ق ر پارلامەنت سەناتىنىڭ جالپى وتىرىسىندا سەناتور سەرىك اقىلباي پرەمەر-مينيستر كارىم ءماسىموۆتىڭ اتىنا وسىنداي ساۋال جولدادى دەپ حابارلايدى «قامشى» پورتالى  baq.kz – كە سىلتەمە جاساپ. 

پاتشالىق رەسەيدىڭ وتارلاۋىنا قارسى قازاقستاننىڭ بارلىق ايماقتارىندا حالىق باس كوتەرگەن بولاتىن. سولاردىڭ ىشىندە تورعاي دالاسىنداعى ءابدىعاپپار جانبوسىن ۇلى، امانگەلدى يمانوۆ، كەيكى باتىر باستاعان ەل ەڭ ۇزاق كوتەرىلىس جۇرگىزگەنى بەلگىلى.

جاس ۇرپاقتى پاتريوتتىق پەن وتانسۇيگىشتىككە باۋلۋ ءۇشىن باتىرلار رۋحىن جاڭعىرتۋ كەرەك. كەڭەس داۋىرىندە ۇلت-ازاتتىق كوتەرىلىستەر تۋرالى ايتىلماي كەلدى. وكىنىشكە وراي، بۇگىنگى كۇنى كەي جاستارىمىز 1916 جىلعى كوتەرىلىس تۋرالى، ونى باستاعان باتىرلار جايلى تولىق بىلە بەرمەيدى. س.اقىلباي ەندى وسى ولقىلىقتىڭ ورنىن تولتىراتىن كەز كەلگەنىن ايتادى.

ۇلت بوستاندىعى جولىندا كۇرەسكەن داڭقتى قولباسشىلاردىڭ ءبىرى، اتاقتى مەرگەن كەيكى باتىر ءوز ەلى ءۇشىن باسىن بايگەگە تىككەن تۇلعا. باتىردى قىزىل اسكەر ايۋاندىقپەن ءولتىرىپ، ەكى قولى مەن باسىن كەسىپ العان. ۇلت بوزداعىنىڭ باسى ءالى كۇنگە سانك-پەتەربوردا ساقتاۋلى تۇر. 1995 جىلى ق ر سىرتقى ىستەر مينيسترلىگى سۇراۋ جىبەرگەندە، كەيكى بابامىزدىڭ باسى بار ەكەنىن رف سىرتقى ىستەر مينيسترلىگى دە جاۋاپ حاتىندا راستاعان. ءسوز سوڭىندا سەناتور، كەيكى باتىردىڭ باس سۇيەگىن تۋعان ەلىنە الدىرۋ ماسەلەسى كوپتەن ايتىلسا دا ناتيجە شىقپاعانىن كولدەنەڭ تارتتى.

بيىل ۇلت-ازاتتىق كوتەرىلىستىڭ ءجۇز جىلدىعى. وسىعان وراي، كەيكى باتىردىڭ باس سۇيەگىن ەلگە قايتارىپ، تۋعان جەرىنە جەرلەۋ ماسەلەسىن ۇكىمەت قولعا السا دەيدى جوعارعى پالاتا مۇشەسى.

ەسكە سالا كەتسەك، دەپۋتات سەرىك اقىلباي كەيكى باتىردىڭ باسى توڭىرەگىندە بۇرىن دا بىرنەشە مارتە قوعام نازارىنا وي تاستاعان بولاتىن.