شىمكەنتتە ءىىم ورتالىق اپپاراتىنىڭ قىزمەتكەرلەرى ۇستاعان بەلگىلى كاسىپكەر توقتار تولەشوۆ قارجىلىق مۇمكىندىكتەرىنىڭ مولدىعىمەن ەرەكشەلەنەدى. ول ءبىراز ۋاقىت بۇرىن قالادا دۇركىرەتىپ تۇرىپ ساۋىق كەشتەرىن ۇيىمداستىرعان. ونىڭ قارجى رەسۋرستارى شىمكەنتتىكتەرگە ءارقاشان قاتتى اسەر ەتكەن، - دەپ حابارلايدى «قامشى» پورتالى كتك تەلەارناسىنا سىلتەمە جاساپ. 

"تولەشوۆتىڭ تۋعان كۇنىنە قازاقستاننان عانا ەمەس، شەت ەلدەردەن دە ساياسي جانە جۇلدىزدى تۇلعالار كەلەتىن بولعان. توقتار ءوزىنىڭ 13 بالاسىنا دا مەرەكەنى دۇركىرەتىپ وتكىزگەن. كاسىپكەردىڭ ءاربىر بالاسى قالاعان پوپ-جۇلدىزىن شاقىرتىپ وتىرعان (كادرلاردا دميتريي ناگييەۆ، تيماتي جانە يۆان دورن كورسەتىلدى - اۆت). اكەسىنە، وزىنە دە، ۇلكەن ۇلىنا دا ۇلكەندەرگە ارنالعان ويىنشىقتار - اسكەري ۇشاقتار، تەحنيكالار. ول "شىمكەنت پيكچەرس" كينوستۋدياسىن اشىپ، گولليۆۋد مايتالماندارىمەن بىرگە فيلم ءتۇسىردى. توقتار تولەشوۆتىڭ باس سۇقپاعان سالاسى كەمدە-كەم. ول قازاقستاندى قويىپ، رەسەي جۋرناليستەرى قاۋىمداستىعىنىڭ مۇشەسى اتانعان. ءدىننىڭ دە جاناشىرى-مىس. ال، قولىنا كىسەن سالىنعان بويدا كاسىپكەر بىردەن استاناداعى اباقتىعا جەتكىزىلگەن. ونى ءقازىر ىشكى ىستەر مينيسترلىگىنىڭ قىزمەتكەرلەرى تەرگەپ جاتىر"، - دەپ حابارلانعان تەلەارنا سيۋجەتىندە. 

بيزنەسمەننىڭ كورشىلەرى بولسا ونىمەن بىرگە تۇرۋدىڭ جايلى بولعانىن ايتادى. سويتسەك ول ءوز ءۇيىنىڭ ماڭىندا عانا ساۋىق قۇرماپتى. "كورشى رەتىندە جاقسى ادام، ەشكىمگە تيىسپەيدى، جارىقتى قوستى، كوشەگە اسفالت توسەدى"، - دەيدى كورشىلەرىنىڭ ءبىرى. 

تەلەارنا تىلشىلەرىنىڭ مالىمەتىنشە، بيزنەسمەندى تارازدىڭ تۇرعىنى عانا اشىق قورعاپ شىعىپتى. ەر ادام سول ءۇشىن شىمكەنتكە كەلىپتى. ادىلبەك مولداتايەۆ تولەشوۆتىڭ ءداستۇرلى ەمەس يسلامعا ەشقانداي دا قاتىسىنىڭ جوقتىعىن ايتادى. سوندىقتان ودان تابىلعان كۇدىكتى وقۋلىق ماسەلەسىندە بىرنەشە سۇراق تۋىندايدى. 

"ولار ساقال وسىرەدى، شولاق شالبار كيەدى، گالستۋك تاقپايدى. توقتار تولەشوۆ گالستۋك تاعادى، كوستيۋممەن جۇرەدى"، - دەيدى مولداتايەۆ. (دەرەككوز: كتك).

ال، TVK تەلەارناسى شىمكەنتتەگى ارنايى وپەراسياعا قاتىستى جاڭا ۆيدەونى جاريا ەتتى. وعان قارعاندا، كادرلاردان بىرنەشە فيگۋرانت كورىنەدى. كادرلاردا: جەردە جاتقان ادامدار، ولاردى كۇزەتىپ تۇرعان ارنايى جاساق جاۋىنگەرلەرى. وقيعا بيزنەسمەننىڭ ءۇيىنىڭ ماڭىندا بولعانعا ۇقسايدى. 

ەسكە سالايىق، وسىعان دەيىن شىمكەنتتە ارنايى وپەراسيا كەزىندە بەلگىلى كاسىپكەر توقتار تولەشوۆتىڭ ۇستالعانى حابارلانعان بولاتىن. تۇرعىلىقتى مەكەن-جايى مەن جۇمىس ورنىن تەكسەرگەن كەزدە قارۋ، ەسىرتكى زاتى جانە وقۋلىق تابىلىپ، تاركىلەنگەن. 

ۇستالعان كاسىپكەر "شىمكەنتسىرا" ج ش س يەسى جانە تەررورلىق قاتەرلەردى ساراپتاۋ ورتالىعىن باسقارعان. بىرلەستىكتىڭ سايتىنداعى ءومىرباياندا تولەشوۆتىڭ 2008 جىلدان باستاپ قوعامدىق ۇيىمداردا كوپتەگەن قىزمەتتەردى اتقارعانى جازىلعان. سونىمەن بىرگە، ول - "نۇر وتان" پارتياسىنىڭ مۇشەسى، بىرنەشە جۋرناليستەر وداعىنىڭ مۇشەسى جانە قازاقستان كازاكتارى بىرلەستىگىنىڭ جوعارعى اتامانىنىڭ كەڭەسشىسى.

ءبىر ايتارلىعى، شىمكەنتتەگى ارنايى وپەراسياعا وڭتۇستىكقازاقستاندىق پوليسەيلەر تارتىلماعان. بۇل وپەراسيا ەلوردانىڭ ارنايى قىزمەتتەرى باقىلاپ، تەرگەپ وتىر.