تۇرعان پارتاعا ارقاسىن ۇردى. بوقتادى، سوندا دا ءوزىمدى ۇستاپ وتىردىم، ءارى قاراي ساباعىمدى وتكىزە بەردىم. 

اۋداندىق ءبىلىم ءبولىمىنىڭ باسشىسى بالانىڭ ساباق ۇلگەرىمى مەن ءتارتىبى ءماز ەمەس ەكەنىن ايتتى. 

ءىلياس بايماعامبەتوۆ، سارىسۋ اۋدانى اكىمدىگى ءبىلىم ءبولىمىنىڭ باسشىسى: 

ساباق وتۋە مۇمكىندىك بەرمەيتىن ارەكەتتەرمەن اينالىسىپ جۇرگەن بالا. مەكتەپتە ءتارتىبى تومەن وقۋشىلاردىڭ قاتارىندا. تاريح ءپانىنىڭ ءمۇعالىمى ءوزى بيازى، سىپايى، وقۋشىلارمەن قارىم-قاتىناسى وتە جاقسى. بۇل ۋاقىتقا دەيىن تەرىس ارەكەتىن ءبىز كورگەن ەمەسپىز. 

باقىت جۇماعۇلوۆ، سارىسۋ اۋداندىق ىشكى ىستەر ءبولىمى باسشىسىنىڭ ورىنباسارى: 

ق ر قك 140 بابى، 2 بولىمىمەنەن قىلمىستىق ءىس قوزعالىپ، بۇگىنگى تاڭدا تەرگەۋ امالدارى ءجۇرىپ جاتىر. اناۋ كىنالى، مىناۋ كىنالى دەپ ايتا المايمىز. دياس داۋرەنبايەۆ بۇگىنگى تاڭدا ىىب-ىندە ەسەپتە تۇر. ول بىلتىرعى قازان ايىندا بىرەۋدىڭ زاڭسىز اۆتوكولىگىن ءمىنىپ كەتكەن. 

مەكتەپ ءمۇعالىمى بۇگىندە جۇمىسىن ىستەپ ءجۇر. ال ءىس سوتقا جەتىپ ۇستازدىڭ كىناسى دالەلدەنسە، ول 300 ايلىق ەسەپتىك كورسەتكىشكە دەيىنگى مولشەردە ايىپپۇل تولەۋى مۇمكىن.