شىعىس قازاقستان وبلىسى سولوۆيەۆو اۋىلىنداعى مەكتەپتىڭ وقۋشىلاردىڭ اۋزىن سكوچپەن جاپتى جانە ساباق ۇستىندە پورنو كورسەتتى دەپ ايىپتالعان ءمۇعالىمىنىڭ قىزمەتى تومەندەپ، سوگىس جاريالاندى. - دەپ حابارلايدى Yك-news.kz.
وقىتۋشى ماحاببات تولەۋتايەۆانىڭ بۇل ارەكەتى جايلى وقۋشى قىزداردىڭ ءبىرىنىڭ اكەسى ءبىلىپ قويعان، كەيىن ول جەرگىلىكتى ءبىلىم بولىمىنە جانە وبلىستىق باسقاراماعا ارىزدانعان. وقيعانىڭ ءمان-جايىن پوليسەيلەر انىقتادى.
"قىزدىڭ ايتۋىنشا، وقيعا بىلاي بولعان: انيا ديرەكتوردىڭ وقۋ ءىسى جونىندەگى ورىنباسارى ماحاببات تولەۋتايەۆانىڭ بالانىڭ اۋزىن سكوچپەن جاپقانىن كورگەن جانە "كىمدە-كىم ەركەلەيتىن بولسا، سويلەي بەرەتىن بولسا، سكوچ بارلىعىنا دا جەتەدى" دەپ ايتقانىن ەستىگەن. سوسىن مەن پورنوگرافياعا بايلانىستى جاعدايدى سۇرادىم. انيا ماعان بۇل وقيعانىڭ 2015 جىلدىڭ اقپانىندا ان-كۇي ساباعىندا بولعانىن ايتىپ بەردى. كابينەتتە ينتەراكتيۆ تاقتاسى ورناتىلعان، وعان نوۋتبۋك قوسۋلى بولعان. كومپيۋتەر باسقا مۇعالىمدىكى ەكەن. ماحاببات تولەۋتايەۆا كومپيۋتەردەگى پاپكالاردى اقتارىپ، ۆيدەو ىزدەگەن، وسىدان كەيىن ءبىر ۆيدەونى اشىپ قالعاندا ەكراندا جىنىس مۇشەلەرى كورسەتىلگەن. ايتا كەتۋ كەرەك، وقۋ ءىسى جونىندەگى ورىنباساردىڭ بالاسى وسى سىنىپتا وقيدى. وسى ساتتە ول شەشەسىنە: "ماما، قاراڭىز!" دەپ ايعايلاعان. ءمۇعالىم "وي، باسقا پاپكانى قوسىپپىن!" دەپ، ۆيدەونى وشىرمەك بولعان. ول ءۇش-تورت مينۋت بويى وشىرۋگە تىرىسقان. وشىرگەننەن كەيىن قۋىرشاقتار تەاترى تۋرالى جازبانى قوسقان"، - دەدى زىريان اۋداندىق ىشكى ىستەر ءبولىمىنىڭ يۋۆەنال پوليسيا توبىنىڭ مەكتەپ ءىسى جونىندەگى اعا ينسپەكتورى جاننا قاسىمجانوۆا.
وسى وقيعادان كەيىن مەكتەپتە اۋداندىق ءبىلىم ءبولىمىنىڭ قىزمەتكەرلەرىنىڭ قاتىسۋىمەن تەرگەۋ جۇرگىزىلدى. وقىتۋشىنىڭ بالالاردىڭ اۋزىن سكوچپەن جاپقانى تۋرالى دەرەگى راستالدى. "مەن ودان (تولەۋتايەۆادان - اۆت.) تۇسىنىكتەمە الدىم. شىن مانىندە ءمۇعالىم ساباق ۇستىندە كوپ سويلەگەنى ءۇشىن بالانىڭ اۋزىن سكوچپەن جاپقان. ماحاببات تولەۋتايەۆانىڭ ايتۋىنشا، بالا سكوچتى الىپ تاستاعان دا، كەيىن ساباق جالعاسقان"، - دەدى مەكتەپ ديرەكتورى مۇقان تولەبايەۆ. وسى وقيعادان كەيىن وقۋ ءىسى جونىندەگى ورىنباساردىڭ قىزمەتى تومەندەگەن. سونىمەن قاتار، ءوزىنىڭ زاڭ بۇزۋشىلىعىن حابارلاعان وقۋشى قىزعا قىسىم كورسەتكەنى ءۇشىن وعان سوگىس جاريالانعان.
ال ساباق ۇستىندە پورنو كورسەتۋ تۋرالى دەرەك راستالمادى. "ان-كۇي پانىندەگى ەروتيكالىق ماندەگى فيلمدەردى كورسەتۋ دەرەگى راستالمادى. زىريان اۋداندىق ىشكى ىستەر ءبولىمىنىڭ قىزمەتكەرلەرى تەرگەۋدى باستادى. وقۋشىلار مەن مەكتەپ ۇجىمى بۇل دەرەكتى جوققا شىعارىپ وتىر. سوتقا دەيىنگى تەرگەۋ قىلمىستىق قۇقىقبۇزۋشىلىق قۇرامىنىڭ جوقتىعىنا بايلانىستى اياقتالدى"، - دەپ حابارلادى وبلىستىق ءبىلىم باسقارماسىنىڭ جەتەكشىسى ايجان سادىقوۆا.
ءمۇعالىمنىڭ ءوزى دە ساباق ۇستىندە پورنونى كورسەتپەدىم دەيدى. "مەن كىنالى ەمەسپىن! مەن پورنوگرافيانى كورسەتپەدىم. مەنىڭ مەكتەپتە جۇمىس ىستەپ كەلە جاتقانىما 19 جىل بولدى، بۇل سىنىپتا مەنىڭ ۇلىم وقيدى! مەن ەرەسەكتەرگە ارنالعان فيلمدەردى ەشقاشان كورسەتكەن ەمەسپىن. ال سكوچقا بايلانىستى وقيعادا مەن كورنەكى وقۋ قۇرالدارىن تاقتاعا 3-5 سانتيمەتر بولاتىن سكوچپەن ىلگەنمىن. جەنيا بولسا سويلەي بەردى. مەن وعان "جەنكا، ءقازىر اۋزىڭدى سكوچتپەن جاۋىپ قويامىن!" دەدىم. جاقىنداپ كەلدىم دە ەرنىنە تيگىزدىم. ول سول بەتتە سكوچتى الىپ تاستادى جانە مۇنىڭ بارلىعىن ءازىل رەتىندە قابىلدادى"، - دەدى تولەۋتايەۆا.
