“مەلومەن” توبىنىڭ انشىلەرى جول اپاتىنا ۇشىرادى، – دەپ حابارلايدى Baistars.kz ءتىلشىسى. توپتىڭ مۇشەسى جىگەر اۋىپبايەۆ اۋرۋحانادا جاتىر.

سايت تىلشىلەرىنىڭ مالىمەتىنشە، انشىلەر 7 اقپاندا تاڭعى ساعات 04.00 شاماسىندا الماتى قالاسىندا ءال-فارابي داڭعىلىنىڭ بويىمەن Lexus كولىگىمەن الما-اراسان شاتقالىنا كوتەرىلىپ بارا جاتىپ، جول-كولىك اپاتىنا ۇشىراعان. تىزگىندە جىگەر اۋىپبايەۆ بولعان. ول رۇقسات ەتىلگەن جەردەن سولعا قاراي بۇرىلىس جاساعان ساتتە ارت جاقتان قاتتى جىلدامدىقپەن Nissan ماركالى جول تالعامايتىن كولىك سوققان. قاتتى سوققىدان جىگەر اۋىپبايەۆ جۇرگىزىپ كەلە جاتقان كولىك ءبىر اۋناپ، شەتكە ۇشىپ تۇسكەن. ابىروي بولعاندا، توپتاعى ءۇش جىگىتكە زاقىم كەلمەدى. ال تىزگىندە وتىرعان جىگەر ورنىنان قوزعالا الماي قالعان.

وقيعا ورنىنا جەتكەن جەدەل جاردەم قىزمەتكەرلەرى جىگەردى قالالىق №12 اۋرۋحاناعا الىپ كەتتى. قازىرگى تاڭدا جىگەر ەم قابىلداپ جاتىر. ايتا كەتەيىك، 10 اقپان كۇنى “مەلومەن” توبى جانە جىگەر اۋىپبايەۆ ءوزى باستى ءرولدى سومداعان “72 ساعاتتا ۇيلەنۋ” ءفيلمىنىڭ تۇساۋكەسەرىنە قاتىسۋ كەرەك بولعان.