الماتىلىقتار الاتاۋداعى فۋرمانوۆ شىڭىنا ءاليحان بوكەيحان ۇلىنىڭ اتىن بەرۋدى ۇسىندى. الاتاۋدىڭ بيىكتىگى 3000 مەتر بولاتىن شىڭىن باعىندىرعان «ساپالى قازاق» قوعامىنىڭ 100-گە جۋىق مۇشەسى شىڭ باسىندا تۇرىپ ۆيدەوۇسىنىس تاستادى. 
سالاۋاتتى ءومىر سالتى مەن ەرىك-جىگەردى شىڭداۋعا باعىتتالعان شارا الاش كوسەمى ءاليحان بوكەيحان ۇلىنىڭ 150 جىلدىڭ مەرەيتويىنا ارنالدى، - دەپ حابارلايدى "قامشى" پورتالى.
«بيىل ءاليحان بوكەيحانوۆ بابامىزدىڭ تۋعانىنا 150 جىل تولىپ وتىر. ول كىسىنىڭ قازاق ەلىنە سىڭىرگەن ەڭبەگى وراسان. سوندىقتان الاتاۋدىڭ ءبىر شىڭىن ءاليحان بوكەيحان ۇلىنىڭ اتىمەن اتاساق دەگەن ۇسىنىس تاستايمىز. تومەندە بۇل شىڭعا جەتە الماي قالعان 100-گە جۋىق ادام بار. الەۋمەتتىك جەلىدە بۇل ۇسىنىستى قولداعان قازاقستاننىڭ تۇكپىر-تۇكپىرىندەگى 5000 ادام بار. بارلىعىمىزدىڭ تىلەگىمىز ءبىر. قازاقتىڭ ۇلىلارى قازاق الاتاۋىنىڭ شىڭدارىنىڭ اتاۋىنا ابدەن لايىق دەپ سانايمىز»، - دەدى «ساپالى قازاق» قوعامىنىڭ نەگىزىن قالاۋشى، بيزنەسمەن، العاشقى قازاق تىلىندەگى «بيزنەس باستاۋ» مەكتەبىنىڭ جەتەكشىسى احمەتبەك نۇرسيلا. 
بەلسەندىلەر ەندى اتالعان ۇسىنىستى ونوماستيكالىق كوميتەتكە تاپسىرماقشى. 
ايتا كەتۋ كەرەك، اتالعان قوعام مۇشەلەرى ءۇشىن ءار اپتانىڭ جەكسەنبىسىندە مەدەۋ شاتقالىندا جينالىپ، تاۋعا شىعۋ داستۇرگە اينالعان. ايىنا ءبىر رەت قاتىسۋشىلار اراسىندا ەڭ ءبىرىنشى بولىپ شىڭعا شىققان ادامعا ارنايى سىيلىقتار تاراتىلادى. 
ولاردىڭ باستاماسى فەيسبۋك قولدانۋشىلارىنىڭ اراسىندا ۇلكەن قىزىعۋشىلىق تۋعىزىپ جاتىر. ءقازىردىڭ وزىندە قازاقستاننىڭ تۇكپىر-تۇكپىرىنەن كەلىپ قاتارعا قوسىلىپ جاتقاندار كوپ.