Álıhan Bókeıhannyń 150 jyldyǵy memlekettik deńgeıde atalyp ótilýi kerek. Bul usynysty búgin Astanada «Alash» ult-azattyq qozǵalysynyń kósemi Álıhan Bókeıhannyń týǵanyna 148 jyl tolýyna oraı ótken «Álıhan Bókeıhan. Marksızm qaǵıdasynan ulttyq «Alash» ıdeıasyna deıingi evolúsıalyq jol» atty respýblıkalyq konferensıada akademık Serik Qırabaev aıtty, dep habarlaıdy BAQ.KZ tilshisi. 

 «Ahmet Baıtursynulyn, Mirjaqyp Dýlatulyn zertteıik desek Álıhan Bókeıhansyz derekke qol jetkizý múmkin emes. Biz sondyqtan Alash tarıhyn zertteýdi Álıhan Bókeıhannan bastaýdy jón kórdik. Álıhan – barlyq taqyrypqa júırik adam bolǵan. Álıhansyz Mirjaqyp pen Ahmetter saıasatqa qadam baspaǵan. Búgingi aıtyp júrgen «Máńgilik el», «Qazaq Eli» degen ıdeıalardyń basynda Álıhan turǵanyn umytpaýymyz kerek. Sondyqtan, Álıhan Bókeıhannyń 150 jyldyǵyn memlekettik deńgeıde atap ótýimiz kerek», - dedi S.Qırabaev.

Aıta óteıik, 2016 jyly Alash kósemi Álıhan Bókeıhannyń týǵanyna 150 jyl tolady. Osyǵan oraı belgili alashtanýshy ǵalymdar men qoǵam qaıratkerleri óz usynystaryn bildirýde.

Sonymen  qatar, «Álıhan Bókeıhan. Shyǵarmalarynyń 9 tomdyq jınaǵy» atty eńbektiń tusaýkeseri ótti.  Alash qaıratkeri Álıhan Bókeıhannyń muralaryn toptastyrǵan bul jınaq «Alash» ult-azattyq qozǵalysynyń kósemi Álıhan Bókeıhannyń týǵanyna 148 jyl tolýyna oraı ótken «Álıhan Bókeıhan. Marksızm qaǵıdasynan ulttyq «Alash» ıdeıasyna deıingi evolúsıalyq jol» atty respýblıkalyq konferensıanyń aıasynda tanystyryldy.

Nurserik JOLBARYS, Ǵabıt MADALIEV (foto).

http://baq.kz