بارشامىزعا بەلگىلى، "قازاقستان" ۇلتتىق ارناسىنداعى "تۇنگى ستۋديادا نۇرلان قويانبايەۆ"  اتتى نۇرلان قويانبايەۆتىڭ اۆتورلىق جوباسى كوپشىلىكتىڭ ىستىق ءىلتيپاتىنا يە بولۋدا. سوڭعى ۋاقىتتا ەلىمىزدىڭ بەلگىلى ونەر ادامدارى بىلاي تۇرسىن،  ءتىپتى شەتەلدەن دە قوناقتار  شاقىرىلىپ ءجۇر. كۇنى كەشە اناندي كەلىندى شاقىرىپ، قازاق  اتىرابىن ءدۇر سىلكىندىردى. "تۇنگى ستۋديا" قازاق كورەرمەندەرىنىڭ كۇتىپ ءجۇرىپ كورەتىن سۇيىكتى باعدارلاماسىنا اينالىپ ۇلگەردى. 

ال، جاقىندا ساتيرا مايتالمانى تۇرسىنبەك قاباتوۆ تا ءوزىنىڭ ءتولتۋما جوباسىن بايگەگە قوساتىن سىڭايلى.   «كتك-دا قاباتوۆ!»  اتتى جاڭا اۆتورلىق جوبانى جۇزەگە اسىرۋعا بىلەك سىبانا كىرىسىپتى.   "كتك" ارناسىنىڭ رەسمي سايتىندا: "  قاباتوۆ كۇلدىرمەگەن قازاق جوق. اۋىلدان ءبىر اۋىز ورىسشا بىلمەي كەلگەن تۇرسىنبەك ازىلىمەن، ءتىپتى، بۇكىل رەسەيدى ءتانتى ەتتى. قىلىعىمەن-اق ىشەك-سىلەنى قاتىرعان ءازىلقوي ەندى بۇدان بىلاي ءوزىنىڭ جەكە باعدارلاماسىن جۇرگىزەتىن بولادى. ءوزى ءانشى، ءوزى ءبيشى، ءوزى تەلەجۇرگىزۋشى تۇرسىنبەكتىڭ تەڭدەسسىز تەلەشوۋى وسى جەكسەنبىدەن باستاپ ەفيرگە شىعا باستايدى" - دەپ جازىپتى.

   ال، قاباتوۆتىڭ ءوزى: -بۇنىڭ ىشىندە جاڭاعى سەناريي، جازىلىپ وتىرعان ءازىل، تەك انشىلەردىڭ اندەرى عانا وزدەرىنىكى بولسا، قالعان سۇحبات، ديالوگتار، ساحنادا قويىلىپ وتىرعان كورىنىستەردىڭ بارلىعىن قولدان كەلگەنشە جازىپ جاتىرمىز. بۇعان دەيىن كوپتەگەن شوۋلارعا قاتىسىپ جۇردىك قوي، ول جەردە جۇرگىزۋشى ءرولىن اتقارىپ جۇرەتىنبىز، ەندى وسى جولى جاڭادان ءبىر جوبا باستاعالى جاتىرمىز"- دەگەن ەكەن.

بۇل جوبانىڭ ەرەكشەلىگى: «كتك-دا قاباتوۆ!» دەپ اتالعان تەلەشوۋدا ءازىل-قالجىڭنىڭ ءبارىنىڭ اۆتورى تۇرسىنبەك قاباتوۆ. جۇرگىزۋشىلەردىڭ بارلىعى دەرلىك،  كۆن ويىنشىلارىنان ىرىكتەلىپ الىنعان. تاپقىرلار كۇلدىرىپ قانا قويماي، ارنايى قويىلىمدار دا جاسايدى.  قاباتوۆقا قوناق بولامىن دەۋشىلەرگە ەسىك اشىق! تەك قازاقتىڭ ماقال-ماتەلدەرىن بىلسەڭىز بولعانى. ءبىلىمىڭىزدى تۇرسىنبەكتىڭ ءوزى تەكسەرەدى.    باعدارلاما  ناۋرىزدىڭ 9-نان باستاپ، ءار جەكسەنبى سايىن ەفيرگە شىعاتىن بولادى.

ال، ەكى ارناداعى ەكى قىزىقتى باعدارلاما  قازاق كورەرمەندەرىنە كوتەرىڭكى كوڭىل كۇي سىيلاسىن!