ەلىمىزدە 400 مىڭنان استام جۇمىسسىزدار قاتارىندا. سونداي-اق، 13 مىڭ ادام بىلتىر تۇراقتى جۇمىستارىنان ايرىلعان. بۇل تۋرالى دەنساۋلىق ساقتاۋ جانە الەۋمەتتىك دامۋ ۆيسە-مينيسترى ءبىرجان نۇرىمبەتوۆ حابارلادى.

«بۇل 443 مىڭ ادام 1 قاڭتارداعى جاعداي بويىنشا جۇمىسسىزدار ساناتىنداعى ازاماتتار. ال، 2015 جىلى جۇمىسسىز قالعاندار تۋرالى ايتار بولساق، رەسمي مالىمەتتەر بويىنشا ءتۇرلى كاسىپورىنداردان 13 مىڭ ادام جۇمىستان شىعارىلعان»، - دەيدى مينيستر.

الايدا، بۇعان دەيىن ەۋرازيالىق ەكونوميكالىق قاۋىمداستىق ەسەبىندە وتكەن جىلى ەلىمىزدە 34 مىڭ ادام جۇمىستان قىسقارعانى تۋرالى ايتىلعان ەدى. بۇعان قاتىستى ۆيسە-مينيستر مينيسترلىك تەك قىسقارتۋ بويىنشا جۇمىستان شىعارىلعانداردى عانا ەسەپكە الاتىندىقتارىن جەتكىزدى.

«ەگەر بىرەۋگە جۇمىسى ۇناماي، ول جۇمىسىنان شىعىپ كەتسە، ءبىزدىڭ مينيسترلىك ونداي مالىمەتتەر جيناي المايدى. ءبىز كوبىنەسە قىسقارتۋلار جۇرگەن كاسىپورىنداردى ەسەپكە الامىز. زاڭ بويىنشا كاسىپورىندار جۇمىسشىلارىن قىسقارتاتىنى تۋرالى جۇمىسپەن قامتۋ ورتالىقتارىنا حابارلاۋعا مىندەتتى. ءبىز وسى ارقىلى ەسەپ جۇرگىزەمىز. ال، ءوز ەركىمەن جۇمىسىنان شىققاندار، باسقا جۇمىسقا اۋىسقانداردى ەسەپكە الۋ بىزگە قيىنعا تۇسەدى»، - دەيدى ءبىرجان نۇرىمبەتوۆ.

نۇرىمبەتوۆتىڭ بۇل ايتقاندارىنان مينيسترلىك پەن ونىڭ وڭىرلەردەگى قۇرىلىمدارى تەك كاسىپورىندار ۇسىنعان مالىمەتتەردى عانا ەسەپكە الىپ وتىرۋمەن اينالىساتىنىن تۇسىنۋگە بولادى. ەشكىمگە ەسكەرتپەي-اق قىسقارتۋ جۇرگىزگەن كاسىپورىنداردىڭ بۇرىنعى جۇمىسشىلارى مينيسترلىكتىڭ ەسەبىندە جوق. ودان كەيىن، مينيسترلىككە جۇمىسشىسىن قىسقارتاتىن ۇيىمداردىڭ قانشالىقتى تولىق مالىمەت ۇسىناتىنى دا كۇماندى.