ورتالىق سايلاۋ كوميسسياسى ءماجىلىس دەپۋتاتتىعىنا ۇمىتكەرلەردىڭ قۇجاتتارىن قابىلداي باستادى، - دەپ حابارلايدى «قامشى» پورتالى 24.kz-كە سىلتەمە جاساپ.

العاشقىلاردىڭ ءبىرى بولىپ بۇگىن نۇروتاندىقتار ۇسىنىلعان ءتىزىمدى تاپسىردى.

ەستەرىڭىزگە سالايىق، كەشە پارتيانىڭ XVII سەزىندە ساياسي ناۋقانعا قاتىساتىن 127 ادامنىڭ ەسىمى بەلگىلى بولعان ەدى. بۇگىن ولاردىڭ پارتيا تىزىمىنە ەنگىزۋ تۋرالى وتىنىشتەرى، ءومىرباياندىق دەرەكتەرى، وزدەرىنىڭ جانە جۇبايلارىنىڭ تابىسى مەن مۇلكى تۋرالى دەكلاراسيالارى جانە وزگە دە قۇجاتتارى ورتالىق سايلاۋ كوميسسياسى جۇمىس توبىنىڭ قاراۋىنا ءوتتى. تاعى ءبىر ايتا كەتەتىن جايت، سايلاۋ زاڭناماسىنا سايكەس، «نۇر وتان» پارتياسى وتكەن ساياسي دودادا سايلاۋشىلاردىڭ جالپى سانىنىڭ 7%-دان استام داۋىسىن جيناعاندىقتان، سايلاۋ جارناسىن تولەۋدەن بوساتىلدى.

ءمادي وسپانوۆ، «نۇر وتان» پارتياسى ورتالىق اپپارات جەتەكشىسىنىڭ ورىنباسارى:

- بۇگىن ءبىز 127 قۇجات تاپسىردىق. ەندى ونى ورتالىق سايلاۋ كوميسسياسى تەكسەرەدى. تىركەۋىن كۇتەمىز.