داعدارىس سىلتاۋ بولدى. نەگىزدى، نەگىزسىز سەبەپتەرمەن ءتۇرلى سالالاردا قىسقارتۋ ءجۇرىپ جاتىر. بۇل داعدارىس قارجى داعدارىسى بولعاندىقتان ەڭ الدىمەن سول قارجى سەكتورىنداعى جۇمىستى جۇيەلەۋ، ءتيىمدى تەتىكتەردى قاراستىرىپ، بىلىكسىز مەنەدجەرلەر مەن پايداسىز كاسىپورىنداردان ارىلۋ كەرەك ەمەس پە ەدى؟ ءبىراق، ءبىزدىڭ بيلىك ولاي ىستەمەدى. قاشانعى «شاش ال دەسە، باس الاتىن» ادەتىنە سالىپ، بەلدەن باستى. ءسويتىپ، رۋحانيات سالاسىنا دا اۋىز سالىپ، وسى باعىتقا بولىنەتىن بيۋدجەت قارجىسىن قىسقارتىپ وتىر.

مادەنيەت جانە سپورت مينيسترلىگى بيىلعى جىلعى بيۋدجەتىنىڭ 2015 جىلمەن سالىستىرعاندا 17،2 پايىزعا قىسقارعانىن ايتىپ وتىر. سوعان ساي ۆەدومستۆو شىعىندارىن وڭتايلاندىرىپ، قوماقتى قارجىنى تالاپ ەتەتىن جوبالاردى كەيىنگە قالدىرىپ وتىر.

2016-2019 جىلدارعا ارنالعان رەسپۋبليكالىق بيۋدجەتتە مينيسترلىكتىڭ جالپى بيۋدجەتى 56 522 ميلليون تەڭگە دەپ كورسەتىلگەن. سونداي-اق، جىلدا ءداستۇرلى تۇردە اتالىپ ءوتىپ كەلگەن ءبىرقاتار مادەني ءىس-شارالاردى قارجىلاندىرۋعا رەسپۋبليكالىق بيۋدجەتتىك كوميسسيا رۇقسات بەرمەي قويعان. جىلدا ءوتىپ جۇرگەن ءتۇرلى مۋزىكالىق بايقاۋلاپ، فەستيۆالدار مەن جوبالار بيىل وتپەيتىن بولعان.

بۇدان باسقا ەلباسى تاپسىرماسىمەن كينووندىرىسىنە بولىنەتىن قاراجات تا 31 پايىزعا قىسقارعان. وتاندىق كينو سالاسىنا 2016 جىلعا 2 027 ميلليون تەڭگە ءبولىنىپ وتىر. مينيسترلىكتىڭ حابارلاۋىنشا، «ۇلتتىق فيلمدەر شىعارۋ» باعدارلاماسى بويىنشا بولىنگەن قاراجات تەك الدىڭعى جىلدارى باستالىپ قويعان فيلمدەردىڭ ءوندىرىسىن اياقتاۋعا عانا جەتەتىن كورىنەدى. بۇل فيلمدەرگە كورەرمەنگە جول تارتۋى ءتيىس 8 كوركەم فيلم مەن ءبىر انيماسيالىق تۋىندى كىرىپ وتىر.

«وڭتايلاندىرۋ» دەگەن وعاش باستاما مادەني-كوپشىلىك، قوعامدىق-ساياسي شارالار مەن عىلىمي-ارحەولوگيالىق زەرتتەۋلەردى دە اينالىپ وتپەگەن. الداعى جىلدارى تاريحي-مادەني قورىق-مۋزەيلەر جانىنان ۆيزيت-ورتالىقتار قۇرىلىسىن جۇرگىزۋگە دە قارجىلاندىرۋ توقتاتىلعان.

مينيسترلىك بىلەك سىبانىپ اتاپ وتەتىن، مەملەكەت قارجىسى باعىتتالاتىن ءبىر عانا مەملەكەتتىك مەرەكە قالعان. ول – قازاقستان رەسپۋبليكاسى تاۋەلسىزدىگىنىڭ 25 جىلدىعى. «ءقازىر توي تويلايتىن ۋاقىت ەمەس» دەپ جاتتاندى ادەتپەن، بۇل مەيرامدى دا قىسقارتۋعا ۇشىراتىپ جىبەرسە قايتەر ەدىك؟ ونداي ابىرويسىزدىقتان قۇداي ساقتادى، ايتەۋىر. قازاقتىڭ باس مەرەكەسىنىڭ اياسىندا ەل كولەمىندە مينيسترلىك 30 شاقتى الەۋمەتتىك ماڭىزدى جوبالار مەن مادەني ءىس-شارالاردى جۇزەگە اسىرماق. اتاپ ايتقاندا، مەرەكەگە توي سيپاتىن سىيلايتىن ادەتتەگىدەي كونسەرتتەر، فەستيۆالدار، ءتۇرلى بايقاۋلار، كورمەلەر مەن فورۋمدار، كونفەرەنسيالار، دوڭگەلەك ۇستەلدەر مەن فلەشموبتارع سپورتتىق ءىس شارالار مەرەكەنىڭ كوركىن كەلتىرەدى دەيدى مينيسترلىك. وسى ءىس-شارالاردىڭ ىشىندە دراما تەاترلارىرىنىڭ رەسپۋبليكالىق فەستيۆالىن، «تاۋەلسىزدىككە تولعاۋ»، «ەلىم مەنىڭ» رەسپۋبليكالىق بايقاۋلارىن، «ەۋرازيا» حالىقارالىق كينوفەستيۆالىن، ءشامشى اندەرىنىڭ بايقاۋى، وپەرا انشىلەرىنىڭ بايقاۋى سىندى رەسپۋبليكالىق جانە حالىقارالىق دەڭگەيدە اتاپ وتىلەتىن كولەمدى شارالار دا بار. استاناداعى سالتاناتتى جيىن مەن مەرەكەلىك كونسەرت قورىتىندىلايتىن باس مەرەكەنى اتاپ وتۋگە 35،6 ميلليون تەڭگە بولىنگەن. مينيسترلىك بۇل قاراجات مەرەكەنى لايىقتى دەڭگەيدە اتاپ وتۋگە جەتكىلىكتى دەپ وتىر.

ال، الاش كوسەمى ءاليحان بوكەيحانوۆتىڭ 150 جىلدىعى، ۇلت-ازاتتىق قوزعالىستىڭ 100 جىلدىعى، جەلتوقسان كوتەرىلىسىنىڭ 30 جىلدىعى باستاعان قازاق ۇلتىنىڭ تالايلى تاريحىنداعى ەلەۋلى وقيعالار بيلىكتىڭ «ۇنەمدەۋ» ساياساتىنىڭ قۇربانى بولىپ وتىر. «قارقىندى دامۋدىڭ داڭعىل جولىنا تۇستىك» دەپ ۇرانداتقىش مەملەكەت باسشىلىعى قارجىلىق داعدارىستى سىلتاۋراتىپ، بۇل اتاۋلى داتالاردى ەسكەرۋسىز اتتاپ وتپەك. الايدا، وسى ۋاقىتا دەيىن ونسىز دا «قالدىق» قاعيداسىمەن قارجىلاندىرىلىپ كەلگەن رۋحاني سالادان جىرىپ الىنعان از عانا قاراجات بىلىكسىز بيلىكتىڭ قاي قاتەلىگىن جابۋعا جەتەرىن سولاردىڭ وزدەرى بىلەر مە ەكەن؟

جومارت ابدوللا ۇلى