تارازدا 88 جاستاعى تىل ارداگەرىن ءوزىنىڭ كورشىسى تاپسىرىس بەرىپ، ولتىرمەك بولادى. الايدا، الدىمەن قاريانىڭ پاتەرىن، كەيىن جانىن الماق بولعان كورشى ايەلدىڭ ءىسى ءساتسىز اياقتالدى.

بۇل تۋرالى ۆرەميا گازەتىنە سىلتەمە جاساپ NUR.KZ حابارلايدى.

بەيتانىس ايەل پاتەرىندە جالعىز تۇراتىن اجەيمەن جاقىن ارالاسۋدىڭ ءتۇرلى جولدارىن ىزدەپ، وعان ءوز كومەگىن ۇسىنا باستايدى.

“بىزگە قاراما قارسى ۇيدە تۇراتىنىن ايتىپ، مەنىڭ قايتىس بولعان قىزىممەن جاقىن ارالاسقانىن جەتكىزە باستادى. كەيىن مەنىڭ پاتەرىمە كوز سالىپ، “ءسىزدى باعىپ-قاعىپ تۇرامىن، ال ءسىز پاتەردى مەنىڭ اتىما جازاسىز” دەگەندى ايتتى. بۇلاي بولمايدى، ءبىز ءبىر-بىرىمىزدى مۇلدە بىلمەيمىز دەپ باس تارتتىم”، – دەيدى 88 جاستاعى ۆالەنتينا باسوۆا.

وسىدان سوڭ، كورشى ايەل قاريانى تاپسىرىس بەرىپ ولتىرمەكشى بولادى. ول ءوزىنىڭ پاتەرىندە تۇراتىن، بۇرىن سوتتالعان 22 جاستاعى جىگىتتى كيللەر رەتىندە جالدايدى.

الايدا، بۇرىن دا ءىستى بولعان جىگىت تاپسىرىستى ورىنداۋدان باس تارتىپ، بارلىعىن ءتارتىپ ساقشىلارىنا بايانداپ بەرگەن.

بۇگىندە قاريانى ولتىرۋگە تاپسىرىس بەرگەن ايەل قاماۋعا الىندى. ال كيللەر بولسا، قاريامەن دوستاسىپ ۇلگەرگەن. ەلحام اللابەردييەۆ ۆاليا اجەيدىڭ ۇيىنەن شاي ىشۋگە بارىپ تۇرادى.

“ول اجەي سوعىستى كورگەن. مۇنداي ادام قايداعى بىرەۋدىڭ تاپسىرىسىنان كوز جۇمسا، دۇرىس بولماس ەدى”، – دەيدى ەلحام.