تۇرىك پرەزيدەنتى رەجەپ ەردوعان رف باسشىسى ۆلاديمير ءپۋتيندى وككۋپانت دەپ ايىپتاپ وتىر. ەردوعاننىڭ بۇل مالىمدەمەسىن باشار اساد اسكەرىنىڭ الەپپو تۇبىندەگى شابۋىلدارىنىڭ اسەرى دەپ قابىلداۋعا بولادى، - دەپ حابارلايدى «قامشى» پورتالى Bloomberg اگەنتىگىنە سىلتەمە جاساپ.

اتاپ ايتقاندا، ر. ەردوعان Hurriyet تۇرىك گازەتىنە بەرگەن سۇحباتىندا سيرياداعى احۋالعا قاتىستى پىكىرىن بىلدىرگەن. سيريادا سوڭعى ۋاقىتتا رەسەي اۋە كۇشتەرىنىڭ دەمەۋىمەن ۇكىمەت اسكەرى وپپوزيسيا مەن كوتەرىلىسشىلەرگە جويقىن سوققىلار جاساعان بولاتىن. وسىعان وراي، ر. ەردوعان ۆ. پۋتينگە قاراتىپ: «سەندەر سيريادا نە ىستەپ جۇرسىڭدەر؟ وسى ارەكەتتەرىڭمەن سەندەر وككۋپانت بولدىڭدار» دەگەن.

مۇنىڭ الدىندا تۇركيا سىرتقى ىستەر مينيسترلىگى رەسەيلىك ۇشاقتار ەلدىڭ اۋە كەڭىستىگىن تاعى بۇزدى دەپ ايىپتاعان بولاتىن.