ىشكى ىستەر ءمينيسترىنىڭ ورىنباسارى ۆلاديمير بوجكو "پروتون-م" زىمىرانى ءۇشىن رەسەي وتەماقى تولەمەيتىنىن ايتتى. «ويتكەنى زىمىران اۋادا جارىلدى. ونىڭ قۇرامىنداعى گەپتيل تولىقتاي جانىپ كەتكەن، سوندىقتان ەشقانداي زيانىن تيگىزبەدى»، - دەپ سەندىردى ۆيسە-مينيستر. كەلىسىمگە ساي، رەسەي تەك بايقوڭىر عارىش ايلاعىنىڭ ينفراقۇرىلىمىنا زيان كەلسە عانا، وتەماقى تولەۋگە مىندەتتى كورىنەدى. ال وتاندىق ماماندار مەن شەنەۋنىكتەر گەپتيلدىڭ عارىش ايلاعىنان تىس اۋماقتى ۋلاعانىن دالەلدەي الماعان، - دەپ حابارلايدى استانا تەلەارناسى.

ۆلاديمير بوجكو، ق ر ىشكى ىستەر ءمينيسترىنىڭ ورىنباسارى:

ولار وزدەرى شىعىنعا باتتى. ءبىز كوسمودرومنان تىس اۋماققا كەلگەن شىعىندى انىقتاي المادىق. سوندىقتان تولەمدەر تۋرالى كەلىسسوزدەر ناقتى ءبىر سوما بەلگىلەنبەگەن كۇيى اياقتالدى.

ۆلاديمير بوجكونىڭ سوزىنە سەنسەك، زىمىران اۋادا جارىلىپ، گەپتيل ورتەنىپ كەتىپ، ەكولوگياعا ءبىر ءتۇيىر زالال كەلمەگەن. ال سەناتورلار بۇعان سەنبەيدى. ماسەلەن، مۇرات باحتيار ۇلى قورشاعان ورتاعا زيان تيمەۋى مۇمكىن ەمەس دەگەن پىكىردە. 
مۇرات باحتيار ۇلى، ق ر پارلامەنتى سەناتىنىڭ دەپۋتاتى:

وتە وكىنىشتى رەسەي تاراپىنىڭ وسى شىعىندى بەرمەگەنى. ول 13 ملرد دەگەن، 13 ميللياردتىڭ ۇستىندەگى قارجى - رەسەي ءۇشىن كوپ تە قارجى ەمەس. ءبىراق، وكىنىشكە وراي، ەكولوگيالىق زارداپ كەلدى. ەستىرىڭىزدە بار ما، بىلتىر كيىكتەردىڭ، اقبوكەندەردىڭ قىرىلعانىن كەيبىر ماماندار، ساراپشىلار سودان كورىپ جاتىر. سوندىقتان دا، وكىنىشكە وراي، ءبىزدىڭ قازاقستاننىڭ جاعىندا وسى شىعىنداردى ەسەپتەيتىن مامانداردىڭ جوقتىعى، ارنايى زەرتحانالاردىڭ جوقتىعى دا ءوزىنىڭ كەدەرگىسىن كەلتىردى. 

«پروتون-م» زىمىران تاسىعىشى 2013 جىلى 2 شىلدەدە بايقوڭىردان كوككە كوتەرىلە بەرە وماقاسا قۇلاعان ەدى. سول تۇستا اەروعارىش كوميتەتىنىڭ ءتوراعاسى، شىعىن قازاقستان مەن رەسەي ورتاق ەسەپ ادىستەمەسىن دايىنداپ شىعارعان كەزدە تولەنەدى، دەگەن بولاتىن. 

تالعات مۇسابايەۆ، ق ر ينۆەستيسيالار جانە دامۋ مينيسترلىگىنىڭ اەروعارىش كوميتەتى ەكس-توراعاسى (04.06.2015ج):

اسىلىندا، بۇل سۇراق، شىعىندى بىرىگە وتىرىپ ەسەپتەۋگە مۇمكىندىك بەرەتىن ورتاق قۇجات، نە نۇسقاۋلىق شىقپايىنشا، شەشىلمەيدى. ءقازىر ولار سونداي قۇجاتتى رەسەيلىكتەرمەن بىرگە دايىنداپ جاتىر. سوندىقتان ورتاق نۇسقاۋلىق قابىلدانبايىنشا، بۇل ماسەلە رەتتەلمەيدى. 

وسىلايشا، قازاقستان ۇكىمەتىنىڭ وتەماقىعا قاتىستى تالابى دا، وتاندىق كوميسسيالاردىڭ زەرتتەۋلەرى دە زايا كەتكەن سىڭايلى. ال زىمىرانمەن بىرگە جارىلعان 200 توننا ۋلى گەپتيل مەن 400 توننا اميل قازاق توپىراعىنا ءسىڭىپ كەتتى مە، الدە شىنىندا اۋادا جانىپ جويىلدى ما - بۇل سۇراقتىڭ ناقتى جاۋابىن تابۋ كۇردەلى كۇيىندە قالىپ تۇر.